كنت ماشى بالعربية فى امان الله وفجأة ظهر امامك اعوز بالله حاجة لبسة ابيض وحواجز حديد وناس مستنياك رزق وجيلهم اية الى حصل معاك :khd:
عرض للطباعة
كنت ماشى بالعربية فى امان الله وفجأة ظهر امامك اعوز بالله حاجة لبسة ابيض وحواجز حديد وناس مستنياك رزق وجيلهم اية الى حصل معاك :khd:
كنت جاى من الغردقة والسرعة على الطريق 110 من بوابة الغردقة الى الزعفرانة مدخل السويس كنت ماشى 135 ولقيت كمين ادامى اغلق الحاجز ادامى قلت انا عملت نصيبة لقيت الظابط طلب الرخص مغالفة سرعة زيادة فى عربية كانت جاية وريا طلب منة الرخص سرعة زيادة سئلة عن سرعة الطريق قاله 80 على الرغم ان كل اليفت الى فى الطريق مكتوب عليها 110 ازاى
المهم سمعت فى الراديو بتاه الامين ان فى عربية رقم كذا سرعتة 120 كنت بتحرك بالعربية بعد ما دفعت لاحظت فى المريا العربية الى مبلغ عليها ان سرعتها 120 عدت من الكمين بدون مشاكل وكان مفيم وعامل شغل فى العربية اكيد ظابط ما هية البلد ديت كدة مش هتنطف ابدا:36_1_40[1]:
موقف لسه حاصلي من يومين كنت رايح بورسعيد ومعايا اسرتي وماشي علي الطريق الدولي وكنت ماشي ورا عربيه بولو راكبها واد روش كده وعلشان الدولي طريق سئ جدا واول مره امشي عاليه وكان بتاع البولو حافظ الطريق فكان ماشي 170 وانا وراه لازق فيه والطريق فاضي فاجئه خير اللهم اجعله خير لقيت ناس لبسه ابيض في ابيض وعربيه بيضه وقراطيس حمرا قولت بس اجهز 150 جنيه المهم وقفت البولو وسحبو الرخصه وجم عليا جري لقيت الظابط اللي واقف صاحبي وصاحبي جدا كمان وكنت بفكر اتصل بيه قبل ما دفع الغرامه تخيلو بقي بتاع البولو كان ايه منظرو
ابيض فى ابيض يبقى صيف
ابقى شغل التكييف
لو اسود فى اسود ابقى اتغطى كويس :)
طيب بأمانه ده يرضى ربنا اتنين يعملوا نفس المخالفة واحد يدفع فلوس والتانى بشرب شاى أنا عارف انها مش ها تيجى عليك وأنا لو كنت مكانك كنت ها عمل زيك واشوف حد اتصل بيه بس فعلا طول ما البلد كده ربنا مش هايبركلنا ابدا والواحد لو حاول يمشى صح لوحده هيبقى عبيط ومش ها يعرف يأخد حقه
خالى عربيته 3 ارقام بس
دخلنا كمين خالى بيد يله الرخص
مرضاش يخدها وقاله اتفضل ياباشا
وطبعا كاسرين سرعة
هي حظوظ أولا .. وثانيا .. ممكن ظابط كويس وممكن ظابط رخم ..
عامة الكوسا بتعمل شغل تمام .. معرفة أو فلوس أو ظابط جيش :)
ويا أخ zwawy
المثل بيقول
لو نيلك يا مصر صلصة ميكفيش الكوسا اللي فيكي هههههههه
كنت راجع من القاهره لدمياط ووقفني اخوانا البعدا وماكانش معايا لا بطاقه ولا رخص ولا اي حاجه في الدنيا نسيتهم في البنطلون قلت للظابط انا اروح اجيب البنطلون واجي قعد يضحك واتقلب الموضوع تهريج واتعرفنا ببعض وسابني اروح ومازلنا اصحاب للان .
اتعملى مخالفة ب150 ج بسبب اعاقة رؤية بسبب السبحة الى على المراية وعلبة المعطر الى على التابلوة وعلبة المناديل الى على الرف الخلفى للسماعات والغريبة انة ما سالنيش عن الرخصة او اى حاجة بس علشان عند كوسة مدفعتش (قصدى واسطة)
وللعلم انا يومها كنت لابس شبشب بحر وشورت هاواى والحياة فلل وماكانش معايا حتى جندى واحد (وللعلم انا لسة ماطلعتش رخصة وباسوق بوصل مش قلتلكم عندى كوسة )كل الى كان معايا التليفون ومفتاح العربية وبس وربنا سترها
اة اللجنة دى الى قصاد هايبر وان فى مدخل الشيخ زايد
كلام جميل..طيب محدش دخل فى كميين قبل كدة بقصد او بدون !!!!؟؟
كان بالليل وفى الزراعى ودخلت على الكمين بكل سرعتى لأنى مش شايفه ورفع العساكر علي الآلي وشدوا الاجزاء كمان روحت موطى انا واللى معايا وضربت فرامل بس الحمد لله وقفت قبل المطب اللى اول الكمين جاللى الظابط شافنى مرعوب هدانى وقال لى خللي بالك ومشيت بس !!
