المقارنه مع الكبار... اتمنى نفيد ناس كتير بيها...

حبيت اعمل المقارنه الصاروخيه دي من وجهة نظري عشان نفيد بيها ناس كتير و انا بصراحة اولهم... اتمنى ان الكل يستفيد و ان المقارنه تكون على اساس و هو...

في المقام الأول: الموتور و العفشة (لأن ده الاساس)

في المقام الثاني: الثبات و الاتزان و الراحة في القياده و جودة التقفيل الداخلي (هاام جداا)

يأتي بعد ذلك الكماليات طبعا و الصيانة و اداء التوكيل و مدى توفر قطع الغيار, و يا سلام لو نعرف ارتفاع كل سياره منهم عن الارض و الأسعار... اهم حاجة ان الكلام يكون عن تجربة او يكون بالارقام و الاثبات, عشان نقدر نفيد كل الناس ان شاء الله...

العملاق الأول: هوندا سيفيك vti

العملاق الثاني: مازدا 3 هاي لاين (الشكل الجديد)

العملاق الثالث: تويوتا كورولا ادفنسد (اللي هي الهاي لاين بردو)

العملاق الرابع: ميتسوبيشي لانسر سبورت (الشارك الكامله)

طبعا الترتيب مش معناه افضلية سيارة عن الاخرى اكييد... و يا ريت لو نعرف هل فيه موديل منهم شكله هيتغير خلال فتره قريبة, زي الهوندا مثلا و كمان ايه مشاكل كل عربية (مشكلة جوهريه اكييد)... و تقبلوا جزيل الشكر....

أرجو من الاداره حذف الموضوع للتكرار... عذرا مخدتش بالي من الموضوع المثبت.. و شكراا

يسعدنى انى اشترك فى الموضوع دا

واقول بعض المعلومات اللى أعرفها

بخصوص النقطه الأولى الموتور والعفشه

فطبقا للأرقام المعلنه من الشركات

1 - السيفيك 125 حصان

2 - الكورولا 122 حصان

3 - الشارك 109 حصان

4 - المازدا 105 حصان

_________

العفشه

انا مش خبره فى موضوع العفشه ونظم التعليق

بس اللى فهمته من خلال بعض المشاركات فى المنتدى ان يفضل نظام التعليق الخلفى يكون Multi Link وان النظام دا أفضل من ال Beam

عموما الأربع عربيات نظامهم الأمامى Machferson

المازدا الجديده والشارك نظام تعليقهم الخلفى Multi Link

الكورولا Beam وتقريبا برضه السيفيك Beam مش متأكد

_____________

الثبات والاتزان والراحه طبعا محتاجه تجربه عمليه وانا طبعا مجربتش كل العربيات دى

بس معروف عن الهوندا ثباتها نظرا لقربها للأرض ( واطيه ) وقاعدة عجلاتها الكبيره ( 2700 )

ومعروف برضه ان عفشة الكورولا ناعمه وثباتها كويس برضه

الشارك ممكن تبقى انشف شويه من الكورولا ورياضيه عنها

المازدا الجديده بيتهيألى محدش جابها فى المنتدى ولا جربها

_______

بخصوص الكماليات فهما قريبين من بعض

يعنى مثلا السيفيك Vti 2009 اعلى فئه ( 188 الف ) تتميز ان فيها فتحة سقف وفرش جلد طبيعى

من كمالياتها : 6 ايرباج - Abs Ebd - مثبت سرعه - فتحة سقف - فرش جلد طبيعى - زينون - جنوط 16

الكورولا 2010 أدفانسد ( 160 الف ) تتميز ان فيها 9 ايرباج وسمارت كى وحساس مطر

من كماليتها : 9 ايرباج - Abs Ebd - مثبت سرعه - سمارت كى - حساس مطر - زينون - جنوط 16

الشارك سبورت 2009 ( 150 الف ) تعتبر أقلهم لكن برضه يميزها ان فيها فيميه

من كمالياتها : 2 ايرباج - Abs Ebd - جنوط 16 - فتحة سقف - زجاج فيميه - تشغيل المحرك بدون مفتاح

المازدا ماعنديش معلومات عنها بس سعرها 150 الف والأيرو ب 170 الف

_______

أخيرا اداء التوكيل والصيانه وقطع الغيار

فالكورولا والشارك يتفوقوا فى النقطه دى

يليهم السيفيك

وأخيرا المازدا

___________

وربنا يوفقك يا بشمهندس وحمد الله على السلامه