لماذا لا يوجد إقبال على موديلات فيات الحديثة ؟؟؟ (اية السر؟؟)

السلام عليكم يا أعضاء قسم فيات الكرام..
دا اول موضوع ليا عندكم ..

يا ريت نتناقش في الموضوع دا : لية مفيش إقبال على عربيات فيات الحديثة؟؟
لية بجد؟؟

انا من متابعتي للقسم هنا و جدت الأتي:
- عربيات رائعة و بأسعار تعتبر منافسة جداً بالنسبة لعربيات نفس الفئة من الياباني و الكوري(ان مكنش ارخص في بعض الحالات)
- تكنولوجيا عالية جداً
- تصميمات اكتر من روعة
- اسعار قطع الغيار الإستهلاكية مش نااار زي ما كنت بسمع .. يعني ممكن تلاقي عربيات كوري و ياباني اسعار قطع غيارهم كدا برضه

لية الخوف من الفيات بقى؟
بجد انا عايز اعرف... هل فية سر معين ولا احنا خايفين نجرب زي الرينو ؟؟ ولا الخوف من التوكيل ؟ ولا أية بالضبط ؟؟

انا مستنى مناقشتكم
شكراً

هو الشعب المصري بيخاف من الجديد ده غير سوء سمعة التوكيل السابق و قلة الدعاية للعربية وان اللي ماسكين الكوري هما منصور و غبور ودول ليهم سلطة و علاقات لأن منصور كان وزير النقل

اولا شريحه كبيره من الناس العاديه مازال عندها اعتقاد ان فيات هى 128 و ال 132
وبالتأكيد السمعه السيئه للعربيات دى بعد تجميعها فى مصر ادى الى ان سمعت فيات فى مصر قليله اوى
تانى شىء واللى ممكن يخلينى انا مشتريش عربيه فيات رغم انى معاك فى كل كلامك عن التصميم والامكانيات والاداء و"النسب" للاروبى
هو التوكيل
انا شايف ان اومترا وش اد فيات ولو كان توكيل غيره كان المفروض ان الشعب كله يركب فيات
ده حتى الدعايه للعربيات معدومه يعنى عالم مش فالحه فى حاجه
وكمان قطع الغيار ان كانت مش غاليه نسبيا زى محضرتك بتقول لاكن عدم توافرها خارج التوكيل الا بقله يعتبر مشكله رئيسيه
اضف على ذلك التكنولجيا المصاحبه للعربيات دى اصبح فى زمنا عيب لان محدش بيصلح ولا بيفهم فى العربيه غير التوكيل وانا اسف انى بقول الكلام ده لكن دا فكر الناس وواقع ملموس

اقتباس:

---

لماذا لا يوجد إقبال على موديلات فيات الحديثة ؟؟؟ (اية السر؟؟)

---

سوق يجن

من رأيى هما سببين:
الأول ...
هو الاعتقاد الراسخ فى عقول وذهن الغالبية العظمى من جمهور المستهلكين بموديلات فيات القديمة وحالتها فى الشوارع وسخونة المحركات وغيرها من المشاكل التى لا وجود لها فى الطرازات الجديدة

الثانى ...
التوكيل نفسه ضعيف ولا تواجد له على ساحة الدعاية والاعلانات
الظاهر أن أوماترا واخد توكيل فيات لزوم الوجاهة الاجتماعية زى كتير من أصحاب التوكيلات فى مصر ومش فى دماغه أساسا البيع وراضى بقليله وعاوز الناس اللى تروحله مش هو اللى يروح للزبون ويغريه بركوب عربيات فيات
زى عز العرب وتوكيل بروتون وسيتروين سايبهم يبيعوا لوحدهم ومعتمد أن واحد يسأل واحد راكب عربية بروتون وسياسة زبون يجيب زبون
وده طبعا أسلوب فاااااااااااااااشل بكل المقاييس فى عالم التسويق والمبيعات !!!

سؤال جميل .. و موضوع اجمل للمناقشة ..

بس ياريت يا جماعة منعدش نقول اصل الشعب المصرى فاكر ان فيات يعنى 128 و كدة ..