انا حصل معايا موقف غريب بجد
كنت اشتريت عريبة لانسر مستعملة بس العربية كانت قسط وكان صاحبها لسة بيخلص ورقها من البنك لما اخد منى الفلوس وطبعا اخد رخصتها معاه المهم انا كان ورايا امتحان فى الكلية انا من بنها والكلية فى الزقازيق وقلت لبابا هروح بالعربية قالى لأ معناش رخصة ليها اصبر لحد ما الرخصة تيجى
عملت فيها نبيه وصحيت متأخر ولازم اروح بالعربية يا بابا المهم رحت بالعربية والطريق زى الفل وسرعات وتمام
واول ما دخلت الزقازيق لقيت لجنة فى ماكن بقالى 4 سنين فى الكلية مشفتش لجنة فى المكان ده (شوفوا ربنا)
المهم النظارة الشمس التكييف والتناكة بقى مقلكوش
عديت من على الكمين ومان بعديه مطب عالى اوى وانا بطلع المطب الظابط خبطلى على الشنطة وقفت
العربية كانت نمرها سوااااااااااااااااااء (سبب المصيبة)
الضابط قالى انت جايب النمر السودا دى منين قولتلو انا لسة شارى العربية من يومين قالى طب رخصك طلعتلو رخصتى وعقد العربية
بص قالى ايه ده قولتلو العقد بتاع العربية قالى اعمل بيه ايه اركنلى على جنب
روحتلو بقولو يا باشا انا ورايا امتحان عشان متأخرش وكدة قالى فين رخصة العربية
حكتلو القصة قالى انت كدة ماشى من غير رخصة تسيير
قالى انت فى كلية ايه قولتلو صيدلة (الحمد لله خلصت) قالى طيب يا دكتور فين حاجتكوم بقى مش هتظبطتنى قولتلو انا لسة طالب بس وعد لو مشتنى هجبلك اللى انت عايزو قالى طب بعد اذن يا دكتور انا هسحب رخصتك قولتلى ليه كدة بقى انت كدة موجبتش معايا قالى وربنا انا كدة موجب معاك انا ممكن اخد العربية منك واقول انك سارقها بمذاجى
قولتلو ماشى يا باشا
سحب الرخصة وادانى الوصل وقالى متنساش بقى ها
بس موقف جامد مش هنساه وبجد الواحد لازم يسمع كلام اهلو قبل ما يروح اى حتة
انا مرة كنت مسافر القاهرة وبعدين دخلت علي الكمين اللي بعد الدولي وانت داخل علي اسكندريه زراعي وكنت يادوب بعد الفجر
الأمين شاف الرخصتين والبطاقه عشان الكمين ده فيه امن دوله والمهنة مكتوبه حاصل علي بكالوريوس علوم حاسب والذكي فضل ساعه يقولي انت بتشتغل ايه وكل اما اقوله مهندس كمبيوتر يقولي يعني بتعرف في الكمبيوتر
وكان عايزني انزل اصلحلهم الكمبيوتر بتاعهم بس قلتيله انا مسافر طبعا وسبته وكملت والحمد لله كان من اسوء الأيام اللي مرت عليا في حياتي لأني يوميها جالي تقريبا كده برد في ظهري
فكرة الواحد يشفلة حاجة ممكن يصلحلهم ويسبوة يعدى:36_1_34[1]:
مرة كنت رايح عيادة علاج طبيعي في المعادي مع والدي علشان كان عنده جلسة هناك وكان والدي نايم على ظهره في الكنبة اللي ورا , المهم لقيت كمين على اول القاهرة والامين بيقولي رخصك , ليه علشان مخالفة طمس لوحات (هي اللوحات كانت ممسوحة شوية بس كانت ظاهرة مش مطموسة يعني )
المهم لقيت الظابط جه وبيبص في الرخص وقالي ليه يا ابو حميد لوحك مش واضحة قولتله انا مستلمها من المرور كده
قالي بس برضه كان لازم تدهنها علشان ممكن ظابط غلس يضايقك
وبص في الكنبة اللي ورا قالي سلامات على الحج وسلم عليه وقاله الف سلامة وخلى الأمين يرجعلي الرخص بدون ما يكتب مخالفة ..
