اللى باع او اشترى عربية هنا فى المنتدى يقووول !!!!!

طبعا كلنا عارفين ان كل واحد بيكتب موضوع بيع او طلب لشراء عربية بتنزل عليه كمية من التريقة بالذات موضوع البيع
الا بقى لو السعر عالى شوية ومش عاجب حد تلاقى كل واحد داخل ولا هوا هيشترى ولا حاجة ويقولك ياخى حرام عليك
السعر عالى اوى
السعر عالى جداااااااااااا
برجاء مراجعة سعر السوق
لو مش عارف كام انا شارى
وانا جاد فى الشراء
لو تستنى لشهر كام انا شارى

وكلام كتير ملوش لزمة
علشان تعرفوا معظم مواضيع بيع العربيات كله بيعلق وخلاص واللى داخل يعرف السعر او معاه عربيه اختها ولا بنت خالتها وداخل يشوف عربيته هتجيب كام

فى النهاية
طلب من الادارة والاعضاء
1- الادارة : ميبقاش فى ردود فى موضوع البيع تتلغى يعنى من الاخر ( يبقى لازم فى رقم تليفون )
2- الاعضاء : كل واحد يعمل الاعلان بتاعه وخلاص وميخشش على الموضوع تانى لانه لو دخل ولقى حد بيتريق على عربيته هيتنرفز وممكن يغلط فى العضو المحترم اللى اتريق عليه
- يعنى يحط رقم تليفونه وخلاص اللى عجبه السعر اهلا وسهلا واللى مش ياكل جبنه مش

معلش انا اتنرفزت - ياكل بقلاوة -

انت متنرفز ليه هو معلش الكلام عليه جمرك ما حضرتك تسيب الى يقول يقول يعنى هو البايع معندوش الا الأعضاء الى هنا هما الى هيشتروا ما اكيد فى ناس تانيه بره وبعدين بصراحه حضرتك عرفت منين نوايا الناس الى داخله بتتريق ما ممكن يكون الى داخل بجد عايز يشترى وممكن الى يكون قايل شهر وهشترى يكون فعلا كان نفسه فيها بس الفلوس هتيجى كمان شهر وحب يقول رأيه مافيهاش حاجه يعنى وبعدين مشفتش بصراحه حد بيتريق على عربيه خالص فى ناس بتخش تقول يحسنلك بيعها وربنا يوفقك واهو مش هيتشرى ولا اتكلم على العربيه خالص بس حب يقول رأيه وخلاص فياريت اصلا مع احترامى لحضرتك طبعا الكلام دا مالوش اساس من الصحه اصلا ودا راى بصراحه

على فكرة انا اشتريت من فترة قريبه عربيه نوبيرا من المنتدى و العضو اللى بعهالى كان امين معايا لاقصى درجة و فعلا شخصيه محترمة.
مش معنى ان فيه ناس بتستهبل يبقى هو دة الطبيعى. انت لز نزلت السوق و اتفرجت على العربيات هتلاقى ناس بتتكلم فى اسعار غريبه اكنها من كوكب تانى بس محدش بيقولو السعر غريب و لا الكلام دة. هو التصرف الصح انك تسيبه و تدعيله ربنا يكرمه فى بيعها.

بالظبط كده
كل واحد يحط لعربيته التمن الي يعجبه
وبين البايع والشاري ..يفتح الله

بصراحه الغالب هنا بل كل الي بيعلق على بيع سيارات هنا ناس في غاية الذوق والأدب وزي ما قال الأخ ميدو: الي بيدخل لو ملوش في الموضوع بيدعي لصاحب العربيه بالبركه والتسهيله.
ولعلمك لو الموضوع مشي زي ما حضرتك عاوز المنتدى هيفقد هدف من اهم اهدافه وهو ان الجميع يشوف عربيات بتتباع ويعرف الأسعار والموديلات وكل دا مفيد غاية الفائده .
ومعظم الأعضاء هنا عندو رغبه لمعرفة الكلام دا عن قرب وعن تجارب الآخرين. وكلنا بنحب العربيات وما يخصها
حقيقتا انا شخصيا بتابع مواضيع البيع والشراء وبستفيد وبستمتع لو فيه صور وفصال ولو تم البيع كمان يا سلام بحس بجو من الجديه والعمليه.
سامحني استاذي على الإطاله وتحياتي للجميع