انا شايف ان المشكلة الاكبر فى التوكيل .. لانه مش بيعلن عن عربياته خالص غير ان سمعته سيئة جدا

السبب الرئيسى هو عدم وجود اهتمام من التوكيل بتسويق العربيات بتاعته .. يعنى انا لما كنت بدور على عربية لوالدى مكنتش اعرف غير العربيات الماشية فى السوق زى لانسر و اوبترا و ياريس .. عمرى ما سمعت عن فيات خالص مع ان اوماترا ليهم معرض فى المنصورة و كنت دايما اعدى من جنبه بس معرفش اى حاجة عن عربياتهم ولا اسعارها ولا امكانياتها .. و كنت عملت موضوع هنا فى المقارنات اسأل عن الياريس و الاوبترا و الاخ CryptonX الله يمسيه بالخير قالى أبص على الفيات لينيا و فعلا كانت هى .. فعلا الفيات عربياتها بقت محترمة جدا بس للأسف الوكيل مش مكلف نفسه يعمل اعلان فى الجرنال حتى يقول اسعار عربياته مع انه لو اهتم بالدعاية هيبيع من العربيات الملاكى اكتر من النقل اللى هو فرحان بيه !

وجهة نظر توكيل اوماترا ( واللى انا مش مقتنع بيها ) انهم عاوزين العربيات الجديدة هى اللى تعلن عن نفسها بنفسها ( زى البروتون جين تو وبرسونا) ويتم توفير ملايين مصاريف الدعاية على انشاء مراكز صيانة وخدمة جديدة يتم الانتهاء من انشائها بالتوازى زمنيا مع بيع كمية مناسبة من العربيات فى السوق المصرى وبكده يبقى فيه نسبة وتناسب بين المبيعات والخدمات .. خصوصا وان فى مفهومهم ان زبون الفيات الحديث هو الزبون اللى نفسه فى عربية اوروبى بس مش قادر يشترى المانى فبيلجأ لفئة اوربية اقل فى السعر وتقارب مثيلتها فى الاعتمادية . وده مش عدد كبير من الزباين لانه المفترض انه زبون فاهم هو عاوز ايه بالظبط ومش مجرد زبون بيشترى عربية بياعة وخلاص بغض النظر عن عيوبها او مزاياها .. لاننا للاسف هنا فى مصر بنتبع "نظرية القطيع" فى شراء اى سلعة مش العربيات بس.
يعنى يقولك اشترى العربية اللى الشعب يحبها مش اللى انت تحبها (علشان تكون منتشرة وتعرف تبيعها بعد كده او تلاقيلها قطع غيار بسعر رخيص) والامثلة كتير فى عربيات زى اللانوس واللادا والتويوتا وخلافه ( مع تباين المستوى طبعا بين الفئات المختلفة)
يعنى بالظبط زى المثل اللى بيقول ( كل اللى يعجبك والبس اللى يعجب الناس)

أنا شايف ان من ضمن أسباب عدم الأقبال عليها هو حاجتين

1- اسعار قطع الغيار غاليه
2- سعر اعادة البيع ضعيف

اقتباس:

---

المشاركة الأصلية كتبت بواسطة u3mbkp

وجهة نظر توكيل اوماترا ( واللى انا مش مقتنع بيها ) انهم عاوزين العربيات الجديدة هى اللى تعلن عن نفسها بنفسها ( زى البروتون جين تو وبرسونا) ويتم توفير ملايين مصاريف الدعاية على انشاء مراكز صيانة وخدمة جديدة يتم الانتهاء من انشائها بالتوازى زمنيا مع بيع كمية مناسبة من العربيات فى السوق المصرى وبكده يبقى فيه نسبة وتناسب بين المبيعات والخدمات .. خصوصا وان فى مفهومهم ان زبون الفيات الحديث هو الزبون اللى نفسه فى عربية اوروبى بس مش قادر يشترى المانى فبيلجأ لفئة اوربية اقل فى السعر وتقارب مثيلتها فى الاعتمادية . وده مش عدد كبير من الزباين لانه المفترض انه زبون فاهم هو عاوز ايه بالظبط ومش مجرد زبون بيشترى عربية بياعة وخلاص بغض النظر عن عيوبها او مزاياها .. لاننا للاسف هنا فى مصر بنتبع "نظرية القطيع" فى شراء اى سلعة مش العربيات بس.
يعنى يقولك اشترى العربية اللى الشعب يحبها مش اللى انت تحبها (علشان تكون منتشرة وتعرف تبيعها بعد كده او تلاقيلها قطع غيار بسعر رخيص) والامثلة كتير فى عربيات زى اللانوس واللادا والتويوتا وخلافه ( مع تباين المستوى طبعا بين الفئات المختلفة)
يعنى بالظبط زى المثل اللى بيقول ( كل اللى يعجبك والبس اللى يعجب الناس)

