تم نقل الملكية والتجديد 3 سنين واليكم التفاصيل
الحمد لله عملت نقل ملكية للعربية وجددت الرخصة 3 سنين للعربية الشاهين موديل 2004 1400 سي سي
وتم المطلوب في 3 أيام:
اليوم الأول:
في الشهر العقاري تم عمل عقد بيع ودفع الرسوم بتكلفة 840 جنيه
اليوم التاني:
بدأ في المرور بشراء شهادة مخالفات بـ 3 جنيه
ومن شباك تنفيذ الاحكام تم كتابة المخالفات والختم
وبعد كده طلعت ع النيابة دفعت وخدت الوصل وشهادة المخالفات
اليوم التالت:
طبعا في المرور بدأ بشراء نماذج التجديد 3 سنين والفحص (41 ج)
بعد كده الطفاية (121 ج) وتم اخد البصمتين والدخول ع الفحص وطلبوا مني دهان اللوحات (لسه النمر الجديدة ما نزلت بنى سويف) طلعت دهنتهم (10 ج) ورجعت تاني الفحص وومضى وختم
رحت شباك الملاكي راجع الورق قاللي اعمل التأمين الاجباري (3 سنين وشهر) (211 ج) معونة شتاء (10 ج) تصوير ورق ووصل وطابع شرطة (19 ج) والضريبة (652.4 ج) ورحت لشباك اللوح استلام وتسليم قاللي فك النمر وهاتها (طبعا خد خمسايه ومضى)
الساعة كانت حوالي 11 قال المهندس هيبص ع الورق وتعالى الساعة واحدة ونص اتنين تاخد الرخصة
رجعت وخدت الرخصة والاستكر والحمد لله
التكلفة في المرور (1067.4 ج) طبعا من غير المخالفات
قلت انقلّكم التجربة وبالتوفيق ليكم جميعا