الموضوع: قصه نجاح ..وقصص فشل(تجربه حياه)

حولت صيدله

وكان التفكير..أروح صيدله القاهره ولا الزقازيق( بلدنا الاصليه)
استقريت مع اهلي اني هروح صيدله الزقازيق

ودخلت صيدله الزقازيق...
يعني واحد المفروض واحد في رابعه طب..قاعد في المدرجات مع بنوع اعدادي صيدله...تحس انك ابوهم
بابا اشترى اول عربيه لينا كان دايوووو لانوس 99
دي صورتها
[IMG][/IMG]
المهم
أهلي كانوا لسه في كفرالشيخ ..عشان بابا مكنش لسه طلع ع المعاش..وانا رحت قعدت في بيتنا الي في البلد لوحدي..واخدت معايا العربيه..عشان اساسا بابا مش بيعرف يسوق ..ولا عاوز يتعلم السواقه.
تخيلوا بقا
شاب 21 سنه ..في بيت طول بعرض لوحده..معاه عربيه ..ودكتور
احنا اساسا من الفلاحين ..من قريه تبع الزقازيق في الشرقيه
انا كنت بروحها بس في الاجازات..فجأه لقيت نفسي مقيم فيها.
الفلاحن مش وحشين..بس طريقه تفكيرهم غالبا بدائيه ..وغالبا فاضيين يجيبوا في سيره الناس
انا طبعا كنت حديث المدينه ( اسف .. حديث القريه)
احمد راح ..احمد جه ..احمد لابس مش عارف ايه..احمد بيكلم مش عارف مين ..احمد عنده ايه ..احمد عربيته ايه..
وشغل فلاحين
طبعا اصبحت قُطب في البلد..لكل الشباب اصحاب المصالح
الي عاوز يستلف فلوس ..والي عاوزك تيجي تزف واحد صاحبه في فرح ..والي عاوز يستلف منك بدله أو جزمه أو قميص
المهم
لقيت فجأه ليا أصحاب كتير...منهم الي اخترته ..ومنهم الي فرض نفسه عليا..
انا من طبعي بتكسف اوي من الناس
يعني مثلا ..من الناس الي فرضوا نفسهم عليا ..اتنين منهم قعدوا معايا في ليله..ومش عاوزين يروحوا
انا عاوز انام ..وهما قاعدين يسمعوا فيلم ع الكمبيوتر بتاعي
فضلت صاحي جمبهم ..عشان مكسوف أقولهم يروحوا
وده طبعا غباء مني جدا..وهعلق ع الموضوع ده في اخر الموضوع ده
شوف بقا الناس قالوا عليا إيه.؟؟؟
عشان قاعد لوحدي...يبقا بتاع بنات
عشان معايا فلوس...يبقا بتاع حشيش
عشان عندي عربيه ..يعني صايع وبيلف طول النهار
كنت بروح الصيدليه بتاعة ابن عمي اقف معاه..
وعشان بكلم الناس بزوق جدا ...قالوا عني اني بتمحك في البنات (بالذات)
سبحان الله
وعشان احنا من عيله ميسوره ..قالوا عني مغرور ومتكبر


.
.
.
اول ايام ليا في البلد
كنت راجع من الجامعه-العربيه مكنتش معايا يومها-واحد شافني ع الموقف..وقفلي وركبت معاه
كان اسمه عيد..وكان سالف العربيه دي عشان فرح اخته..كانت مرسيدس حاجه وتمانين..المهم
عيد باشا نزل بينا في ترعه صرف صحي( صرف صحي)
العربيه نزلت مايله على جمبها في الطين..مايله ع الجمب الي انا كنت فيه.
انا وشي يومها اتخرشم لما راسي اتخبطت في القايم بتاع العربيه..وكل هدومي شربت ميه الصرف دي
نزلنا من العربيه ..على شط الترعه دي..وقلعت هدومي ونزلت تحت أول طرمبه ميه ..أغسل جسمي
العربيات بتاعه الخط ...تعدي..الناس تنزل تقف شويه تتفرج ع الحادثه
ونفس التعليق من كل واحد ينزل
" دي عربية السيد البرعي "
ويستغربوا شويه ..ويمشوا
محدش حتى جه يطمن ع الناس الي كانوا ف العربيه..
طبعا الفلاحين الي كانوا موجودين ساعتها ..وقفوا معانا ..وحطوا هدومي في شوال ..ولبسوني جلابيه فلاحي مقطوعه..
ومشيت بالمنظر ده لحد البيت..وقعدت ساعه تحت الدش أحك في جسمي.