---

فعلا هما عايزين كده وللأسف ده مينفعش في مصر

اقتباس:

---

المشاركة الأصلية كتبت بواسطة kh_talaat

أنا شايف ان من ضمن أسباب عدم الأقبال عليها هو حاجتين

1- اسعار قطع الغيار غاليه
2- سعر اعادة البيع ضعيف

---

معاك في إعادة البيع لكن قطع الغيار ﻷ لإنها قريبة جدا من بعض العربيات الكوري والياباني مع إختلاف في بعض الحجات الفيات أغلى فيها سنة لكن معظم القطع الإستهلاكيه تيل وفلاتر زي بقيت العربيات

التوكيل هو السبب ،، يعني إزاي معاه عربية زي البراڤو وب ١،٤ وتوربو وبتبدي من ١٢٦ ومش عارف يبيعها ،، بجد حرام

وفي مشكله كبيرة وهي قطع الغيار غاليه أوي ،، أنا من فترة رحت أتفرج علي الجراند بونتو وسألت علي أسعار قطع الغيار ،، بجد كنت هعيط معقول إكصدام أمامي ب ١٨٠٠ جنيه علي ما أتذكر ،، ده كلام يعقل يا ناس

يعني العربيه كمان كام سنه يوم ما أفكر أصلحها بره التوكيل مش هلاقي حد بيبيعلها قطع غيار ،، وإن لاقيت هتبقي غاليه جداً

اقتباس:

---

المشاركة الأصلية كتبت بواسطة yoko

معاك في إعادة البيع لكن قطع الغيار ﻷ لإنها قريبة جدا من بعض العربيات الكوري والياباني مع إختلاف في بعض الحجات الفيات أغلى فيها سنة لكن معظم القطع الإستهلاكيه تيل وفلاتر زي بقيت العربيات

---

يبقى أكيد حضرتك مجربتش اسعار قطع غيار الكوري

كمان واحد صاحبي معاه فيات سينا وعلى طول بيشتكي من الغلاء الغير مبرر لقطع الغيار

واعرف واحد ميكانيكي متخصص في الفيات وبيحترم عربياتها جدا وبيعتبرها افضل من كل العربيات الكوري وفي رأيه أن مشكله الفيات في مصر هو اسعار قطع الغيار الغاليه مقارنه بالكوري

اقتباس:

---

المشاركة الأصلية كتبت بواسطة kh_talaat

يبقى أكيد حضرتك مجربتش اسعار قطع غيار الكوري

كمان واحد صاحبي معاه فيات سينا وعلى طول بيشتكي من الغلاء الغير مبرر لقطع الغيار

واعرف واحد ميكانيكي متخصص في الفيات وبيحترم عربياتها جدا وبيعتبرها افضل من كل العربيات الكوري وفي رأيه أن مشكله الفيات في مصر هو اسعار قطع الغيار الغاليه مقارنه بالكوري

---

أسعار قطع الغيار تتساوى معظمها مع النيو سيراتو (أنا بتكلم على أسعار التوكيل)

يعني احنا كلنا متفقين على النقاط ديه
1- الإعتقاد السائد عند معظم الناس إن عربيات فيات هيا 128 و 127 و مينفعش تدفع 100 ألف في عربية فيات
2- ضعف الوكيل بشكل عام وخصوصا فيما يتعلق بالدعاية
3- أسعار قطع الغيار

بإختصار هي ده أسباب عدم انتشار فيات

اقتباس:

---

المشاركة الأصلية كتبت بواسطة normal

التوكيل

---

اقتباس:

---

المشاركة الأصلية كتبت بواسطة y2y1500

التوكيل

---

اقتباس:

---

المشاركة الأصلية كتبت بواسطة kareemhisham

التوكيل

---

اقتباس:

---

المشاركة الأصلية كتبت بواسطة zmalek

التوكيل

---

اقتباس:

---

المشاركة الأصلية كتبت بواسطة u3mbkp

توكيل اوماترا

---

الاجماع على ان التوكيل هو السبب لانه اهمل فى تحقيق رسالته التسويقية التى تعمل على تعديل المفاهيم المتداولة عن فيات وكذلك عدم توافر خدمات ما بعد البيع ( صيانات) بمستوى لائق

1- توكيل زي الزفت عايز الطرد من مصر
2- أسعار قطع الغيار غالية جداً (الهيونداي مثلاً أرخص منها جداً)

الحل:
1- تغيير الوكيل فوراً ويفضل يكون وكيل محلي لأن الوكيل الحالي خليجي تقريباً
2- أنظر رقم 1
3- أنظر رقم 2

وشكراً

:M_yes[1]:

الشركه دي كان تقريبا هي اللي بتيع في مصر لفتره كبيره جدا وكان ليها نصيب الاسد بس السبب هو:
1-التوكيل مش نافع لا في الدعايه ولا في الصيانه ولا في اي حاجه.
2-شركه فيات ادت توكيلات لدول تانيه لتصنيع عربياتها وطبعا كل شركه بتصنع بمزاجها وليها عيوبها وده حتي لو كانت من غير عيوب حاجه تقلق المستهلك لان فيه عربيات فيات منها ايطالي ومصري وتركي وهندي برازيلي وطبعا مفيش شركه في الدنيا كده.
3-من اوائل التسعينيات ونزلت عربيات فيات السوق في الشرق الاوسط بعربيات اسعارها غاليه وقطع غيار غاليه بمقارنه الكوري اللي بدأ ينزل بأسعار اقل وكماليات اقوي زي باور خفيف جدا ومكيفات قويه جدا عكس مكيف الفيات اللي اقصي سرعه فيه تعادل اقل سرعه في سياره كوري وتابلوهات دخل في صناعتها البلاستك وحاجات تانيه كتير.
مع ان السياره الفيات في الوقت ده زي(التمبرا والتيبو والاونو والبنتو)عربيات احسن مليون مره من حيث قوه الموتور وعزمه والشكل والمتانه والعفشه القويه من الكوري اللي تقريبا عرق السوء بسبب سعره وقطع غياره والي حد ما يناسب الشوارع المصريه(الاكسيل والسوزوكي سويفت والانسر وغيرهم) وان علي حد مفتكر ان اخر عربيات فيات اللي باعت في مصر مبيعات كتيره جدا هي الفيات ريجاتا اللي كان اخرها1989 ومعاها كانت نهايه شركه فيات؟
4- شركه فيات في ايطاليا نفسها مش مهتمه بالبيع والتسويق في الشرق الاوسط (مصر وسوريا ولبنان فقط)علي اعتباره معدش مسوق اساسي ومركزه شغلها علي السوق الاوروبي وامريكا الجنوبيه.
انا قلت اللي عندي ولو حد شايف اني غلطت في حاجه يراجعني
مع العلم انا من عشاق شركه فيات اللي عملت عربيات بقالها اكتر من 25 سنه في السوق وتلاقي عربيات ماسكه حيلها كتير وتتركب وتستمل مع الشعب المصري والطرق عكس الكوري والياباني اللي منه موديلات 2000 وميتركبش وحالته زفت.

نفسي اعرف التوكيل ده بيجيب فلوس يقبض اللي شغالين فيه منين ؟ تحس انه كمالة عدد
وبالنسبه لاسعار قطع الغيار هي نفس اسعار قطع الغيار الاصليه في عربيات كوري وياباني كتير بس الفرق ان التانيين ليهم قطع غيار تايواني ببلاش ودي ملهاش غير الاصلي
يعني الالانترا الشكل القديم كنت بجيبلها قطع غيار قريب
اكصدامها اصلي ب1000 جنيه وتايواني ب275 وصيني ب150!!!
ومثلاً فانوس اللانسر بومه الخلفي اصلي ب800 جنيه وانا جايب واحد تايواني ب180 جنيه وبقالو اكتر من سنه ومفرقش عن الاصلي

