أعمل إيه بس!!!!
كل ما تطلع حاجة فى العربية ويحتار فيها الصنايعية الجهابذة ويطلعوا عينى ويخرموا جيبى ويمرمطونى مشاوير وفى الآخر متنحلش أقعد أنا أفكر فيها وأحلها
آخر موقف: كالون كبوت عربيتى بيعلق من ساعة الحادثة وممكن فى مطب يفتح لوحده وساعات أفتحه بإيدى من بره وهو مقفول!
رحت للسيد الخبير ضربه بالشاكوش اتعدل مرة واحدة ومشيت
بعد كام يوم رجع زى ما كان قام السيد الخبير شاله من مكانه وزيته وبنظرة الخبير أفصح إن الكالون فيه حته متاكله وإن دا بسبب انعدام ضمير المستوردين اللى بيستوردوا أردأ حاجة وهو اللى بيشرب تصليحها!
المهم الكبوت كان بيقفل بعد ما أدوس عليه جامد لكن أحيانا برضه كان بيفتح
النهارده رحت له وقلت له عايز حل قام برضه فاكك الكالون ورزعه رزعتين بعد ماركبه ومن ساعتها الكبوت مبقاش يقفل
وطبعا الحل هو: اشترى كالون جديد يادكتور
واشتريت
بس مارحتلوش
رحت الجراج بتاعى وفكيت القديم وركبت الجديد
نفس المشكلة بالضبط!
يعنى المشكلة مش فى الكالون ياناس من الأول!!!
قعدت أفكر لحد ما ربنا هدانى
الكالون بيثبت ب 3 مسامير على شكل مثلث: 2 فوق وواحد تحت
لاحظت إن ال 3 مش فى نفس المستوى
المسمار اللى تحت داخل لجوة عن اللى بره فمخلى الكالون مايل
كل اللى عملته إنى حطيت صامولة كبيرة (بدل ما أحط كام وردة) بين المسمار اللى تحت وصدر العربية علشان ال 3 مسامير وبالتالى الكالون يبقى فى وضع واحد عمودى مش مايل
وجربت
ماشاء الله الكالون بقى يقفل بمجرد ما أسيب عليه الكابوت
ومبقاش يفتح إلا من جوه العربية
عايز أرجع للدزمة اللى خلانى أجيب كالون جديد علشان أغير له مسامير وشه
لكن قبل ما أمشى قلت أطمن على ضغط الهوا بتاع الكاوتشات
لقيت اللى ملاهم عاملهم على 50!!!!!!!!!!!!!!!!!!!
أنا عندى مقياس ضغط هوا وأكيد الدزمة فاكر إن المقاس بيبقى عند 3 اللى هى فى ذهنه 30 وال (تيييييت) مايعرفش إن ال 3 دى قصاد ال 50 وإن ال 30 اللى هو عايزها قصاد ال 2 مش ال 3
مش عايز أروح لصنايعية
من النهارده مافيش صنايعية
أنا أحسن صنايعى فى مصر