بعدها بشهر واحد
دخل الشهر الكريم
كان صابح تاني يوم في الشهر الكريم..
دخلت نمت الساعه 12 بالليل...صحيت الساعه 1 على ريحه دخان شديده في الاوضه الي انا نايم فيها...المكوه كانت شغاله ( نسيت افصلها) والهدوم كان على طربيزه المكوه
الله اعلم ايه الي حصل بالظبط...؟؟!!!!!!!
المهم
صحيت كانت النار ماسكه في هدومي الي على طربيزه المكوه وفي السرير الي جمبي..جريت على الجنينه شديت خرطوم الميه..سحبته لحد الاوضه وحاولت اطفي ..النار كانت بتزيد..وانا لوحدي في البيت بالليل
الدخان بقا مالي البيت ...وصهد النار بدأ يحرق في وشي وجسمي..قلعت الهدوم الي انا لابسها( الي فوق بس ) وبليتهم ميه من الخرطوم الي في ايدي..وغطيت بيهم وشي.
الدخان كسر قزاز البلكونه الي ع الشارع ..والدخان خارج من البيت بشكل مرعب
واحد معدي بالصدفه ..شاف الدخان
الميكروفون بتاع الجامع نده ..حريقه في بيتنا
الناس اتملت ..وكسروا الابواب ودخلوا عليا وانا تقريبا كنت خلصان خالص
شالوني بره البيت وطفوها هما

.
.
.
الي يضحك بقا
بعد حادثه العربيه ..في ناس كانت بتحلف اننا كان معانا بنات في العربيه وكنا شاربين
وبعد حريقه البيت ..في ناس برضووو حلفت ان ساعه الحريقه ..4 بنات خرجوا يجروا من البيت عندي..(على اساس ان انا سوبرمان ..4 بنات مره واحده)


.خلاصه المرحله دي


اتعملت افرق بين الصاحب الحقيقي ..وصاحب المصلحه
اتعلمت انك تعمل الي انت عاوزه ..طالما انه صح..وملكش دعوه بكلام الناس عشان ماتتعبش
اتقي شر من احسنت اليه
اتعملت ان الناس بتشوف الحاجه زي ماهما عاوزين يشوفوها ..مش زي ماهي في الحقيقه

اول حاجه
أنا بشكر كل المتابعين ليا

شكرا بجد ياشباب
.......................
....................................
انا بس كنت عاوز أكمل شويه تفاصيل في إلي أنا حكيته لحد دلوقتي
.
.
يوم بعد يوم احلامنا بتتغير ...وبتموت
الواحد ياامااااااا حلم بأحلام جميله..لكن دايما ييجي الواقع يديك على قفاك..ويقولك :" انت اهبل يااااااااد ..انت بتحلم ..انت عبيط؟؟؟"
ودي مشكله
مش مشكله بس..والله ياشباب مصيبه
الاحلام اساسا هي المحرك الاساسي لافعالنا
يعني واحد اسمه أحمد خريج علوم بقا أحمد زويل .. بحلم
ونجيب بقا نجيب محفوظ ..بحلم

احنا احلامنا بقت مقتوله.

شباب انا بجد مخنوق..تعرفوا
ساعات الواحد بيخاف يحلم ..عشان مايرجعش يتحسر على احلامه
.
يعني لما دخلت طب
كنت بحلم اني –بجد – هغير وجه الطب في مصر والعالم كله.كان عندي ثقه في نفسي ملهاش حدود
دخلت الكليه ..لقيت في العملي بتاع الكليه ..ماسكين كراسه وبنرسم خلايا..وبنلونها ..والي مايجبش علبه الالوان ..بيتخصم منه درجات ف العملي
كان في زحمه مره في سكشن عملي هيستولوجي ..ورئيس القسم مش عارف يعدي من زحمه الطلبه ..راح ماسك عصايه ونزل ضرب فينا عشان يعرف يعدي
ده كان استاذ دكتور رئيس قسم .. واحنا كنا طلاب اولى طب القصر العيني
شفتوا المصيبه الي وصلنا ليها