هو انا لوحدي اللي بدرس حاجة وحاسس اني مش حاببها؟؟!!

سلام عليكم
انا هدخل في الموضوع على طول ..
انا دلوقتي في تانية هندسة غاز وبتروكيماويات
المشكلة بأى اني بيجي عليا اوقات كتير بحس اني دخلت القسم دة غلطة و الحكاية بتقلب معايا في اول كل سنة بعياط .. اه والله اول ما الترم يبدا تلاقيني عمال اعيط
ومخنوق ومش طايق اللي حواليا
تصدفوا انا اصلا مش عارف دخلت القسم دة ليه؟
انا خلصت الثانوية العامة وجبت المجموع اللي هو وطبعا عارفين بقيت الموضوع:B4_592:
انا عايز ابأى مهندس
ياصلاة الزين ياصلاة الزين:10D5C8~1107:مهندس ايه ياحبيبي
والله ما انا عارف عايز ابأى مهندس وخلاص

بس اللي فاكره كويس ان اخر حاجة كنت اتخيلها اني ابأى مهندس كيميائي
وطول عمري بحب الرسم والكمبيوتر والحكاية كانت متظبطة في دماغي اني هكون مهندس كمبيوتر بس هي جت كدة
اللي اكتشفته بعد كدة اني كنت اهبل تقريبا لما خلصت الثانوية العامة (مش عارف في حد غيري كدة ولا ايه) بس فعلا انا خلصتها ومكنتش عارف ادخل قسم ايه بعد كدة
قالولنا ان في قسم خاص في جامعة اسكندرية (اللي انا دخلته)
تقدروا تقولوا عجبني الاسم Gas and Petrochemicals
حلو الاسم مش كدة

هو فعلا كدة عجبني الاسم و بترول و طبعا الشعب المصري مايتوصاش كلام من نوعية انت هتقبض بالدولار وكلام من دة

لحد ما خلاص اقتنعت
بابا انا عايز ادخلت petro
طبعا بابا معودني على اني اختار و انيل الدنيا وميقوليش حاجة عشان مرجعش في الاخر اقوله انت اللي قولتلي
يعني اتحمل مسؤولية اختياري (اعتقد الموضوع دة ليه مزايا وعيوب)

دخلت بترو
بدانا ناخد رسم هندسي عجبتني المادة دي
اكتر مادة عجبتني
قولت لا انا مش عايز اكمل في بترو دي انا عايز ادخل عمارة
طبعا بترو دة قسم خاص وبفلوس ومينفعش احول منه للاقسام العادية غير بحوارات كتير كدة
سالت وانا في اعدادي بترو ينفع ارجع اعدادي عام تاني ؟
قالولي لا استنى السنة الجاية
قولت اشطة مش مشكلة السنة دي
عدت السنة كنت جايب في اول ترم (اللي فيه رسم هندسي) 2.07 من 4
كانت تقديرات كل المواد زي الزفت واللي ظبطني الرسم الهندسي تقريبا
ومن ساعت مابطلنا رسم هندسي وانا في الضياع الشامل
الGPA بتاعي دلوقتي 1.88 (اللهم لا حسد)

انا اصلا نفسي ارجع الثانوية العامة والوقت يقف على كدة
حاسس اني في هم على طول من ساعت ماخلصت
والناس مبتبطلش كلام
انا والدي ووالدتي مسافرين واعد عند جدتي في منطقة شعبية
وطبعا البشمهندس راح البشمهندس جة ومعاه عربية وحاجة زي الفل

واللي تيجي تسال تيتة هو في طب ولا هندسة اصلي بشوفه ماشي ببالطو
مالك انتي ماشي ببالطو ولا ماشي بأيه

مخنوووووووووووووووووووووو ق وقولت افضفض معاكو
معلش بأى طولت عليكم

انا شايف انك اخترت طريقك و لازم تكمل فيه
بس برده لازم تحب الحاجه اللي بتدرسها عشان لما تشتغل تكون متميز فيها و مش مخنوق
بتمني ليك كل الخير و التوفيق.

