حان وقت التقييم
بصراحه جينا تستاهل كل خير ( اه والله ) ههههههه
1- اداء المحرك والتسارع :-
طيعا لايخفى على ملاك جينا او بيرسونا او واجا او ساجا ان المحرك اداءه كويس جدااا
واستجابة الموتور هايله مع الضغطه المناسبه للبنزين
صوت الموتور مش هتحسه وانت في وسط الزحمه ويمكن تحس ان الموتور مخنوق من الزحمه وعاوز شوية بنزين عشان يشتغل بقدرته الرائعه ويطير
لكن في الاماكن الهادئه صوت الموتور مسموع جداااا
وده مسببلي ازعاج شويه لان العاشر هادئه والموتور عصبي اوي
واكيد لو انت بتزعق في مكان هادي كل الناس هتسمعك ههههههههه
اما بخصوص التسارع فهو ممتاز جدااا
بس في حاجه مديقاني ويمكن في نفس الوقت طبيعيه
على السرعه التانيه وقبل الكيلو متر 25 العربيه مبتبقاش سريعه بالدرجه اللي انا عاوزها (يمكن انا عاوز اكتر من كدا) على فكره بالذات بعد المطب
استاذ اسامه قالي ان ساعات هحتاج اجيب اول ودا لازم فعلا عشان التسارع يبقى كويس
لكن كتسارع على الطريق من اول السرعه الاولى حتى الخامسه
انا مبسوط منها اوي اوي اوي
2- عزل السياره :-
عزل السياره مش زي عربيات كتير يخليك متسمعش اي اجه بره نهائي لا
بتسمع تخاطيف كلاكسات على ناس بتتكلم على اصوات مواتير بس بصوت هادي
يعني كأنك مشغل الكاسيت بتاعك على صوت واطي محدش غيرك هيسمعه من اللي بره العربيه
على السرعات العاليه وانت قافل الزجاج بتسمع صوت العجل وكمان لما صوت الموتور بيبقى عالي بتسمعه
وممكن يسبب ازعاج شديد لو مش عاوز تسمع صوت موتور عربيتك نهائي
يعني صوت الموتور مسموع ومفيش فيها جدال
3- العفشه والثبات :-
العفشه طبعا زي ما الكل عارف ناشفه جدا
وبالذات في خبايا الطريق زي حته عاليه او حته واطيه عين قط او مطب
لكن لو اتعاملت مع الحاجات دي بحنيه (محدش يسألني ازاي) هتلاقيها محسوسه ببساطه يعني مش هتحس انها ناشفه اوي لكن مناسبه
اما الثبات على الطريق طبعا وبلا شك ثبات جبار ما شاء الله
جينا بتمسك الطريق ملفات وغرز على سرعات عاليه وكأنها حته من الطريق
اخدت ملف على 90 تقريبا او اكتر وكان ملف صعب اوي اوي اوي
بصراحه انا خفت من الملف ده بعد كدا لكن وثقت تماما في العربيه
اللي ركب مثلا تويوتا كورولا 2005 مثلا وشاف ازاي ان العربيه بتتمايل بيك يمين وشمال في الملفات والعجل بيفضل على الارض
جينا زيها ويمكن افضل في الحته دي ليه ؟
لان في الملف جسم العربيه مال والعجل فضل مكلبش وانا كنت قاسي جدااااا على العربيه وكنت باخد الملف بغباء وكانت مره واحده ومكررتهاش
لكن المره دي كانت كفيله ان اثق في العربيه تماما واحبها اكتر واكتر
5- السياره من الداخل :-
صالون العربيه ممتاز بالنسبالي
انا واللي جمبي اعدين مرتاحين جداااا (الكراسي مريحه لكن اللي عنده الكراسي مختلفه هيحب كراسي الجين بالتعود)
