يوم الوقفة إلي فاتت كنت بظبط زوايا العربية وبعض ما خلصت لقيت العربية منزله مياه خضرا كتير مكان ما كانت وقفة
المهم قدام بتاع الزوايا فيه مكانيكي جبتو قلتلو شفلي العربية دي فيها إيه
بص بصتين في السريع ولقى المية نازلة من يمين الموتور وقالي دي طرمبة المية ضربت وطبعاً مفيش منها هاتها من بره
قلت بس إتركنت العربية كمان الميكانيكي بتاعي كان قافل يومها إبن الكسلانة
جه في بالي أطلع على بتاع الرديترات كمحاولة يائسة
بص عليها وقالي بحتراف دي طرمبة مية يا باشا واضحة
خالص
قلتلو طيب معندكش حل .
قالي طبعاً في حل - قالها و رفع راسه في السما -
فرحت موت وقلتلو الحقني بيه لأن فك طرمبة المية دة قصة كبيرة ومفيش زيها أصلاً
قالي وهو بيفتخر بنفسه
روح إشتريلي كيس بن يا باشا
قلتلو وكأني سمعت غلط
أشتريلك إيييييه ؟!!
قالي كيس بن... أيوا بن
قلتلو ليه ؟ قالي هاتو بس وملكش دعوة
قلت ماشي وجبت كيس البن
لقيت المعلم هيفتح غطا الردتير ويدلق البن فيه
قلتلو عنداااااك ستوب إنت بتعمل إيه يا عم إنت
قالي يا باشا البن هيمشي في دورة المية وتسد أي شرخ أو تنفيس في طرمبة المية
قلتلو يا حلاوة وأنا اش عرفني إنه مش هيسد دورة المية نفسها أو يكتم الطرمبة خالص
فكك مني يا ناصح إنت
كلمت واحد صاحبي معاه عربية زي بتاعتي وقلتلو الموضوع قالي في واحد بيفهم فيهم هكلمهولك وروحلو كانت ساعتها الساعة بقت حوالي ١٢ أو ١ بليل
رحت للراجل دة رفع العربية وبص من تحت وضحك
قالي طرمبة مية إيه بص الله يجازيهم
دة طبة الريداتير مش مربوطة كويس وبتسرب مية على الفيبر إلي قدام وينزل من اليمين كأنها نازلة من طرمبة المية
ربطها وخلصت القصة
اتفضلوا معايا القهوة بقى _ كيس البن إلي جبته دة طلع طعمه حلو بصراحة