طب انا عندى فكره
ايه رأيكوا اللى باع او اشترى يحط لينك للموضوع ونشوف هو باع او اشترى بكام فى الاخر
ولو معرفش يجيب لينك يقول كان طالب او مطلوب فى العربيه كام وفى الاخر خلصت بكام

لييييييه التعقيد دا يا جماعه ما المنتدى ماشى زى الفل اهو مافيش مشاكل والى عارض عربيته ربنا بيسهلهاله والحمد لله انا بصراحه مش عارف فى مواضيع كدا مش بيبقى ليها اساس من الصحه ودا رأى برضه بصراحه

الكلام عالى اوى

المشكله ان احنا لحد دلوقتى مش مستوعبين قانون العرض و الطلب
بس بصراحه انا بقرأ فى مواضيع البيع شوية ردود عجب

مش للدرجة دى يعني ، أينعم فى ناس مستفذة لأقصى درجة وفى ناس بتفتى من غير ما تعرف حاجة بس لازم تتجاهلهم

وفى تجار بيدورو على عربيات يطلعو فيها سبوبة

والعكس صحيح يعنى فى ناس كتير جدا محترمين وبيكونو جادين فى التعامل

بالنسبالى العربية فى اللينك دة لسة منزلها من كام يوم
http://www.nilemotors.net/Nile/110091-1.html
وفى أخ فاضل من المنتدى اتفرج عليها ودفع عربون وهيخلص فى خلال كام يوم ان شاء الله لما العربية تجهز ، والسعر فرق من النهائى 500 جم فقط

وقبل كدة بيعت هنا HTC HD و لسة امبارح iphone ، وكلهم ناس ما شاء الله الواحد بيتشرف بيهم فعلا

!!!!!!!!!!!!!!!!!!

اقتباس:

---

المشاركة الأصلية كتبت بواسطة mi3d3

!!!!!!!!!!!!!!!!!!

---

معلش بس لما حضرتك تعمل موضوع بتبيع فيه عربية ..

و تقعد اسبوع ولا اكتر و محدش رد عليك عشان السعر مش عاجبهم .. هتبقا عايز اى حد يقول اى حاجة ..

و على الاقل لما الناس تتكلم و حضرتك تتناقش معاهم دة بيخلى الموضوع فى الصفحة الاولى و دة بيخلى ناس اكتر تشوف الموضوع .. لان المواضيع فى قسم البيع و الشراء كتيرة اوى

العربيه دى اتعرضت فى يوم 29 وانا اشتريتها فى نفس اليوم وشوفوا التواريخ بس مش هاذكر سعر الشراء

http://www.nilemotors.net/Nile/108697-13500.html

وانا بصراحه لو لقيت حاجه تستاهل او لقطه باخلص فيها حتى لو مش محتاجها مش موضوع تجاره بس حب بيع وشراء

وعربيتى اللانسر انا عارضها للبيع عندى فى الجراج ومعملتش ليها اعلان هنا لانى عارف انها استحاله تخلص بالسعر ده هنا وباذن الله هابيع زى ما انا عاوز
انا عارف عربيتى وشاريها من الزيرو

انا ليا تجربة مع شراء السيارات هنا فى نيل موتورز
انا اشتريت سيارة كيا برايد اتوماتيك من هنا من 5 شهور تقريبا و الصراحة الناس كانوا محترمين جدا كان هناك مفاوضات على السعر اون لين بين الأعضاء و صاحب السيارة و هو كان راجل متفاهم جدا
رأى ان الموضوع عرض و طلب اللى مش عاجبه السعر يقول لو البايع عنده النية هيتفاهم و لو ماعندوش يا دار مادخلك شر من غير عصبية

وانا كمان اشتريت من خلال المنتدي عربيه الي اخويا كانت كورولا 92 وبصراحه كانت صفقه محترمه ومن ناس محترمين وبعيد عن السوق والتجار والكلام الفارغ ده وبجد اهم قسم لازم افتحو يوميا قسم البيع والشراء ودائما كل مشاركاتي دعاء بالتوفيق وده اولا لتشجيع العارض للعربيه