لحد دلوقتي بدعيله والحج بيدعيله ويا رب يكون كل ظباط المرور في زوق و احترام الظابط ده ..
انا مرة كنت ع واحد صاحبى بالعربية بتاعتهم المهم صاحبى دة نازل من بتهم من غير اى حاجة وافتكر كدة واحنا قبل الكمين الى على المحور بخمس دقائق المهم على حظنا الهباب الامين يشمى كل الناس الى قدامنا وجة علينا وراح مشاور وقففنا رخص مفيش بطاقة مفيش طيب كارنية الشرطة (صاحبى دى ابوة لواء واخوء نقيب) المهم مفيش اى حاجة وخد البطاقة بتاعتى واقلى اركنولى الظابط جة كلمة من هنا وكلمن منها طيب راح مديتى البطاقة وراح مششينا ببجد ظابط محنرم اوى اوى
كنت راجع من العريش و لابس قميص ابيض بنص كم وعليه سبليت من الاكتاف وكان معايا وقتها عربيه اكسنت بيضاء اسماعيليه , داخل على كمين ولقيت فجأه امين الشرطه والعساكر اللى معاه عملوا التحيه وبيخبط على عربيه واقفه قدامه تقريبا كان بيشوف رخصها وبتستعد تمشى قاله اطلع يا بيه بسرعه وبعدين لف ناحيتى بكل ابتسامه وقالى اتفضل يا فندم حمد الله على السلامه , انا كملت الطريق وانا ميت من الضحك
مره تانيه كان معاى عربيه سيتى وبعدين حصل مشكله فى كونتاكت العربيه فأضطريت بمساعده ميكانيكى افك الزور بتاع الدركسيون ونكسر الكونتاكت وندور العربيه بسلوك زى ما الحراميه بتعمل فى الافلام , وكنت راجع من المنصوره للقاهره بالعربيه الدركسيون مفيش عليه غطا الكلاكس والتابلوه نازل منه السلوك واضحه تماما والمصيبه الاكبر ان كانت الرخصه مش بأسمى وكمان منتهيه ومفيش توكيل
مشيت الفجر علشان اتفادى الكماين ومشيت من الكورنيش هربا من كمين عبود ومكنتش اعرف الكمين اللى فى اخر كوبرى الخلفاوى , نازل من الكوبرى طاير بالعربيه وفجأه الاقى الكمين فى وشى ولو دوست فرامل والعربيه صرخت هتمسك وهبات فى القسم للصبح , الحمد لله قدرت اهدى ودخلت الكمين لقيت الظابط قام وقف وجاى ناحيه العربيه بيشاور وبعدين فجأه راح معدى الناحيه التانيه طلع كان بيكلم واحد واقف الناحيه التانيه بس ساعتها قلبى وقف لان اى حد يبص من باب السواق يشوف السلوك مدلدله هيعتقد على طول ان العربيه مسروقه :)
ههههههههههههههههههههه جامده بجد
انا هقلكم على موقف حصل معايا
كنت راكب عربيه بيجو من موقف عبود وواخد الكرسى الامامى المهم طول الطريق و انا مفهم السواق انى راجل سباك و بجرى على اكل عيشى و الدنيا قشطه معايا جه كمين كده بتاع كفر شكر فجه الظابط وبيقول بطايق بطايق فقلت للظابط المستشار محمد على فبصلى الظابط وقلى لامؤاخذه يباشا و اتفضل عدى وعدى العربيه من غير ميشوف البطايق و الكلاك الفاضى ده طبعا السواق فضل ربع ساعه مبيفتحش بقه معايا وبعدين بنكشه فى الكلام فقلى كده يباشا مش تقلى انك مستشار قلتله يعم مستشار ايه ايه دنا كنت بهيس قلى لا انتا بتشتغلنى قلتله يعم هشتغلك ليه هوا انتا عمرك شفت ظابط بيقول لمستشار ورينى بطاقتك قلى لا قلته اهو انا كنت عارف انه مش هيقلى ورينى بطاقتك او الكارنيه المهم هزار و ضحك تانى وجه كمين سندوب فى المنصوره والعربيه برضه وقفت وبنفس الفلم فالظابط قلى بطاقتك قلتله برضه فلان الفلانى قالى الكارنيه فبصيت للسواق كده ولقيته بيقلى كده يفالح اشرب بقا هيطلعوا تيت تيت ابونا النهارده فقلتله طب متجرى م نالكمين قلى انتا هتودينا فى داهيه قام اتنادل معايا و قال للظابط معلش يباشا ده مش مستشار ولا حاجه قلت فى بالى يخرب بيت ابوك انتا بوظت الدنيا قمت شاتم السواق و