[frame="9 10"]
دة تعليقى على التوكيل و راى السادة الاعضاء و بمنتهى البساطة
http://www.nilemotors.net/Nile/109495-a.html
[/frame]

بص يا باشا ... أنا لو توفر معايا مبلغ في حدود 100 ألف مثلاً ... أنا شايف إن أحسن حاجة بالنسبة لي الـ Bravo

لكن استحالة أجيبها ... لأن التوكيل مريييييض وكسلان جداً ، وأخاف العربية يحصل فيها حاجة أحتاس بيها

فلو التوكيل اتظبط وعمل دعاية وخدمة ما بعد البيع كويسة .. عصر الفيات هيرجع تاني

متشكر عالنقاش الثري :)

علشان التوكيل سىء وقطع الغيار غير متوفرة وعند التصليح اسعار الصيانة وقطع الغيار غالية غير كة مفيش وبالنسبة لسعر اعادة البيع فهى عربية معمرة جدا

الفيات مظلومه فعلا
انا شايف ان عربيه زى البرافو من افضل العربيات فى فئنها
ومش شايف ان سعرها غالى
بصرحه جوده وخامات فوق الوصف لسه بحلم بيهم لغايه دلوقتى
فخامه ملهاش مثيل وتكنولجيا عاليه + امكانيات كثيره
ومع ذلك فعلا لو معايه سعرها مش هجبها
وده شىء محزن بصراحه
دى مش مكانه فيات!!

اقتباس:

---

المشاركة الأصلية كتبت بواسطة yoko

فعلا هما عايزين كده وللأسف ده مينفعش في مصر

معاك في إعادة البيع لكن قطع الغيار ﻷ لإنها قريبة جدا من بعض العربيات الكوري والياباني مع إختلاف في بعض الحجات الفيات أغلى فيها سنة لكن معظم القطع الإستهلاكيه تيل وفلاتر زي بقيت العربيات

---

ماهوا سعر اعادة البيع عشان العربيات دي مش منتشرة لكن لو انتشرت هيبقى سعر اعادة البيع زي باااقي العربيات

انا من رائيي سبب عدم الانتشار :
1- الفكرة السيئة عن فيات وانها اللي بتعطل على الكوبري
2- ضعف الدعاية والاعلانات وان كانت معدووووومة

السعر العالى للفيات الحديث غير مرتبط فى أذهان المصريين بالنسبة لماركة الفيات ,

اقتباس:

---

المشاركة الأصلية كتبت بواسطة normal

ومع ذلك فعلا لو معايه سعرها مش هجبها

---

فعلا انا كنت بقارن بنها و بين الكورولا .. و لكنى و جدت الكورولا ثفقة رابحة اكتر بكتير

عقليتنا كا مستهلكين هيا السبب الاول والرئيسي دايما لما بنيجي نشتري بنفكر في الي حوالنا ورد فعلهم يعني بنفكر في سعر اعادة البيع والناس هتقول عليا راكب فيات والكلام ده

خلونا نتكلم جد

هي واضح ان المشكلة في فيات نفسها، لأن مفروض كل ما يتعلق بالدعاية و خدمات ما بعد البيع و كل القصص دية بيتم ادراجة في العقد بين الشركتين فيات و الوكيل

و بعدين احنا لية عايزين ننسي ان سايت فيات الرئيسي يعتبر من أعفش سايتات شركات العربيات

ادخل بقي اتفرج علي سايت فولكس ولا سيات ولا حتي كيا حتلاقية يضرب سايت فيات بأجدع شبشب

معلش يا جماعة انا فى حاجة عايز اقولها بس ياريت الناس فى فيات هنا متزعلش منى ..

فيات فى العالم كله عربيات مش بياعة اصلا و ملهاش مكانة معينة .. و لو نلاحظ لما نبص على قائمة عربيات العام او العربيات البتاخد جوايز مش بيبقى فيها فيات خالص ..

دة غير ان فى عربيات كتير مفضلها عنها .. حتى جيريمى كلاركسون لما اختبر البرافو قال فيها كلام وحش ..

