السلام عليكم ورحمة الله وبركاته
دي أول رسالة لي لمنتداكم العظيم ولازم أبتديها بتحية حارة وصادقة لكل من أسس هذا المنتدى الرائع وشارك في نموه
حقيقي أنا من ساعة ماسجلت في المنتدى الرائع ده وانا باحاول أقرأ كل يوم شوية فيه لأن مواضيعه محترمة ونافعة جدا
لكم تحياتي

أما عن مشكلتي فهي كالتالي
سيارتي هوندا 84سيفيك خليجي مانيوال
بطارية جديدة وحالتها كويسة
بعد فك المارش وفحصه تبين أنه بحالة ممتازة من حيث جميع أجزاءه
حالة الموتور جيدة


تفاصيل المشكلة بالترتيب
السيارة بتدور الصبح من غير مشاكل
بعد مشاور لمدة ساعة تقريبا أبطل وأحاول أدور تاني ماتدورش
الكونتاكت شغال
الكاسيت والأنوار شغالة
المارش لايصدر أي صوت ولا حتى تكة الأوتوماتيك كأنه مش موجود أصلا
بعد زقة يسيرة جدا تدور العربية
وأنا ماشي بيها أبطل وأدور فأحيانا تدور وأحيانا لا

لو رحت مشوار وحصلت المشكلة وسبت العربية لمدة ساعة أو اتنين وآجي أدورها تاني تدور من غير مشاكل خالص (تقريبا بتكون بردت نسبيا)

أبعاد أخرى للمشكلة
الموديل ده مش منتشر في اسكندرية فالصنايعية بيتعاملوا مع العربية كأنها من كوكب تاني
وقطع غياره قليلة وغالية (المارش مش أقل من 300 جنيه)
أحد الكهربائية نصح بتغيير المارش فأنا بحاول أجيب واحد استعمال خارج من بورسعيد ،
وكما ذكرت حالة بتاعي كويسة جدا كما أكد لي كهربائي تاني قالي أن المارش بتاعي شبه الفابريقة وهو صنفره عموما لكن المشكلة زي ماهي، أقصد هل أنا لو غيرت المارش الوضع حيتحسن
وللا ليكو رأي تاني

ياريت حد يفيدنا في المشكلة دي لحسن الواحد بقى شكلة مش ولابد من كتر الزق ولو سمحت ياكابتن ولو سمحت يا أستاذ ممكن زقة صغنونة...صغنونة خالص والله...صراحة حاجة تكسف

وألف شكر ليكم مقدما