يا ريت تفيدونى مع الاخذ بالاعتبار ان الاتنين سعرهم سبعين الف وتقفيل مصرى
يا ريت تفيدونى مع الاخذ بالاعتبار ان الاتنين سعرهم سبعين الف وتقفيل مصرى
افيو طبعاااااااااااااااااااااا اا ابعد عن غبور
انا ميال للأفيو بردو ;)
كل منهما ليه مميزته وليه عيوبه
المهم انت يناسبك ايه فيهم
انا شخصيا افضل الفيرنا وده عن تجربه لانى عندى الاثنين وبصراحه الفيرنا اسبتت وجودها معايا احس من الافيو ( اصل انا شريك فى مكتب ايجار وعندنا معظم الماركات والموديلات ) :D
لو بتاع شد و جري يبقي فيرنا1600 بجد حلوة
لو برستيج و شياكة و عائلية يبقي افيو
و الاتنين حلوين
شكلها الفيرنا لانى بحب الموتور يكون قوى بتاع العربيه وشكلها عاجبنى برده بس ايه الفرق بين ال 1600 اللى ب 70 و ال 1600 اللى 65 ياريت اعرف ايه الفرق غير الزجاج الكهربا
غالبا اللي ب 65 الف
تكييف و باور فقط ،،
اللي ب 70
4 زجاج كهربا
مرايات كهربا
لمبة ستوب خلفية
إنذار
سنتر
مفتاح ريموت (للأبواب فقط)
كاسيت cd
ساعة رقمية
كنبة خلفية قابلة للطي
دركسيون قابل لتغيير وضعه
جنوط 14 (بس مش متأكد دي في كل ال 1600 و لا في الأتوماتيك فقط)
فوج لايت
دي الحاجات اللي في عربيتي ،، مش متأكد بتنزل في كل الموديلات و لا لأ
شكرا ليكم يا جماعه
ليكم اجمعييييين ومنتنظر المزيد
عشان نبقي ما بنضللكش ،
لازم أقولك كل حاجة ،،
في رحلة البحث عن الفيرنا ،، هتسمع كلام كتير ،، تلات ارباعه غلط ،،
بس الخلاصة اللي سمعتها قبل ماشتريها من مهندس في غبور
العربية ممتازة ، موتور قوي ، عفشة ناعمة ، ثبات معقول ، أوبشنز معقولة و عملية و حمالة اسية و معمرة ،،
بس اول مابتسلتمها بيبقي فيها مشاكل بسيطة بتضبط في الضمان و الصيانة ،
عشان تكون عامل حسابك ،،
شكر ليك يا احمد وانا عارف ان اى حاجه لسه جديده بتبقى عايزة ضبط او بمعنى اصح بتلين فبيظهر فيها بعض الحاجات نتيجه ان كل حاجه بتطبع على بعضها
ده يا راجل الحمام بتاع شقتى لسه عامله من قيمه سنة وما سنكتهاش والبلاعه اتسددت من الركنة وعدم الاستعمال فده شىء طبيعى
المهم عندى انها تكون مشاكل مقبولة وبسيطه وممكن لو واحد عايز يكبر دماغه يمشى بالعربيه كده مادام مافيهاش خطورة لا عليه ولا عليها
وتاتى مرة انا بشكرك ودعواتك بقى ان ربنا يوفقنى واخد القرار لانى لسه محتار بينى زيرو كفيرنا ويابنى مستعمل وربنا يوفقنا جميعا ويدى كل واحد على قد نيته
لأ زيرو كفيرنا أو أفيو
مستعمل لأ ،،
وجهة نظري الشخصية حرام تدفع ، 70 الف في عربية مستعملة ،،
و أنا كمان رأيي من رأي Ahmed Anwer
من خلال تجربتي الشخصية مع الفيرنا1600 أقدر أقولك بعض مميزاتها وبعض عيوبها
المميزات
------
1- موتور قوي
2- سحب شديد
3-عفشة جيدة
4- تكييف قوي ( مزوتوش عن 2 في عز الصيف )
5- قطع غيار رخيصة
6- أبعاد العربية واضحة للسائق سهل التعود عليها
5- سهلة البيع
العيوب
-----
1- موتور ناشف وصوته عالي
2- التقفيل المصري غير جيد ( وسمعت إن التقفيل الهندي أفضل كتير في الفيفا)
3- الصالون مش واسع قوي
4- الباور مش خفيف
5- منتشرة قوي في الشوارع بعكس الأفيو
لا ما انا مش هادفع السبعين كلهم انا معايا مبلغ فى حدود 45 50 ف هاكمل عليه بقرض فعشان كده انا محتار بين انى اعمل قرض وده للى الناس بتقولى عليه وهو انى اجيب زيرو وبين انى ما اعملش قرض واجيب مستعمل
مع العلم ان الحمد لله القرش مش هاياثر بشكل كبير عليا بس الفكرة فى القسط اللى هايكون خمس سنين
