الموضوع: والله العظيم إتخنقت

المشاركة الأصلية كتبت بواسطة ezzatfox

انا هحكى على موقفين حصلوا معايا فى توكيل غبور و الله على ما اقول شهيد
مرة و انا ماشى لقيت الكشاف بتاع نور الصالون ساقط لتحت اكن حد شدة .. و كان معايا واحد صاحبى حاجة كدة شبة الرجل الاخضر .. المهم لسة همد ايدى على الكشاف لقيتة سابقنى و بكف ايدة طراخ لقيت الكشاف ثبت و خلاص على كدة .
رحت عملت صيانة ال10000 و قلتلهم براجعوا علية و يثبتوة كويس عشان ميسقطش تانى .. لقيتهم بيقولوا دة مكسور من جوة و مش هينفع لازم تشترى واحد جديد قلت مفيش مشكلة .. رحت اسأل علية لقيت مفيش غير لون بيج و انا عايز الرمادى فقلت للمهندس خلاص سيبة كدة و انا هتصرف من برة بعد ربع ساعة لقيتة جايبلى واحد بلون عربيتى و مركبة و من غير ما يحملنى باى حاجة مع انها مش مسئولية التوكيل .
الموقف التانى كان فى صيانة ال15000 من 5 ايام بالظبط .. بعد ما خلصت الصيانة كنت نسيت اقولهم ان الانذار مش شغال .. قلت للمهندس و انا بستلم .. ندة على واحد قالة شوف العربية دى و مشى .. الفنى كشف عليها و قالى محتاجة سرينة .. قلتلة ماشى بس خلى بالك ان مش ثابت الملحوظة دى فى امر الشغل .. قالى يا باشا و لا يهمك و فى دقيقتين بالظبط كان مغير السرينة و خدت العربية و مشيت .
الكلام دة كلة فى هيونداى ابو رواش .. مع العلم انى واخد صيانة مجانية لغاية 20000 كم شاملة الزيوت و الفلتر و المصنعيات يعنى بعمل الصيانة و امشى من غير ما ادفع و لا مليم .
انا بس حبيت اقول تجربتى مع غبور عشان الناس اللى بتقول انة من اسوا التوكيلات ، و اكيد بردة ممكن حد يطلع حظة مع مهندس رخم يكرهة فى العربية و فى التوكيل .. فى كل حتة هتلاقى الحلو و الوحش بس فى الاخر السياسة العامة للتوكيل هى اللى بتحكم .

الله ينور عليك وربنا يباركلك فيها
وعلى فكره توكيل عز العرب محترم جدا" لكن محتاج شوية تعديلات وفرع تانى وهيبقى أحسن توكيل ان شاء الله .