انا بصراحه مخلص دراسة

و حصلى موقف مشابه انا كان نفسى ادخل بترول و تعدين السويس لكن مجموعى دخلنى هندسة و جبت تقدير جيد جدا فى اعدادى و قلت احول جامعة القاهرة قسم تعدين و كنت متوقع بشكل كبييير انى هقبل لان السنة اللى قبلها اخدوا ناس بتقدير جيد... و فى الاخر مقبلتش و كنت خلاص دخلت قسم ميكانيكا قوى

الحمد لله رغم انى زعلت جدا فى اول سنه و حسيت بالفشل لاول مره فى حياتى لكن الحمد لله حبيت دراستى و تفوقت فيها و اتخرجت بتقدير و علم نافع الحمد لله

انت كمان ربنا يوفقك و تحب دراستك و تكون مميز فيها
او لو دراستك مش مريحاك نفسيا خالص و مش قادر تستمر فيها ممكن تحول لكلية تانيه و قسم اخر و الله المعين بس حرام تخسر سنتين من عمرك

الحق نفسك من الاول

اقتباس:

---

المشاركة الأصلية كتبت بواسطة ASD peugeot

انا شايف انك اخترت طريقك و لازم تكمل فيه
بس برده لازم تحب الحاجه اللي بتدرسها عشان لما تشتغل تكون متميز فيها و مش مخنوق
بتمني ليك كل الخير و التوفيق.

---

+١
بس أنا الحمد لله كنت داخل ومنشن على إتصالات وبعد ما دخلت إتصالات (حسيت الدنيا غلط) حولت كهربى قوى :dzey: وماشي فيها الحمد لله
وحب التخصص الي إنت فيه عشان تتفوق وتقدر تشتغل لإنك لو فضلت كده لما تتخرج هتعد ومش هتشتغل عشان مش حابب شغلك

ماهو انا خايف من حكاية محبش شغلي دي

ياراجل انت هتقبض بالدولار
ههههههههههههههههههههههههه هههه

على فكرة كله بيتصدم اول لما يخش الكلية ويلاقي الدنيا بتتكعبل بس عدي اول سنتين وهتلاقي الدنيا مشيت زي الفل

دي مرحلة وهتعدي
بس ذاكر انت وشد حيلك
وسيبك من فكرة التحويل دي متضيعش وقت من عمرك هتندم عليه
وكل حي بياخد نصيبه

اقتباس:

---

المشاركة الأصلية كتبت بواسطة momomedo

ماهو انا خايف من حكاية محبش شغلي دي

---

طب جربت تنزل تدريب في شركة وتشوف الجو إيه
وعلى فكرة أنا قدك في تانيه كهربى قوى

اقتباس:

---

المشاركة الأصلية كتبت بواسطة أبو صلاح

ياراجل انت هتقبض بالدولار
ههههههههههههههههههههههههه هههه

على فكرة كله بيتصدم اول لما يخش الكلية ويلاقي الدنيا بتتكعبل بس عدي اول سنتين وهتلاقي الدنيا مشيت زي الفل

دي مرحلة وهتعدي
بس ذاكر انت وشد حيلك
وسيبك من فكرة التحويل دي متضيعش وقت من عمرك هتندم عليه
وكل حي بياخد نصيبه

---

ههههههههههههه دولاااااااااااااااااااااا اااااااااااار :dzey:

وغريبة محصليش اللخبطه دي والدليل(إعدادي يدوب شعبط في الجيدجدا وفي إوله شلت ماده فرعيه وجيد وجيدجدا المواد الأساسيه وتقدير عام مقبول -حاسس الدنيا مشيه معايا عكس الناس-)

انا إتحطيت في مكانك من فترة بس انا عديت لي كذا كلية و كذا جامعة كمان.

