ما رأيكم في قرار البرادعي فيما يخص الترشح للرئاسة

**A7MED_PHARMA** · 11-12-2009 04:52 PM

والله من ناحيتي

انا مع موضوع البرادعي قلبا وقالبا

الراجل عنده خبره دوليه جباره
وعقليه علميه عمليه منظمه
وعنده معرفه بامور السياسات والتعامل مع الدول
سياسي محنك
والاهم ...انه راجل لامحدود..عنده طموح
وراجل ماشي على طريق مستقيم

ولو كان حد يستاهل المنصب ده في المستقبل ..يبقا هوا
عشان الواحد يقدر يرفع راسه قدام الدنيا ..ويقول أنا الرئيس بتاعي كان وكان وكان
بعكس معظم رؤساء الدول الحاليين او حتى السابقين
يعني
مفيش دوله كان لها رئيس عالم ..او رئيس معاه شهادات ضخمه في العلوم والخبرات السياسيه
فاهمني
عاوزين نسبق الي حوالينا بقا
ولو سبقناهم في دي
يبقا جووووووووووون

**mahfouz1983** · 11-12-2009 05:08 PM

اولآ يا جماعه الراجل محترم جدآآآآآ بعدين المرحلة الي هيمسكها هتكون مرحلة انتقالية الراجل معتدل وشخصيه دوليه معروفه ولها باع في النشاط السياسي الدولي وغير كدا شخصيه محكمه السياسه بمعني انه معروف بالنسبه لامريكا واسرائيل وراجل مكير وزكي جدآآآآآآآآآآآآآآآآ وشخصيه قويه جدآ وياريت فعلآ يقدر يكون رئيس مصر القادم

**aly_hosny** · 11-12-2009 05:31 PM

المشاركة الأصلية كتبت بواسطة itsonlyme

وجمال عمل ايه في دنيته عشان نمسكه الرئاسة؟!

عمل كتيير
على الاقل انا شايف انه نشط سياسيا وحابب النشاط بتاعه
وبعدين انا مرشحتوش عشان جماله انا رشحته لانه الاصلح في ال الناس بترشحهم
ورشحت لنفسي حمدين صباحي للرئاسة لان الراجل دا لما اسمعه بيتكلم بتمزج على الاخرررررررررر

المشاركة الأصلية كتبت بواسطة wahba87

انا مع البرادعى

فى خطوة مهمة يا جماعة دلوقتى هى استخراج البطاقة الانتخابية , انا اكتشفت ان 90% او اكتر من الناس اللى بتعامل معاهم معندهمش بطاقة انتخابية , و للاسف انا اولهم

كل كلامنا ده (سواء مؤيد او معارض للبرادعى) ملوش اثر ملموس الا بوجود البطاقة الانتخابية

انا الحمد لله طلعتها وعمال اقنع اهلي واصحابي يطلعوها
بس كل ماحد يشوفها معايا ويلاقيها زي ورق اللحمة ومكتوب عليها ان ال مش هيروح ينتخب بيدفع غرامة بيتراجعو

**itsonlyme** · 11-12-2009 06:05 PM

المشاركة الأصلية كتبت بواسطة aly_hosny

عمل كتيير
على الاقل انا شايف انه نشط سياسيا وحابب النشاط بتاعه
وبعدين انا مرشحتوش عشان جماله انا رشحته لانه الاصلح في ال الناس بترشحهم

يا أستاذ علي أنا مش ح أرد على الكلام ده. لأني أول ما قرأته (ولما بقرأ كلام زيه من شباب الحزب) دمي بيفور.

المشاركة الأصلية كتبت بواسطة aly_hosny

ورشحت لنفسي حمدين صباحي للرئاسة لان الراجل دا لما اسمعه بيتكلم بتمزج على الاخرررررررررر

متفق معاك تماماً. حمدين صباحي يتحدث بلغه بليغة ومنطق سليم. رغم أني مش ناصري (وأعتقد ان حضرتك كمان مش ناصري) بس الرجل يستحق الاحترام والاعجاب. كلامك عنه أكدلي انك مش من شباب الحزب المُغيب (بس برضو دمي فار من الكلمتين اللي فاتو)

**beautiful0mind** · 11-12-2009 06:19 PM

المشاركة الأصلية كتبت بواسطة aly_hosny

انا الحمد لله طلعتها وعمال اقنع اهلي واصحابي يطلعوها
بس كل ماحد يشوفها معايا ويلاقيها زي ورق اللحمة ومكتوب عليها ان ال مش هيروح ينتخب بيدفع غرامة بيتراجعو

ممكن حضرتك تفصيل استخرجها بظبط ومنين

**meza** · 11-12-2009 06:36 PM

كنت قريت مقالة للرد على البرادعى كان كتبها أسامه سرايا فى الأهرام الجمعة اللى فاتت .... منتهى التناقض لأن نفس الكاتب المحترم كان بيتغنى بأبناء مصر اللى شرفوا إسمها بره زى البرادعى و إنجازاته و كفاحه بره مصر .... المهم المرة دى أسامه سرايا طلع فيه القطط الفطسانة .... و طلعه مريض نفسى فى الأخر و إنه كان الأخير على دفعته لما إتعين فى وزارة الخارجية و عنده جنسيتين و موالى لأمريكا و ميعرفش حاجة عن مصر و و و و ...... !!!
و دى كانت بس البداية ...

