تحذير من القيادة علي الطريق الزراعي (هام جدا)

السلام عليكم ورحمة الله
اعزائي رواد المنتدي , طبعا في مواضيع كتير بتتكلم عن الطريق الزراعي وكيفية التعامل مع الظروف الامعقولة علية !
ولكن تظل بلدنا هي ام الاختراعات
بقالي كتير مروحتش البلد يعني من بعد العيد تقريبا !!
المهم امبارح وان مروح شفت المفاجأأأة !
مطب الموت !
طبعا كلنا عارفين ان الطريق سريع والسرعة فية 90 وبعض المناطق السكنية 60 !
وهناك بعض المطبات الي حصلت فية ادارة المرور علي جوائز عالمية في تكسير العفشة وهدم قوائم العربيات ! قصدي الفلنكات الصغيرة وعلاجها السرعة عليها لتفادي الضرر !
بالنسبة لمطب الموت فهو بعد ماتعدي بركة السبع وبالتحديد قبل طنطا بشوية عند منطفة اسمها اعتقد نبفا او دفرة المهم المطب دة قائم ومرتفع وممكن العربية تحك فية كمان لو تقيلة !
المهم انا امبارح بجد اصابني الهلع من كمية الزجاج المكسور عالارض وعلامات الكاوتش قبل وبعد مطب الموت !
المهم بعد المطب فية شباب صيع طبعا مستنيين العربيات الي هتتقلب عشان يقلبو الي جواها ويتكيفوا من المنظر!!!!!!! لان المطب حوالية كمان تلتوار اسمنتي عالي ورهيب من الاخر مقبرة
ستر ربنا اني بجد معرفش وانا كل اسبوع او اتنين بطلع عالطريق! وبجد الي بيعمل خير بيلاقي خير ! اخدت واحد امين شرطة من عالطريق وهوة الي قالي خلي بالك من المطب وبجد بالليل مستحيل مستحيل انك تفادية لو مش عارف !!!!
اللهم استر طريقنا ! نرجو الاهتمام وشكرا

شوف بقى الاحدث عند بنها كفر الحصة
انا فكرت اسيب شغلى عاشان ما اعديش من ام الطريق الزراعى
اكتر من 20 مطب ورا بعض
عين قط عموله
حديد من العريض و طبقتين
و تقفلك ساعتين على ما تعدى المنطقة
افلام عربى......ام الاجنبى
المعنى فى بطن الزير

على طريق المنصوره مع انى بسافر بمعدل كل اسبوع مره الا انى كل مره لازم الاقى مطب جديد

منهم مره طرت من فوق مطب جبلى متعدد التضاريس وانا ماشى 80 وكنت هنزل فى الميه والعربيه اتخبطت من تحت خبطتين يقطعوا القلب

حسبى الله ونعم الوكيل

والله العظيم من كل قلبى حسبى الله ونعم الوكيل فى كل مسئول وكل انسان فكر واستخدم المطبات دى
دة مباقتش للتهدئه دى بقت للموت وخساره اروحنا وفلوسنا وفى الاخر يقولوا الناس اتغيرت ليه
مهو من اللى بيشفوه

اعتقد كل المطبات دي مبقتش تيجي حاجه جمب مطبات كفر الحصه عند بنها

6 مجموعات من المطبات

كل مجموعة فيها 6 مطبات حديد 2 منهم بس كفيل بتمزيق كاوتشات العربيه يعني 30 مطب حديدي

و5 مجموعات عيون قطط معموله من حديد عز الدخيله ومصممه خصيصا لفرتكه ام العفشه يعني حوالي 300 عين قطه

غير انك عشان تعديها لازم تفضل ما لا يقل عن ساعه في الحته دي وساعتين ونص في الطريق من بنها للقاهره فقط

الموت الموت الموت
للداخلية و المرور...الله يحرقهم!

شكراً للتحذير...

اولا شكرا لصاحب الموضوع على التحذير وربنا يبعد عننا المطبات وانا اعاوز اعقب ان دة استهبال بتاعهم دة هما بينتقموا من الناس ولا اية المفروض ياجماعة تبلغوا عن الطريق دة وتعملوا شكوى غريبة ان العسكرى اللى ركبتة هو اللى قلك يعنى عارف المفروض يشيلوة وكل يوم تحذير هنا فى المنتدى عن طريق ما لدرجة ان الواحد حيخاف يطلع من البيت ليتكعبل فى مطب

اقصى سرعة للسفر على الزراعى اصبحت 60 عشان تلحق تفرمل بسرعة لو لمحت المطب

شكرا يا باشا على تحذيرك واهتمامك وبجد فعلا الموضوع زاد عن حده جدا
ربنا يستر طريقنا جميعا