و إتقالي كل الكلام بتاع متضيعش سنة من عمرك .. متضيعش سنتين من عمرك .. هو العمر بعزقة! بس انا شايف إن التوهان اللي بيحصل في الأول ده إستثمار لبقية عمرك تبقي عارف الطريق اللي إنت هتبقي ماشي فيه كويس .. يعني السنتين اللي راحوا دول مراحوش هدر لو حولت .. أضيع سنتين أحسن ما أضيع عمري كله بشتغل في شغلانة تجبلي الإكتئاب و أخري فيها أبقي مستوايا عادي ولا هبقي مطلوب ولا بتاع عشان أصلاَ مش طايقها .. بس انا مش شايف دي المشكلة

انا رأيي المشكلة إنك لسة مش قادر تحدد بشكل قاطع إنت عايز إيه.

معلش, فى واحد عارفه فى 6 طب و كل سنة بينجح بالعافية و مقضيها ندم انه مادخلش هندسة من الاول (رغم انه دخلها بمزاجه)
على فكرة الثانوية البريطانية igcse ينفع فيها كدة علشان محدش يستغرب

شوف انا فى كلمة اتقالتى اول ما دخلت المخروبة اللى انا فيها دى ومش حابببها من جوز خالتى عشان هو برضو كان فى نفس الموقف دة ودخل تجارة غصب عنة قالى انا مش بحب الكلية دى ولا عمرى هحبها بس طالما دخلتها ابئى احسن واحد فيها عشان دى مستقلبك

انا واقع في نفس الموضوع كنت داخل هندسه علشان ميكانيكا لاني بحب العربيات ونفسي اشتغل فيها
بس جبت جيد جداً في اعدادي والناس لعبت في دماغي دا ميكانيكا بيلم الواقعين واللي شايلين مواد ولازم ابقى بعرف ارسم وانا مبحبش الرسم
واللي يقولي مدني واللي يقول كيميا واللي يقول عماره....... وبالفعل دخلت مدني وانا في اولى دلوقتي مش عارف انا مرتاح ولا لأ حاسس اني تايه القسم مش وحش ومش حلو انا بنجح عادي بس مش مستريح حاسس ان في حاجه ناقصه وكل ما حد من اصحابي يسألني عن حاجه في العربيات واشرحلو في المواتير وانجيكشن ومايفيك و......... يقولي يا ريتك دخلت ميكانيكا معرفش الكلمه دي بتأثر فيا قوي
خلاص قربت اعيط :stink[1]:

مصطفى إنت المفروض مكنتش تسمع كلام حد يعني أنا صحابي كلهم قالولي خش ميكانيكا سيارات يبني وأعدو يزنو عليا
والدكتور بتاع الرسم قعد يزن عليا يبني خش عمارة إنت إيدك حلوه في الرسم (الأول على دفعتي في الرسم والتاني على الكليه خلال ال١٠ سنين الي فاتوا-الدكتور قلي كده بنفسة-) بس أنا كنت حابب إتصالات وبعد ما دخلتها مرتحتش ودخلت كهربى بور-وحبيت القسم ده جدا-
فنصيحة كل واحد يعمل الي هو شايفة صح لإن دي حياتك إنت وإنت الي هتشيل نتايجها طول عمرك فمينفعش تخلي حدد يحددهالك هي مش تيشيرت بتاخد رأي حد في شكلة

هو احنا مبناخترش غلط بس النظام هو ال غلط
انا وانا في ثانوية عامة قولت هدخل هندسة في البيت قالولي لا هندسة ايه ادخل علوم وصيدلة حلوة قولت لا ده رايي الا اذا كنتو عايزين تدخلوني بالعافية وبعدين لما دخلت هندسة لاقيت نفسي كاره الهندسة على التعليم بس المشكلة مش في الهندسة المشكلة في التعليم كله نظري كله نظري يكرهك في اي حاجة بتحبها يعني انا ساعة التدريب بيبقى احسن وقت في السنة وهي المادة الوحيدة ال بجيب فيها a

اقتباس:

---

انا رأيي المشكلة إنك لسة مش قادر تحدد بشكل قاطع إنت عايز إيه.