بس انا بدات اميل للزيرو من كلامكم وكلام الزملاء على المستعمل وكلام زمايلى ان اى حد بيبع مستعمل بيبيعه عشان يجيب زيرو فربنا يسهل
وشكرا ليكم واول لما اجيبها اكيد ها ابلغكم
القرض مش القرش سورى يا جماعه
كده انتا حلتها ،،
انا كنت نفس موقفك تماما ،،
و لما نزلت ادور علي حاجات مستعملة ب 45 الف ،، كانت كلها تقرف ،،
ابسط حاجة كله يقولك فيها تكييف بس مش شغال ، عايز يتشحن بس ،،
طبعا هجص ،،
و بتكلم يأما في كوري موديلات 2000 أو ياباني قديم مديلات 95 و انا مكنتش حابب اجيب ياباني مستعمل اساسا لأن قطع غياره و صيانته غالية و علي رأي م / سبعاوي لما جبت زيرو جبت ياباني و لما جبت مستعمل جبت ريجاتا عشان الأمر ما يسلمش من خرطوم يضرب و سلك يقطع
و عموما انتا المقدم بتاعك زي المقدم بتاعي ،،
انا عملت القسط علي اربع سنين بس لإني لقيته هيفرق في الشهر 100 جنية،، عن الخمس سنين
فمادام مبلغ القسط صغير ،، قلل المدة ( 3 أو 4 سنين بس ) و كبر القسط ،، علي قد ما دخلك الشهري يسمح ،، عشان ما تزهقش و الأيام بتجري و لو ربنا كرمك و جالك فلوس ممكن تسدد الباقي بدون الفوائد و اديك شايف الفيرنا من كام شهر كانت ب 66 الف دلوقتي وصلت 70 الف ،،
مشكلة القسط الوحيدة إنه بيطمعك ،، يخلي دماغك تلعب بدل ما جيب عربية ب 70 الف قسطها 700 جنية اجيب عربية ب تسعين الف قسطها 1000 جنية و الثلاثمائة جنية مش هحس بيهم مع المصاريف ،، و ابقي جبت عربية أعلي !!!!
على فكرة عاجبنى فيك انك فاهمنى دماغك من دماغى واضح انك كنت فى نفس نفس نفس موقفى انا كمان بفكر فى الفيرنا اللى هى تكيف وباور عشان ب 65 ونفسى امسك نفسى وما اجيبش اللى ب 70 ومش عارف وقت لما اخد القرار والقرض ها اعمل ايه بس سيبك .... انت معلم برده
انا مستمتع بمتابعة الحوار المفيد واحب انضم لحضراتكم لانى فكرت كتير اوى فى ايهم افضل فيرنا والا افيو وفى النهاية قررت فيرنا وبعدين فوجئت بالفيفا ( الفيرنا المستوردة) وبصراحة اقتنعت بيها جدا جدا لانها ممتازة مما جميعه
افيوااااااااااااااااااااا ا
اة ما انا عارف يا باشا انها غليت حوالى 5 الاف وكمان الاوتوماتيك بقت ب 76 الف من بعد ما كانت ب 73 شفت بلدنا حلوة ازاى مش بيقولك عايزنها تبقى خضرا :(
بس يا جماعه مش الفيفا دى كان عليها مشاكل فى موتورها وقاله عليه كلام كتير فى الجرايد وان المستهلكين اشتكوا منها انا سامع ان ناس بتقول حلوة وناس بتقول مش قد كده وفيها مشاكل
ف ايه اخر الاخبار من وجهه نظر حضرتكم بالنسبة للفيفا
انا الاول كنت مشجع التقفيل الهندى وقلت ممكن يكون احسن من المصرى عشان عايزين يثبتوا نفسهم فى السوق ويكتسبوا ثقه الوكلاء والعملاء وبعد ما قرات الكلام اللى اتكتب من الشكوى منها قلت جايز تكون دفعه حصل فيها عيب فى التصنيع وارد جدا يا جماعه فى اى حاجه حتى لو بتشترى عربيه مفتخرة بالشىء الفولانى بس المهم هى حاليا عامله ايه مش ماضيها كان عامل ازاى المهم هل اتحسنت وبقت تمام ولا لسه زى ما هى دى اللى تفرق ودى وجهه نظرى والله اعلم
خليك في ال 1600 علي الأقل نفس موتور و فتيس الماتريكس و الإلنترا القديمة و الكوبية و موتور قوي و معمر
علي الأقل هتلاقي قطع غيارها بسهولة ،، أنا شخصيا مش شايف تقفيلها وحش ،،
بس لو بتهتم بالشياكة صالون الأفيو أشيك بمراحل ،،