ياريت بجد محدش يزعل .. انا عارف انه كلام ميسرش اى حد بيحب الفيات بس بجد هى دى الحقيقة

اقتباس:

---

المشاركة الأصلية كتبت بواسطة u3mbkp

وجهة نظر توكيل اوماترا ( واللى انا مش مقتنع بيها ) انهم عاوزين العربيات الجديدة هى اللى تعلن عن نفسها بنفسها ( زى البروتون جين تو وبرسونا) ويتم توفير ملايين مصاريف الدعاية على انشاء مراكز صيانة وخدمة جديدة يتم الانتهاء من انشائها بالتوازى زمنيا مع بيع كمية مناسبة من العربيات فى السوق المصرى وبكده يبقى فيه نسبة وتناسب بين المبيعات والخدمات .. خصوصا وان فى مفهومهم ان زبون الفيات الحديث هو الزبون اللى نفسه فى عربية اوروبى بس مش قادر يشترى المانى فبيلجأ لفئة اوربية اقل فى السعر وتقارب مثيلتها فى الاعتمادية . وده مش عدد كبير من الزباين لانه المفترض انه زبون فاهم هو عاوز ايه بالظبط ومش مجرد زبون بيشترى عربية بياعة وخلاص بغض النظر عن عيوبها او مزاياها .. لاننا للاسف هنا فى مصر بنتبع "نظرية القطيع" فى شراء اى سلعة مش العربيات بس.
يعنى يقولك اشترى العربية اللى الشعب يحبها مش اللى انت تحبها (علشان تكون منتشرة وتعرف تبيعها بعد كده او تلاقيلها قطع غيار بسعر رخيص) والامثلة كتير فى عربيات زى اللانوس واللادا والتويوتا وخلافه ( مع تباين المستوى طبعا بين الفئات المختلفة)
يعنى بالظبط زى المثل اللى بيقول ( كل اللى يعجبك والبس اللى يعجب الناس)

---

كتير من العربيات الجديده اللى منزلينها 1400 سى سى - طبعا هم فى الطراوه لان ثبت ان اكتر عربيات مبيعا فى مصر هى ال 1600 - المستهلك اعتقاده ان ال 1400 مش مناسب للتكيف ولا العزم- طيب التوكيل الحلو مش يتصرف لا طناش- ماشى واحنا كمان طناشين

اقتباس:

---

المشاركة الأصلية كتبت بواسطة kareemhisham

معلش يا جماعة انا فى حاجة عايز اقولها بس ياريت الناس فى فيات هنا متزعلش منى ..

فيات فى العالم كله عربيات مش بياعة اصلا و ملهاش مكانة معينة .. و لو نلاحظ لما نبص على قائمة عربيات العام او العربيات البتاخد جوايز مش بيبقى فيها فيات خالص ..

دة غير ان فى عربيات كتير مفضلها عنها .. حتى جيريمى كلاركسون لما اختبر البرافو قال فيها كلام وحش ..

ياريت بجد محدش يزعل .. انا عارف انه كلام ميسرش اى حد بيحب الفيات بس بجد هى دى الحقيقة

---

مع احترامي لكلامك فأن فيات 500 واخدة احسن سيارة في العام 2008 و جراند بونتو كانت من السيارات ذات الشهرة الكبيرة في 2005
ثانيا موقع شركة فيات بالرغم من اني شايفه ناقص شوية في التعريف بامكانيات السيارة الا اني قريت انه من السايتات اللي بيجذب الناس لشراء فيات
جيمي كلاركسون مش مقياس لأنه قال على مرسيدس ماكلارين بلاك انها من اسوأ السيارات في العالم و شبه الكراسي بتاعتها بكومة طوب و قعد على كومة الطوب و قال ان الشعور واحد و بالرغم من ذلك فأنه عمل تيست درايف لفيات500 ابارث و ممكن تشوفه على اليوتيوب وقال ان الحاجة الوحيدة اللي في العربية مش عاجباه ان سعرها قليل و المفروض يكون سعرها أغلى من كدة
نمسك بقا في ان فيات في العالم مش بياعة وده بسبب اجيال قديمة من فيات كانت زبالة بالمعنى الحرفي و كانت بتسخن و تتنيل وده قلل الموثوقية للناس بالنسبة لفيات بس هما تداركوا ده و بدأت فيات تنافس لدرجة انها في الترتيب لشركات السيارات من حيث المبيعات كانت التاسع و في عدد الوحدات المباعة كانت الثامن على مستوى العالم

سبب عدم إنتشار الفيات:-

1- أسعار الفيات .. غالية ... يعنى اللينيا فئة الياريس و سعرها غالى بالنسبة للكورى ... سعرها زى اليابانى بالضبط .