---

انت جبت من الاخر كدة ياموتورايزر

اقتباس:

---

المشاركة الأصلية كتبت بواسطة mostafa_elhussain

انا واقع في نفس الموضوع كنت داخل هندسه علشان ميكانيكا لاني بحب العربيات ونفسي اشتغل فيها
بس جبت جيد جداً في اعدادي والناس لعبت في دماغي دا ميكانيكا بيلم الواقعين واللي شايلين مواد ولازم ابقى بعرف ارسم وانا مبحبش الرسم
واللي يقولي مدني واللي يقول كيميا واللي يقول عماره....... وبالفعل دخلت مدني وانا في اولى دلوقتي مش عارف انا مرتاح ولا لأ حاسس اني تايه القسم مش وحش ومش حلو انا بنجح عادي بس مش مستريح حاسس ان في حاجه ناقصه وكل ما حد من اصحابي يسألني عن حاجه في العربيات واشرحلو في المواتير وانجيكشن ومايفيك و......... يقولي يا ريتك دخلت ميكانيكا معرفش الكلمه دي بتأثر فيا قوي
خلاص قربت اعيط :stink[1]:

---

نفس احساسي لما حد يقولي انت مدخلتش عمارة ليه

حول

اقتباس:

---

المشاركة الأصلية كتبت بواسطة Mostafa_Elhussain

انا واقع في نفس الموضوع كنت داخل هندسه علشان ميكانيكا لاني بحب العربيات ونفسي اشتغل فيها
بس جبت جيد جداً في اعدادي والناس لعبت في دماغي دا ميكانيكا بيلم الواقعين واللي شايلين مواد ولازم ابقى بعرف ارسم وانا مبحبش الرسم
واللي يقولي مدني واللي يقول كيميا واللي يقول عماره....... وبالفعل دخلت مدني وانا في اولى دلوقتي مش عارف انا مرتاح ولا لأ حاسس اني تايه القسم مش وحش ومش حلو انا بنجح عادي بس مش مستريح حاسس ان في حاجه ناقصه وكل ما حد من اصحابي يسألني عن حاجه في العربيات واشرحلو في المواتير وانجيكشن ومايفيك و......... يقولي يا ريتك دخلت ميكانيكا معرفش الكلمه دي بتأثر فيا قوي
خلاص قربت اعيط :stink[1]:

---

انا تقريبا زيك بالظبط كنت داخل هندسة عشان ميكانيكا و لكن عشان والدي و عمي مدني فطبعا من اول اعدادي الزنننننن اشتغل عشان ادخل مدني و فعلا دخلت مدني و كنت اول ترم مبسوط و عادي لحد مرحت تدريب و شفت الشغل علي الحقيقة ماشي ازاي و التعامل مع العمال و حرقة الدم بصراحة مشفتش نفسي نهائي فيها و فضلت اربع شهور لغاية امتحانات اخر السنة في خناقات و حوارات كتير اوي مع الوالد و كل العيلة علي اساس اني حضيع سنة برضه و ان ميكانيكا عندنا صعبة جدا عكس مدني خالص بس انا كنت قررت و عشان احطهم قدام امر واقع رحت داخل الامتحنات مكتبتش كلمة و طبعا شلت السنة و الحمدلله انا في ثانية دلوقتي و رغم كل الواحد شايفه بس عمري ماندمت اني حولت و لو رجعت تاني برضه ححول فأهم حاجه تكون متاكد من قرارك و تتكل علي ربنا اما بخصوص السنين اللي حتفوتك انا كنت داخل الكلية مع 22 من مدرستي و طبعا كلنا اتفرقنا علي الاقسام بس اغلبنا في ميكانيكا المكمل بقي straight دلوقتي 4 فقط

كلنا كنا كده ..... عدي جدا

اقتباس:

---

المشاركة الأصلية كتبت بواسطة bmya

الحق نفسك من الاول

---

اقتباس:

---

المشاركة الأصلية كتبت بواسطة motorizer

يعني السنتين اللي راحوا دول مراحوش هدر لو حولت .. أضيع سنتين أحسن ما أضيع عمري كله بشتغل في شغلانة تجبلي الإكتئاب

---

+11111111111
اوعة تشتغل حاجة انت مش حاببها
انت لسة فى البداية وتلحق نفسك

اقتباس:

---

المشاركة الأصلية كتبت بواسطة yoko

مصطفى إنت المفروض مكنتش تسمع كلام حد يعني أنا صحابي كلهم قالولي خش ميكانيكا سيارات يبني وأعدو يزنو عليا
والدكتور بتاع الرسم قعد يزن عليا يبني خش عمارة إنت إيدك حلوه في الرسم (الأول على دفعتي في الرسم والتاني على الكليه خلال ال10 سنين الي فاتوا-الدكتور قلي كده بنفسة-) بس أنا كنت حابب إتصالات وبعد ما دخلتها مرتحتش ودخلت كهربى بور-وحبيت القسم ده جدا-
فنصيحة كل واحد يعمل الي هو شايفة صح لإن دي حياتك إنت وإنت الي هتشيل نتايجها طول عمرك فمينفعش تخلي حدد يحددهالك هي مش تيشيرت بتاخد رأي حد في شكلة

---

اللي حصل حصل وانا ساعات ابقى مقتنع جداً بمدني وساعات ببقى مخنوق جداً جداً

اقتباس:

---

المشاركة الأصلية كتبت بواسطة mustang69

انا تقريبا زيك بالظبط كنت داخل هندسة عشان ميكانيكا و لكن عشان والدي و عمي مدني فطبعا من اول اعدادي الزنننننن اشتغل عشان ادخل مدني و فعلا دخلت مدني و كنت اول ترم مبسوط و عادي لحد مرحت تدريب و شفت الشغل علي الحقيقة ماشي ازاي و التعامل مع العمال و حرقة الدم بصراحة مشفتش نفسي نهائي فيها و فضلت اربع شهور لغاية امتحانات اخر السنة في خناقات و حوارات كتير اوي مع الوالد و كل العيلة علي اساس اني حضيع سنة برضه و ان ميكانيكا عندنا صعبة جدا عكس مدني خالص بس انا كنت قررت و عشان احطهم قدام امر واقع رحت داخل الامتحنات مكتبتش كلمة و طبعا شلت السنة و الحمدلله انا في ثانية دلوقتي و رغم كل الواحد شايفه بس عمري ماندمت اني حولت و لو رجعت تاني برضه ححول فأهم حاجه تكون متاكد من قرارك و تتكل علي ربنا اما بخصوص السنين اللي حتفوتك انا كنت داخل الكلية مع 22 من مدرستي و طبعا كلنا اتفرقنا علي الاقسام بس اغلبنا في ميكانيكا المكمل بقي straight دلوقتي 4 فقط

---

معتقدش ان انا عندي الجرأه اني آخد القرار ده دا انا خايف اشيل ماده ما بالك لو شيلت نفسي سنه
بس عامة انا هنزل تدريب في الاجازه ان شاء الله وهشوف النظام

قرار التحويل انت اللي لازم تاخده مش حد تاني و تكون مقتنع مليون في المية ان انت عايز كدة بالنسبالي انا مكنتش مخنوق من المواد خالص انا اتخنقت من اسلوب الشغل نفسه اما في حالتك فعايز اقولك انهم 3 او 4 سنين و حيعدوا المهم بعد كدة بقية عمرك حتبقي مستريح نفسيا و لا لأ

طب اانا اختى محتاره مدنى ولا عماره وحاسه هى مش عارف ايه قالتلى انا شايفه الى معايا ف عماره تعبنين اد ايه وبيقولو المدنى احلى انا قولتله صلى صلاه استخاره وشوفى انهى الى ترتتحله اكثر بس هى محتاره
ايه راى المشهمندسين هنا انهى قسم احسن حبيت اخد رايكو

اولا : انت ماخترتش غلط ولا حاجة لأنه في الأول وفي الاخر نصيب ورزق

الحاجة التانية : انت في قسم مميز يختلف عن التعدين لأنه متخصص في البترول وغاز ... حاول تبص للموضوع من بره بص للمستقبل مجال عملك كام واحد متخصص فيه عدهم كام في السوق ... السوق توجهاته إيه سواء داخل مصر أو خارجها ... أنت في تخصص بيحصل على نصيب الأسد من الإستثمارات العالمية هو الي بيحرك إقتصاديات الدول والي بيسبب الحروب والسلام

مش كلام إنشا ولا كلام جرايد عشان أحببك في القسم ده واقع

وبالنسبة للشغل ده رزق بتاع ربنا وكل سنه مصر بيفتح فيها شركة بترول أو غاز أو مصنع بتروكيماويات جديد وده مجال تخصصي جداً مش أي حد يشتغل فيه وانت في اسكندرية بص حواليك كمية المصانع والشركات.