فمفتكرش هيسيبوه فى حالة ... لأنهم عارفين كويس إنه لو نزل قصاد جمال ولا أى حد من قطط الحزب الوطنى هيكتسحه ... فأعتقد إنه هيتعرض لحملة تشويه رهيبة لو دخل فى الجد و قرر ينزل الإنتخابات فعلاً.

ربنا يعينه ... لأنه فعلاً شخص محترم

**wesam_salom** · 11-12-2009 06:58 PM

انا مع التغيير

ولو حتى مسكها بوحه او عوكل

بس نفسى احس ان فيه جديد

ولما الحاكم هيعرف ان الناس هتقيمه وممكن تغيره

هيدور على مصالحهم

**M.Abdelshafi** · 11-12-2009 07:07 PM

الحلقه دى للدكتور محمد البرادعى مع منى الشاذلى بيتكلم فيها عن منصبه و تصوره لمستقبل مصر
ياريت الناس اللى متعرفش حاجه عنه غير الكلام الى الحزب الوطنى بيردده يتفرج عليها هى الحلقه أكتر من ساعه بس تستحق المشاهده

[youtube]http://www.youtube.com/watch?v=7hvQ3GRKlYM[/youtube]
تانى حاجه بالنسبه للبطاقه الانتخابيه ايه هى خطوات استخراجها

**amrbakly** · 11-12-2009 07:09 PM

طيب خلونا نخرج شوية من فكرة هو متاح ترشيحة ولا مش ممكن لأن لو تفتكروا المرة اللي فاتت الدستور اتغير قبل الإنتخابات بأربع شهور يعني الحمد لله في مصر انت دائما عايش في مفاجأت اخترنا لك

أولا خليني اقول أن أكتر شئ غريب فعلا خلي فمي كاد يتحول لنفق شبرا من الدهشة هو إقتراح علي بترشيح حمدين صباحي ! يعني مش حقولك انة معروف عنة ان سبق و حصل علي فلوس من ليبيا من سنتين بالظبط عن طريق أحمد قذاف الدم، ولا حقولك ان اسمة ذكر في قوائم كوبونات النفط بتاعت صدام حسين، لكن حسألك هو حمدين عمل اية في اية؟ دة مشهور عنة في دايرتة انة راجل نحس مفيش بيت في دائرتة دخلة إلا حصلت فية حالة وفاة ! (الحكاية دية بجد و ربنا)

كمان بالنسبة لموضوع الخبرة السياسية خلينا نتكلم جد، هو في رئيس من كل اللي حكموا مصر كان عمل اي حاجة قبل وصولة للسلطة بإستثناء أن بعضهم كان ناشط سياسي شوية زي ناصر و السادات، يعني مثلا محمد نجيب كان رجل عسكري و بس، مبارك كذلك رجل عسكري و لن اخوض كثيرا في أسباب إختيار الرئيس السادات لمبارك كنائب رئيس أعتقد كلكم سمعتوها و قرأتوها، و بعدين هو احنا حنتكلم عن مصر بس لية، يعني بوش مكانش اكتر من أنة محافظ (حاكم ولاية تكساس، انا عارف ان الولايات في امريكا جمهوريات نظرا لكثافتها السكانية العالية و تكساس لوحدها تقريبا مساحتها ضعف مساحة مصر)، أوباما محامي ثم عضو مجلس شيوخ لمدة سنتين، ميركل، شرودر، بلير، نيلسون مانديلا و لو عدينا في القايمة حنلاقي معظمهم

بمعني أننا لا حنلاقي مرشح رئاسة خبرة 10 سنين في حكم دولة تانية، ولا حنلاقي مرشح رئاسة فابريكة برة و جوة و استعمال طبيب (قال يعني مفيش طبيب بيأمرك ولا بيخمس ولا بيشد و بيحرق)

كمان في نقطة مهمه و هي اننا بنشوف مرشح الرئاسة برضة في اطار دولة الفرد الصمد ! يعني احنا بنقول تعديل دستور و دستور جديد و دولة مؤسسات و بتاع، لو وصلنا للدولة دية حيبقي كل اللي مطلوب رئيس كل اللي عندة معرفة معقولة بعلم الإدارة و بعض المهارة السياسية لأن اصلا باقي المؤسسات بتعمل شغلها و الرئيس ما هو إلا منسق عندة مستشارين و خبراء و برلمان بيحاسبة علي كل مليم بيصرفة و كل قرار سياسي بيعملة، وقتها بجد لو جبنا فكهاني و عملناه رئيس جمهورية حتبقي الدنيا ماشية برضة

و بعدين القضية نعرف نجيب واحد اصلا و نعرف نمشية (مش لازم عزرائيل يبقي هو قوة التغيير السياسية الوحيدة يعني !) و بعدين اية المشكلة نجيب واحد بطيخة و يغلط و يتعلم و احنا كمان نتعلم معاه، هو في حد بينزل من بطن امة متعلم يعني ؟

احنا في الديموقراطية أطفال و لسة محتاجين نتعلم و نعرف اكتر و بالتجربة و الخطأ حنتعلم نختار صح

انا شايف في النهاية أن النقاش كويس جدا و كويس اننا نهتم و منبقاش متفرجين و انا حعمل موضوع منفصل عن إذاي تعمل بطاقة إنتخابية