2- الفيات نازل بتكنولوجيا حديثة جدا .. تربو و chips و عقد ... ماينفعش توديها لميكانيكى عادى ..

3- سعر إعادة البيع فى الأرض

4- سوء سمعه الفيات القديم (بسبب إنه بقاله 30 سنة ماشى و تصنيع مصرى يعنى مالهوش علاقة بفيات فى العالم أصلا و المصرى مهمل فى صيانته) .. جودة سيارات فيات معروفه من زمان و لكن المصريين هم من أفسدوا سمعتها (شركة النصر)

5- توكيل كسول و سئ فى الدعاية و تخاف منه .
6- أسعار قطع الغيار غالية .. مماثلة لليابانى . و ده فى إعتقاد الناس إن اليابانى أفضل من فيات .

فيات سوقها فى أوروبا قوى و أمريكا الجنوبية و أستراليا ... و السيارات الإيطالية قوية جدا و أخذت جوائز و البرافو عاملة أرقام حلوة فى المبيعات و الفيات 500 دمرت مبيعات المينى كوبر تماما ....

جيمى كلاركسون بينتقد جميع السيارات و بيطلع فيها القطط الفاطسة ...
ثانيا على موقع توب جير الكلام على البرافو كويس ...
و مفرقتش عن الجولف 5 قوى يعنى نسب بسيطة ... مقابل سعر أقل

اقتباس:

---

المشاركة الأصلية كتبت بواسطة relentless_mayhem

سبب عدم إنتشار الفيات:-

1- أسعار الفيات .. غالية ... يعنى اللينيا فئة الياريس و سعرها غالى بالنسبة للكورى ... سعرها زى اليابانى بالضبط .

2- الفيات نازل بتكنولوجيا حديثة جدا .. تربو و chips و عقد ... ماينفعش توديها لميكانيكى عادى ..

3- سعر إعادة البيع فى الأرض

4- سوء سمعه الفيات القديم (بسبب إنه بقاله 30 سنة ماشى و تصنيع مصرى يعنى مالهوش علاقة بفيات فى العالم أصلا و المصرى مهمل فى صيانته) .. جودة سيارات فيات معروفه من زمان و لكن المصريين هم من أفسدوا سمعتها (شركة النصر)

5- توكيل كسول و سئ فى الدعاية و تخاف منه .
6- أسعار قطع الغيار غالية .. مماثلة لليابانى . و ده فى إعتقاد الناس إن اليابانى أفضل من فيات .

فيات سوقها فى أوروبا قوى و أمريكا الجنوبية و أستراليا ... و السيارات الإيطالية قوية جدا و أخذت جوائز و البرافو عاملة أرقام حلوة فى المبيعات و الفيات 500 دمرت مبيعات المينى كوبر تماما ....

جيمى كلاركسون بينتقد جميع السيارات و بيطلع فيها القطط الفاطسة ...
ثانيا على موقع توب جير الكلام على البرافو كويس ...
و مفرقتش عن الجولف 5 قوى يعنى نسب بسيطة ... مقابل سعر أقل

---

معاك في كل حاجة معادا ١و٥ لإنك بتقول أسعارها زي الياباني طب ليه متقلش أرخص من الإروبي (ومعروف إن الإروبي أغلى من الياباني)

انا اقولك اية السر
صديقى معاة سيينا2006 اللى هى شكل الباليو
رحنا نجيب طقم اسطوانة دبرياج
تخيل السعر 1200جنية بعد 3ايام لف و مكناش لاقيين التوكيل قال 1600بالتركيب متخيل
كان وش الفانوس الباغة يعنى عندة مكسور رحنا نجيب فانوس امامى تخيل السعر 950جنية و التركى المضروب 650 جنية
الاكصدام كان واخد خبطة ضغيرة وكلكوا عارفين ان الفيبر مش بيتمعجن رحنا سئلنا على اكصدام استعمال ب650جنية

طبعا انا وهو حلفنا ان لا فيات بعد اليوم !!!