غير ان مجال العمل مش لازم يكون زي الي بتدرسة بالضبط ده الدنيا متشعبة أوي بعد كده

أخيرا: انا بأقولك ماتضيعش سنين من عمرك

الهندسة 5 سنين غير الجيش الي انت مش ضامن يمكن تدخل ضابط 3 سنين

وبعدين مفيش مهندس بيتخرج يقعد على القهوة إلا لو هو عايز

شوف انت متوقع تنزل سوق العمل عندك كام سنه ولو حولت عمرك هايكون كام

لسه عايز تكون نفسك وتعمل اسرة

فعلا ما تضيعش وقت كتير

وده رأيي ربنا يوفقك للخير

واسف على الإطالة

انت لو شايف انك ممكن تكمل استحمل والموضوع بيتعدل مع الوقت اما لو مش طايق القسم دة خالص حول من الاول وارتاح بجد انت حيرتنى وربنا معاك

اقتباس:

---

المشاركة الأصلية كتبت بواسطة hamed_73

طب اانا اختى محتاره مدنى ولا عماره وحاسه هى مش عارف ايه قالتلى انا شايفه الى معايا ف عماره تعبنين اد ايه وبيقولو المدنى احلى انا قولتله صلى صلاه استخاره وشوفى انهى الى ترتتحله اكثر بس هى محتاره
ايه راى المشهمندسين هنا انهى قسم احسن حبيت اخد رايكو

---

مادام بنت اظن عمارة احسن و طبعا اصعب و محتاجة خيال عالي و حب الرسم و الابتكار و مجال شغلها للبنات افضل كتير و اريح

بص .. اكيد ليك اهتمامات او مجال بيشد انتباهك .. و دة اهم حاجة

انت قلت انك بتحب الكمبيوتر و الرسم .. يبقا خليك وراهم ..

المجهود الهتعملوا مع حاجة انت حاببها هيوصلك لحاجة اعلى من لو عملت نفس المجهود مع حاجة انت مش حاببها ..

و فى نقطة لازم تاخد بالك منها .. مش شرط هتشتغل شغلانة ليها علاقة بالدرسته فى الجامعة

اقتباس:

---

المشاركة الأصلية كتبت بواسطة moe86

معلش, فى واحد عارفه فى 6 طب و كل سنة بينجح بالعافية و مقضيها ندم انه مادخلش هندسة من الاول (رغم انه دخلها بمزاجه)
على فكرة الثانوية البريطانية igcse ينفع فيها كدة علشان محدش يستغرب

---

ينفع فيها ايه بظبط ؟؟

انا كان نفسي ادخل بترول وتعدين السويس لكن مجموعي مدخلنيش ودخلت حاسبات ومعلومات القاهرة وحولت بعد اول اسبوع هندسة اسكندريه ورجعت حاسبات تاني بعديها بيومين
وعديت اول سنه بماده والباقي مقابيل وكنت بتندم كل ساعه اني فستنتش في هندسه وخصوصا لما كان حديسألني انت في كلية ايه واجوبه يقوم يقوللي دي معهد دي ولا ايه

بس بصراحه في اول سنة تالته ابتديت احب الكليه واذاكر وكنت التامن علي الدفعه في اترم الأول كمان ودلوقتي انا شغال ولازق في الكمبيوتر ليل نهار وسعيد جدا باختياري

اقتباس:

---

المشاركة الأصلية كتبت بواسطة hamed_73

طب اانا اختى محتاره مدنى ولا عماره وحاسه هى مش عارف ايه قالتلى انا شايفه الى معايا ف عماره تعبنين اد ايه وبيقولو المدنى احلى انا قولتله صلى صلاه استخاره وشوفى انهى الى ترتتحله اكثر بس هى محتاره
ايه راى المشهمندسين هنا انهى قسم احسن حبيت اخد رايكو