طلعت الكارنيه بتاعى و قلت للظابط انا عايز اعمله محضر ده كله و انا ميت على نفسى من الضحك و مش قادر امسك نفسى من الضحك وطلعت الكارنيه بتاعى طبعا الظابط برضه كان شاكك شويه لغايه مشاف الكارنيه و قالى احنا متاسفين و فضل يشتم فى السواق و بهدله و بعدين قلتله خلاص عشان انا عندى ميعاد و الناس الى فى العربيه ملهمش زنب و هوا اتعلم و السواق شكله عامل زى الاهبل بالظبط مش عارف ليتكلم و لا فاهم حاجه طلعنا من الكمين لغايه الموقف انا عمال اضحك و هوا قفاه يقمر عيش وقبل منزل من العربيه سالنى و قلى يباشا هوا انتا مستشار و بتشتغلنى ولا انتا ضارب الكارنيه قلتله لا ضاربه يفالح قام قافل العربيه و ساب الازاز و ساب كل حاجه و قعد يكلم نفسه وانا شايفه ومش قادر امسك نفسى من الضحك كل ما احى الموقف ده لواحد من زمايلى او اصحابى يموتوا على نفسهم من الضحك
طبعا عشان محدش يتلخبط فى القصه انا مستشار بجد مش ضارب كارنيه و لا حاجه
كان معايا اكسنت زمان اخويا كان بيخليني اشوف فيها كل المعجزات المهم كنت اخدتها يوم رحت بيه معهد العبور علي طريق بلبيس الصحراوي طبعا والعربيه اوتوماتيك ومهما اجيب اخر الدواسه مبتوصلش 100 وانا راجع كان في كمين وسحب رخصي وعملي مخالفه سرعه 140.. متهيقلي لو حد مكاني كان اتجننت
انا رميتلهم المفاتيح وقعدت الظابط فضل يحذرني بعدها فضلت اضحك ضحك هيستيري لما فكرت في الموقف واني لو قلته لحد محدش هيصدق فقالي بتضحك ليه قلتله اتفضل اركب العربيه او خلي حد يركبها ويجيب اخر الدواسة لو جابت اي سرعه تذكر انها مخالفه هدفع قيمة المخالفه اتنين وانا اد كلمتي قصاد كل الواقفين فضل يضحك ومصدقنيش قالي وكمان دمك خفيف قلتله لا انا بتكلم بجد المهم بعدها الامين وقف عربيه اختها والي سايقها من غير اي حاجه ركن علي جنب ونزل يكلم الظابط يشوف المخالفه كام عشان مستعجل ويعتذرله لموقف طارئ !! واتضح ان هو صاحب المخالفه بس البيه وقف علي جنب في الطريق ولبسني الحوار تقريبا .. بعدها الظابط جابلي كرسي وقعدني جنبه وحلف لاشرب شاي واروق وفضلنا نضحك عالموقف قالي انا عايز اجرب العربيه بجد قلتله انسي ومشيت بس موقف منساهوش في حرقه الدم الي كنت حاسس اني هفقد مخي فيها مش اعصابي بس
وانا في شارع بسكو مصر في السواح
جالي تليفون من عيان مسكت الموبايل وعمال اتكلم والحالة فعلا كانت صعبة , طبعا مش لابس الحزام
شوية طلع ضابط راح موقفني, طبعا بتكلم في الموبايل مع العيان, المهم طبعا مش عارف اقفل السكة
انا قلت مخالفتين على الاقل: حزام وكلام في الموبايل وكمان تناكة
الراجل فضل واقف جنبي لحاد ما خلصت مكالمة (حوالي 3 دقايق)
بقوله بص انا دكتور واللي على السكة ده عيان يعني مش عارف اقوله لأ
قلت له لو كل واحد عيان كلمني على الموبايل وانا سايق مردتش عليه يبقى انا والعيانين حنتشنبر
راح قايلي وهو بيضحك: بس يا دكتور لفظ يتشنبر ده مش بتاع دكاتره
قلت له لأ ما هو بقى بتاع دكاتره من اول السنة دي
ضحك واداني الرخصة التليفون رن, رديت على التليفون وكملت مشي واحنا هاتك يا ضحك
كان راجل محترم جدا
بجد مواقف تموت من الضحك
هههههههههههههههههههههه
حصلى موقف كنت على الدولى الساحلى وجاى بسرعه ..ومعرفش بقى الكمين ده كان كمين رادار ولا كمين مباحث المهم العربيه لونها إسود ..وكنت لابس قميص إسود ولابس النظاره الشمس..و الحاج قاعد جمبى وهو كمان لابس النظاره الشمس والحاجه كمان تقريبا الله أعلم..