اقتباس:

---

المشاركة الأصلية كتبت بواسطة yoko

معاك في كل حاجة معادا ١و٥ لإنك بتقول أسعارها زي الياباني طب ليه متقلش أرخص من الإروبي (ومعروف إن الإروبي أغلى من الياباني)

---

مش أرخص من الأوروبى ... لانها زي الأوروبى .. يعنى الكوردبا و اللينيا نفس الفئة و سعرهم واحد ... الإتنين النسخة السيدان من السوبر مينى كار ... يعنى نفس الخامات و نفس كل حاجة من السوبر مينى كار فا مفيش مبرر لرفع سعرها ...

و الإتنين سعرهم فى نفس رينج التيدا و السيتى و الياريس ...

لكن البرافو مثلا فى نفس سعر الفوكاس و الليون و الجولف 5 و الأسترا ... و سعرهم فى نفس رينج الكورولا و السيفيك ..

و طبعا .. اليايبانى غالى فى مصر بس ... فى الدول الأخرى اليابانى أرخص من الأوروبى ..
بالدليل الكورولا فى نيو زيلاند اعلى فئة فيها ب27 ألف دولار ... البرافو أول فئة فيها ب35 ألف دولار ...

الفيات يستحق سعره .. و يستحق و يستحق ...

اقتباس:

---

المشاركة الأصلية كتبت بواسطة samcar

كتير من العربيات الجديده اللى منزلينها 1400 سى سى - طبعا هم فى الطراوه لان ثبت ان اكتر عربيات مبيعا فى مصر هى ال 1600 - المستهلك اعتقاده ان ال 1400 مش مناسب للتكيف ولا العزم- طيب التوكيل الحلو مش يتصرف لا طناش- ماشى واحنا كمان طناشين

---

فيات معندهاش محركات بنزين 1600 .. كل المحركات 1400 ...

و السبب إن فيات تبحث دائما عن الإقتصادية فى التشغيل ... فى طرازات فيات ..

و لو عايز بقى تميز إركب ألفا أو لانشيا ... دول معمولين لناس مايهمهومش الفلوس!

اقتباس:

---

المشاركة الأصلية كتبت بواسطة relentless_mayhem

مش أرخص من الأوروبى ... لانها زي الأوروبى .. يعنى الكوردبا و اللينيا نفس الفئة و سعرهم واحد ... الإتنين النسخة السيدان من السوبر مينى كار ... يعنى نفس الخامات و نفس كل حاجة من السوبر مينى كار فا مفيش مبرر لرفع سعرها ...

و الإتنين سعرهم فى نفس رينج التيدا و السيتى و الياريس ...

لكن البرافو مثلا فى نفس سعر الفوكاس و الليون و الجولف 5 و الأسترا ... و سعرهم فى نفس رينج الكورولا و السيفيك ..

و طبعا .. اليايبانى غالى فى مصر بس ... فى الدول الأخرى اليابانى أرخص من الأوروبى ..
بالدليل الكورولا فى نيو زيلاند اعلى فئة فيها ب27 ألف دولار ... البرافو أول فئة فيها ب35 ألف دولار ...

الفيات يستحق سعره .. و يستحق و يستحق ...

---

ما أنا قصدي كده إنها تستحق سعرها يبقى ده مش عيب وميصحش تتقارن بالياريس أو السيتي لكن تتقارن بالتيدا ماشي (ركبتها في معرض نيسان قبل ما أركب اللينيا أول مرة في المعرض بساعة) بس لما ركبت اللينيا نسيت إسمي

[frame="9 10"]
الموضوع تحول الى شكوى من التوكيل
وانا مقتنع انة فية قصور كبير منة
علشان كدة و بعد اذن كاتب الموضوع انا عملت استفتاء فى الموضوع التالى زكرة
http://www.nilemotors.net/Nile/111171-a.html
اتمنى ان موضوعى المتواضع يكون خطوة فى طريق حل مشاكلنا مع التوكيل
ارجو المشاركة فية
[/frame]