---

بص يا باشا لو بتحب الرسم يبقى عمارة على طول لإن البنات مش هتستحمل شغل المدني لما تتخرج تتبهدل في الكليه أحسن ما تتبهدل طول عمرها ولو مبتحبش الرسم تشوف قسم غير الإتنين دول

ما يمان الحوار انى صااحب والدى مهندس وقالو هيشغلها عندوو فالمكتب هيبقى كل شغلها ديزين جو المكتب وكده ومش هتنزل مواقع ده ع حد قوله فعلشان كده هى محتاره

اقتباس:

---

المشاركة الأصلية كتبت بواسطة HaMeD_73

ما يمان الحوار انى صااحب والدى مهندس وقالو هيشغلها عندوو فالمكتب هيبقى كل شغلها ديزين جو المكتب وكده ومش هتنزل مواقع ده ع حد قوله فعلشان كده هى محتاره

---

ماهو لو هتشتغل ديزاين يبقى العمارة أحسن ليها (هتعرف حجات أكتر عن الديزاين وهتاخد خبرة أكتر ودراسة مدني مش هتنفعها في الديزاين يعني هتاخد structure ولا خرصانة ليه:dzey:)

مدني فيها ديزاين بس من نوع تاني غير عماره خالص
يعني عماره بيراعي النواحي الجماليه والضوء واتجاه الرياح والتصميم الخارجي والداخلي يعني اماكن الغرف و الصاله وتوزيع المساحه بحيث تستفيد منها اقصى استفاده يعني الشكل هو المهم
انما مدني فيها ديزاين العمدان والكمر والخرسانه يعني كل همك ان الstructure يبقىstable ودا غالباً اللي البنات بتشتغل فيه علشان مينزلوش مواقع مع ان في بنات بتنزل مواقع
لو هي غاويه رسم وابداع يبقى عماره انما لو غاويه دراسه واستاتيكا (هي الاساس) يبقى مدني

و مين قالك انك لو دخلت القسم اللي بتحبه و اتخرجت بتقدير ممتاز هتشتغل في الشغل اللي بتحبه؟؟؟؟؟؟!!!!!!!!!!!

اقتباس:

---

المشاركة الأصلية كتبت بواسطة mohamed-saoud

و مين قالك انك لو دخلت القسم اللي بتحبه و اتخرجت بتقدير ممتاز هتشتغل في الشغل اللي بتحبه؟؟؟؟؟؟!!!!!!!!!!!

---

أهو الواحد بيعمل الي عليه

اقتباس:

---

المشاركة الأصلية كتبت بواسطة yoko

أهو الواحد بيعمل الي عليه

---

يا حبيبي ربنا يوفقك و يوفق كل اللي بيدرسوا و ان شاء الله تتبسطوا في شغلكوا ...

الهندسه عموما جميله بكل تخصصاتها ...

مهندس المستقبل اللي سأل :-)...بالنسبة ااpetro فده غني عن التعريف و ما شاء الله مجاله واسع في مصر أو خارجها و كل شركات البترول بيحكمها قانون واحد ممتاز لكل العاملين من اصغرهم لأكبر مهندس فيها.

بس أنا حبيت أقول ممكن تشتغل في حاجة مش حاببها و مع الوقت تحبها... و ممكن تشتغل في حاجة كانت بالنسبة ليك حلم و تلاقيها حاجة تانيه. و أصلا المهندس بيتنقل كتيير في شغله و بالتالي لو لاقيت فرصه عمل في حاجة مش حاببها أوي ,أشتغل و كمان شويه تروح للي بتحبه أول ما تيجي الفرصة

لازم تسأل أكتر من مهندس في مجال الperto و مش أي حد تاني. أنا عملت كده قبل ما اختار اتصالات...

اقتباس:

---

المشاركة الأصلية كتبت بواسطة kareemhisham

ينفع فيها ايه بظبط ؟؟

---

يعنى أنا كنت واخد رياضيات و أحياء مع بعض , فينفع أخش طب أو هندسة