الكنبه الخلفيه وسعها مناسب كان في 3 اشخاص بالغين اعدين فيها وكانوا مزنوقين شويه لكن اعدين مرتاحين ( ومش عاوزين اكتر من كدا)
الشنطه حلوه اوي وكبيره بس لسا مجربتش اني اخدت حاجات كتير فيها اوي اكون في سفر مثلا
لكن في الاستخدامات العاديه الشنطه حلوه اوي بالنسبه ليا ويمكن احسن واحسن كمان
اما الطابلوه فكل حاجه قريبه مني واماكن التخزين كتير مع اني مبستخدمش معظمها
والمخدع اللي في الكونسول مريح جدا مع اعدة الكراسي وطوله مناسب
الباركنج سنسور مفيد اوي للعربيه ومينفعش العربيه دي بالذات ميكونش فيها باركنج سنسور
علشان الشنطه بالنسبالي مش شايفها كويس وبالتعود الواحد بيقدر يركن كويس باستخدام الباركنج سنسور انما من غيره هيبقى صعب شويه
المرايات بالتعود عليها هتعرف تشوف فيها مع انها صغيرة الحجم ودي نقطه تأخد علي العربيه
والمفروض ان المرايه الشمال تبعد الطريق اكتر من كدا شويه لكن بالتعود الامور بتمشي كويس
درج التابلوه صغير وجزء منو ضيق وجزء واسع ودي حاجه وحشه وحاسس انو مفيش تناسق
لكن الحمد لله بيشيل الحاجات اللي بحطها فيه
المالتي فانكشن طبعاااا مش محتاج كلام
الكاسيت بتاعك في ايدك وانت سايق ومرتاح مفيش راحه اكتر من كدا
6- جسم السياره الخارجي والدهان :-
بعد الخبطه اللي اخدتها اللي كنت فاكر انها كبيره اوي طلعت بسيطه الحمد لله وقررت مصلحهاش
صاج العربيه قوي وفي اجزاء كتير في العربيه ان لم يكن معظمها
الكبوت برغم انه تقيل لكن في اماكن فيه ضعيفه
ودا سبب مشكله ليا لان واحد الله يسامحه نام على الكبوت ودخلت لجوه نقطتين كدا كأنك بتضغط عليها بصباعك لكن مضمون الكبوت كويس برغم ضعف بعض النقاط فيه
الدهان كويس اوي لكن اما عملت الخبطه لاحظت ان مطرح الخبطه دهان اتقشر ( مش لوحده دا بسبب الخبطه)
السؤال هنا هو طبيعي ان الدهان بيحصله تقشير ؟
مش مع الزمن لكن انا اقصد نقطة التقسير نفسها
الاجابه بمكن تكون اه لان مثلا لو سقف البيت نزل عليه ميه ومع الرطوبه بتلاقي ان الدهان بينزل كل جزء لوحده بعيد عن المحاره ويمكن دا اسمه التقشير اللي انا بقول عليه
*في نقطه كان استاذ اسامه قالي عليها
ان العربيه بعد المطب هتحتاج تجيب اول (مش كل المطبات)
وده انا لاحظته علشان العربيه كانت بتكركر ودا كان عيب سواقه مني
ياريت تاخدو بالكو من النقطه دي
* في المجمل العربيه مريحاني اوي الحمد لله
*عاوز اقول كمان اللي هينزل من البروتون عموما وهيحب يركب عربيه تانيه
لازم يركب عربيه اعلى منها علشان يكون مرتاح نفسيا
اعلى في المواصفات وفي الكماليات واعلى في الشكل
لان البروتون صفقه رابحه لكل من يشتريها
والرفاهيه اللي فيها بسعر مناسب وهي سياره مناسبه لجميع الاعمار (بروتون)
يارب التقييم يعجبكم
واتمنى اني اكون اتكلمت في كل النقاط الخاصه بالعربيه
واتمنى ان الموضوع يكون كامل والكمال لله وحده
وان نسيت شيئا فهو من الشيطان
تقبلوا تحياتي
شكرا
المفضلات