الراجل كان موقف العربيه اللى قادماى ..انا جيت أعدى رسم على وشه إبتسامه بإحترام وإنحنى لقدام..مهو متصور الباشا سيادة اللواء وإبنه الباشا النقيب معديين قدامه..
طبعا الحاج طبيب والعبد لله بكالريوس هندسه..من يوميها والنظاره الشمس اللى عامله زى بتاع الضباط مش بتفارق العربيه..عدة الشغل بقى...
انا حتي الأن محدش كدرني في لجنة و اكتر من طلب الرخص و التقليب فيها مفيش
الشئ اللي لا يمكن حقبلة إطلاقا تحت أي بند هو تفتيش العربية و انصح الجميع بعدم قبول دة تحت اي بند لأنة مخالف للقانون و يتطلب إذن من النيابة لأن العربية زيها زي الشقة محتاجة إذن نيابة و لو مسكك بخمسين كيلو حشيش كل دة ملوش لزمة لأن القضية تخلص إجراءات
برضة نصيحة للأخوة أصحاب الدماغ العالية متسوقش و انت عالي حتي لو حتبات في الشارع
البيات في الشارع اكرم 1000 مرة من اهدار الكرامة من ظابط يسوي او ميسواش.
اول لما جبت الانسر الله يرحمها ولينتها كنت بخاف عليها اوى فمرة سفرت بيها الغردقة وكنت طاير يعنى 140 -150 وجيت والعيشة فل ومعايا اصحابى 3 تانى ومشغلينhouse والصوت بقا مقولكوش 4 سمعات بايونير وبانش 19 الدنيا خربانة وادخل على الزعفرانة ولاقى الكمين كله بيجرى عليا وانا مش عارف ليه ورخصك والبطايق وافتح شنطة العربية وباقى الشنط انا جوز خالتى مامور قسم وابن خالتى معايا عادى المهم دخلولنا الظابط طلع نقيب وكان شكلة فافى كدا ومش بتاع شرطة اساسا المهم لاقيته بيقول مين صاحب العربية قولتله انا
قالى ممكن تدينى cd الى انت مشغله وانا متنح وباصص بستغراب وصاحبى بيقولى عادى يافادى مفيهاش حاجة
وانا متنح لغاية لما لقته قالى خلاص خلاص قوفت بقا من التناحة قولتلة نعم
والمهم اتصاحبنا عليه واديته ال cd وجالنا الجونا تانى يوم يقعد معانا عادى خالص
ومرة كنت ماشى باليل لوحدى ومشغل الست ام كلثوم ومولع سيجارة وبفكر فى موضوع وماشى ببرود وطالع كوبرى الجامعه وانا كنت لابس شورت وفانله كات والعربية لونها نبيتى يعنى ايه
المهم الاقى اخر الكوبرى واحد واقف على الشمال كدا وبيشاور وانا عايش قربت منة ومش عارف ايه الى خلانى اعمل كدا كسرت الدريكسيون كله شمال علية لاقيتة ادلق على الجزيرة الى ف النص وناس بتجرى عليا اكتشفت انه كمين الظابط بيقولى اركن هنا جمب البوكس بيقولى الرخص قولتله ف حد يلبس شورت وتقوله رخص هى فى البيت ممكن اجيبها واجى وخلى الموبيل رهن ضحك كلمت بابا يجبلى الرخص فاقفل الكاسيت لاقيت الظابط بيقولى ليه كدا خليها شغاله علشان الواحد يتمزج قعد اضحك وجابلى شاى وطلع معرفة مصلحة
معلش يااستاذ عمرو ممكن بس اعرف سؤال بسيط
دلوقتى هيتقالك انزل من العربيه بعد ماياخد الرخص
عشان يفتشها ولا يفتشك ... حضرتك هترد بإيه بالظبط لان ببساطة ممكن يقولك اشتباه .. انا معنديش فكره في القانون فلو عندك ياريت تنورني لان الموقف دة بيحصل معايا وبيتكرر مع كل اللي اعرفهم كتير جدا طحن موت وكل حاجه تحب تقولها
فمش هقوله معاك اذن تفتيشها