اية ياجماعة انتو مش عايشين في مصر ولا اية .عندي ثلاثة اصدقاء ومايعرفوش بعض وخلال سنة واحدة اشتروا الفرنا وكلهم بيشتكوا منها وهي كالاتي الاول قالي بتحدف وواطية علي الارض والثاني قالي بتحدف وزيت الباور بينقط والثالث قالي بتحدف وناشفة جدا .يعني خلاصة الكلام الكل اجمع علي موضوع الحدفة دة والتوكيل مش عارف يحل الموضوع دة لدرجة ان اسمها بئة فرنا زوايا وانتو عاملين تقولو شعر فيها اقرصوا علي نفسكم شوية وهاتوا الافيو دة الفرق بسيط جدا وبعدين السيارة منتشرة بشكل عجيب جدا في الشارع المصري
محدهش قال شعر و لا حاجة ،،
ده الناس بكل حيادية بيقولوا العيوب قبل المميزات ،،،
و اصبر شوية علي الأفيو المحلي و انتا تسمع احلي شائعات و حكاوي عليها ،،، ده لسه مانزلتش و الشائعات ابتدت
الإنتشار العجيب بصراحة معاك حق ده كأنها بتتوزع مع الشيبسي ،، بس ده مش دليل إنها لحد ما عربية كويسة ؟
خاصة إن في مليون عربية في سعرها ، بوينتر ، ويرا،كليو ، سيريون ، أفيو ، سيينا ، باليو ، اسبرانزا و طبعا اللانوس ،،،
على فكرة انا بردة كنت فى نفس موقفك من حوالى ست شهوربين الفرنا والافيو والانوس وكنت نويت ع الفرنا وبعد ما روحت المعرض شوف اللانسر دخلت دماغى اكتر وطبعا كنت هادف اربعين والباقى قسط وطبعا فى المعرض قعدوا يقولولى كلام معسول علشان اخد اغلى فئة فى الانسر وانا بخيبتى كنت متخدر لان العربية عجبانى المهم دفعت عربون وقالولى هتستلم بعد تلات ايام ومعرفش لية بعد ما لقيت نفسى دخلت فى الجد ودفعت حاسيت ان قلبى مقبوض ومش مرتاح و معرفش لية وانا واقف فى الشباك فى البيت لاقيت عربية بونتو بتلف فى الشارع وبالامانة الواد مخلية تحفة ومظبطة قوى انا لما شفت العربية ماعرفش لية دماغى راحت علية وروحت مقلب فى جورنال الوسيط لحد ما طلعت كذة عربية بونتو واتصلت باصحابهم واتفقت وروحت شوفت عربية وارتاحتلها ولقيت نفسى روحت منفض لموضوع المعرض وقولت يا رب البنك ما يرضاش يدينى القرض علشان اقدر استرد العربون وللاسف لقيت المعرض بيقولى تعالى استلم العربية النهاردة وانا فى نفس الوقت كنت لسة شارى العربية البونتو ومروح بيها وكنت فرحان حت لما عرفت ان العربون هيروح عليا بس كان ارحم ميت مرة منهم القسط وفوايد البنوك اللى بتوصل ل 60% والحمد للة رغم ان العربية مستعملة بس مريحانى
بص يا بابشا انا شايف الانتشار ده ميزة مش عيب لو انت بتتكلم على عربيه سيدان فى رينج 70 الف انما لو بتتكلم فى 100 او 120 هاقولك مثلا سوباروا امبريزا
تانى حاجه مشاكل الحدفه دى معروفه وانا احب انى ابقى عارف عيب الحاجه اللى معايا عشان اتفاداها بالجنوط والكاوتش
ولو واطيه ممش مشكله ما كل اليابانى واطى ما انا والدى معاه صنى لما بركبها واركب اتنين ورا بتحك فى المطبات فبالنسبة ليه بره مش مشكلة
المهم اننا نعرف نعالج المشاكل لان كل حاجه ليها ميزة وعيب انا مثلا عايز موتور عفى احس بيه فعشان كده قلت فيرنا
غيرى عايز شكل حلو فيقول افيو
وبيت الفيرنا والافيو يا قلبى لا تحزن فهمت وجهت نظرى يا صاحبى
يا عم لا تحزن و لا حاجة ،،
كلهم زي الفل و عربيات حلوة ،، و مريحة ،،،،،،،، و خمس سنين هتبقي مستريح إنشاءالله ،، و تتمتع بأي حاجة تختارها
علي رأي واحد قريبي ما شاء الله عليه ،، كفاية اقولك إنه باني علي حسابه معهد أزهري و مسجد لوحه الله و عنده مدارس خاصة ،،
معاه شاهين ،، و يقدر يجيب أفخم العربيات ،،
لما نقعد نجيب سيرة العربيات يضحك بمنتهي البساطة ويقولك العربية الغالية زي العربية الرخيصة ،،
ربنا يرزقنا الرضا ........
انتا لو غمضت عينيك و سوقت اي عربية مش هتحس بفرق لحد 100 الف ،،
الفرق بيبقي في الفخامة و شكل الصالون الشيك و الحركات و الإفتكاسات و وجاهتك الإجتماعية ،،
مرة كنت عند أشرفكو بتاع الجنوط اللي في الحي السابع ، عشان أسأل علي جنوط اسبور فلقيت واحد واقف عنده بفيرنا متجنطة قلت أسأله علي أيه نظام الجنوط معاه ، المهم الراجل قاللي لأ دي مش عربيتي أنا عربيتي أوبل ،، و افتكرني بأسأله علي العربية ، قعد يشكرلي فيها و يقولي أنا بجيب بيها 190 و مش حاسس إن فيه فرق فظيع بينها و بين الأوبل و ابتسم و هوا بيقولي مش عارف ليه الواحد يجيب عربيات غالية لما ممكن يجيب عربية كويسة و رخيصة زي دي
بس خلي الألماني بره الكلام ده ،،،
شوفت الرضا و السلام الداخلي و القناعة حلوين إزاي .............
الافيو طبعا واتكل ع الله
يا جماعه انتوا فهمتوا كلامى بطريقه مغايرة انا لا اقصد ابدا الرضا والقناعه الحمد لله احنا احسن من غيرنا بكتير
انا بتكلم ان انا واحد مثلا شايف ان 70 او 65 كتير على عربيه كورى ومع ذلك يطلع عليها كلام ضدها وكلام عليها
بس دى كل الحكاية بس هى بلدك اللى بتتحكم فى الاسعار فده كل قصدى لكن الرضا والقناعة موجودين وحتى لو مافيش اى عربيه خالص ولا اى حاجه
والحمد لله على نعمه التى لا تعد ولاتحصى
يا جماعه انا والله ما قصد كده خالص انا قصدى ان رغم تمن الاتنين اللى انا مستغليهم بس دى سياسه بلدك برده بتاخد عربيات عليها كلام كتير وبسعر غالى بس دى كل الحكايه
معلض الموضوع ظهر مرتين نظرا لان النت عندى كان تقيل ومعرفتش ان الموضوع الاول اتبعت
شكرا يا أ / وائل ،،
ده مديح نعتز بيه ،، من مؤسس زي حضرتك
هاضربلك مثل تاني مادام عجبك الكلام ،،
والد صديق عزير ليا ( الله يرحمه ) أيام الكلية كان جايب Audi A4 زيرو من كام سنة ،،
و الراجل ده الصبح لازم يفطر سندوتشات فول و طعمية و هوا سايق،، و يفرش الورقة و الطحينة علي الفرش الجلد و التابلوه الجلد ،،
بنقوله يا حاج تبقي راكب أودي و تقعد تاكل فيها فول و طعمية و تلحوسها طحينة ،، الناس تشوفك تقول عليك ايه ،،
الراجل الطيب (الله يرحمه ) قالنا أنا جايب عربية عشان أركبها مش هيا اللي تركبني ،،
أنا بقه بستغرب علي الناس اللي بينزلوا اهاليهم من العربية عشان خايف لا العربية تحك في المطب ،، كأنها لو حكت هتفرقع ،، ما تتحرق العربية بس مانزلش الناس منها ، هوا أنا مش جايبها أساسا عشان الناس دي ،، لو خايف عليها للدرجة دي امشي من شارع تاني بس مانزلش الناس من العربية لحد معدي المطب !!!!!!
يا أ / أحمد محدش يقدر يتهمك بحاجة ،،
انا قصدي ايا كان اللي هتشتريه اتبسط بيه ،، و حبه ،،
انتا مش بتشوف هنا في المنتدي كل واحد بيحب عربيته و ماركته إزاي ،،
و عربيات اكتر من عادية ،،
و بيبقي شايف إن الناس الغريبة التانية دي ليه بتشتري عربيات غيرها و المصطلحات الغريبة ،، بدون تفكير ، لا وجه للمقارنة ،، فرق كبيررررر
و العربيات اللي بنكلم فيها كلها ،، أساسا عربيات بره اخرها بيجيبوها للعيال أو بيروحوا يشتروا بيها الخضار ،،
المهم اننا ربنا يوفقنا وخلاص ويبارك فى الحاجه اهم شىء البركه يا احمد فى كل حاجه وربنا يديم علنا نعمه يارب