ملحوظة غريبة في اللوجان و محتاج أرائكم في التعامل معاها

اولا السلام عليكم و رحمة الله و بركاتة

كل عام و انتم بخير " عام هجري جديد سعيد علينا كلنا بإذن الله"

طبعا انتو عارفين ان عربيتي هي لوجان MCV و أظن اني الوحيد اللي في القسم اللي معاه العربية دي ؟؟؟

المهم انا بقالي فترة بسمع صوت "ونه" بسيط و بيحصل في وقت معين
لما بكون ماشي بالعربية و بنقل من الغيار التالت عند سرعة 60 كم/س و ابتدي اروح للرابع و ازود السرعة ، عند سرعة 70 كم/س بالظبط لو انا ثبت عليها و ثبت رجلي علي دواسة البنزين بسمع صوت ونه ممش عارف ايه مصدره هل هو من الفتيس و لا من فين ؟؟؟ الله اعلم
و نفس الموضوع بيحصل عن سرعة 90 كم/س و انا عالغيار الخامس و لما السرعة بتزيد الصوت ما بيظهرش و بيختفي
يعني خلاصة الكلام ان الصوت بيظهر عندي علي لو انا ماشي بسرعة ثابتة عند سرعة 70 كم/س & 90 كم/س لكن لو انا بشد بالعربية طبيعي السرعة بيتزيد ما بيظهرش

الصوت غير مسموع تماما لو انا مشغل الكاسيت او الراديو او التكييف ، لكن لو انا سايق من سكات و الدنيا سكون و مافيش اي صوت ومش فاتح فاتح زجاج ابواب العربية بسمع الصوت و بصراحة بضايق منه :dontudear: لأني عندي عقدة من زمان من اي صوت ونه و دا من ايام العربية البيجو الله يرحمها و يحسن اليها

انا مش عارف ان كان الصوت دا موجود من زمان و انا ما كنتش بسمعه عشان بشغل التكييف في الصيف و دايما بكون مشغل الكاسيت و انا سايق العربية و دلواقتي بس اللي سمعته و لا الصوت دا لسه جديد ؟؟؟؟ بصراحة مش عارف

المهم لما رحت اعمل صيانة ال 25000 من اسبوع في مركز خدمة رينو في الأقصر قلتلهم علي الصوت دا و راحوا جربوا العربية وأكدوا كلامي و قالوا فعلا فيه صوت ونه و مصدره الفتيس
فسألتهم ايه الحل
قالولي ان اول خطوة بيعملوها في الحالات اللي زي دي بيغيروا زيت الفتيس عشان ممكن يكون خف و و هو اللي عامل الصوت دا
بصراحة اانا اتغميت في نفسي من جوا لأني حسيت انه ممكن يكون دا بداية مشكلة لا قدرالله و انا مبسوط جدا من العربية و مش عاوز اغير رأي فيها خصوصا و انا مرتاح جدا ليها و بحمد ربنا علي نعمة اختيارها لأنها بصراحة انسب عربية لظروفي من كل النواحي سواء عملية او اجتماعية

طبعا قلتلهم غيروا الزيت طالما انه ممكن يكون سبب الصوت فعلا هما غيروا الزيت و قالوا لي ان الصوت مش هيختفي مره واحدة لا دا هيبتدي يروح بالتدريج طالما الصوت دا سببه الزيت فما تستعجلش و اصبر شوية عليه عشان نتأكد و قاللولي ان نفس المشكلة دي كانت في عربية لوجان سيدان " مغربي" و غيروا زيت الفتيس و الأمور اتظبطت و قالولي انهم اول مره يشفوها في عربية لوجان روماني
انا قلت ماشي بس بيني و بينكم مش مطمن للكلام دا لني ما بثقش فيهم لأن خبرتهم لسه قليله

انا حاليا في القاهرة بالعربية بعد رحلة مكوكية من قنا - سفاجا - الغردقة - بورسعيد - القاهرة
و لسه حالا مكلم خدمة عملاء رينو 16202 و حولوني علي مهندس صيانة و لما شرحت له المشكلة قاللي لازم نجرب العربية بنفسنا عالطبيعة عشان نسمع الصوت دا و نقدر نحدد سببه و ازاي نعالجة لو هو مش طبيعي
و قاللي انهم شغالين يوم الأحد

انا بصراحة كنت ماشي بكره عالصعيد و مش عارف اخد قرار هل استنا ليوم الأحد و لا اتوكل علي الله واسافر و اجرب العربية في السفر يمكن الصوت دا يروح
ولا دا الطبيعي بتاع العربية و انا ماكنتش باخد بالي منه قبل كدا بسبب الكاسيت و التكييف و لا اعمل ايه :khd:

يا ريت لو حد عنده اي نصيحة ما يبخلش عليا بيها

يفضل حضرتك تستنّى ليوم الأحد و ما تجيبش سيرة تغيير زيت الفتيس في الأقصر ، و لو قالوا

تغيير زيت فتيس (ضمن الضمان) يبقى خير و بركة لإن ممكن الزيوت عندهم أفضل من المركز

المعتمد .

متشكر يا سيادة العقيد علي اهتمامك بالرد عليا

طيب لو انا استنيت ليوم الأحد اروح مركز خدمة المقطم و لا العبور
و ايه اخبار سعر زيت الفتيس غالي و لا رخيص


انا لما غيروا لي زيت الفتيس في الأقصر خدوا 32 جنية تقريبا ثمن 2 لتر زيت فتيس توتال

اقتباس:

---

المشاركة الأصلية كتبت بواسطة mostafabakry

متشكر يا سيادة العقيد علي اهتمامك بالرد عليا

طيب لو انا استنيت ليوم الأحد اروح مركز خدمة المقطم و لا العبور
و ايه اخبار سعر زيت الفتيس غالي و لا رخيص


انا لما غيروا لي زيت الفتيس في الأقصر خدوا 32 جنية تقريبا ثمن 2 لتر زيت فتيس توتال

---

أفضل المقطم ، هو زحمة و عايزين تبقى فوق دماغهم بس عندهم حتلاقي

جرأة إتخاذ القرار (كمركز رئيسي) .... دا إنطباعي .

لو العربية لسه في الضمان مش حتدفع حاجة .

غالبا الأحد (حتى الآن) ما عنديش إلتزامات إبعت لي رقمك على الخاص أقابل حضرتك هناك .

ازيك يا مهندس مصطفى
انا كمان رأيى انك تفضل فى القاهرة وتعمل الموضوع دا فى مركز المقطم زى ما قالك سيادة العقيد وان شاء الله بسيطة
انا كمان عندى صوت ونة ولما سالت ميكانيكى عليه قالى دا من الدبرياج
احتمال يكون نفس الصوت وان شاء الله يتظبط

تستنى طبعا و انا رأى تروح العبور هو فاضى شوية و هيركزوا معاك عن المقطم
و ابقى طمنا عملت ايه

استنى ليوم الاحد احسن

متهيقلى لو مكنتش غلطان حضرتك تقصد الهزة اللى فى دواسة البنزين والصوت بتاعها لما بيكون ال ار بى ام بين 2800 ل 3500 لفة صح كدة ؟؟؟

خليك في القاهرة و ما تجيبش سيرة حوار الاقصر و صمم ان مهندس او فني يطلع معاك تست درايف و انت اللي سايق و سمعه الصوت بنفسك

باشا بنسبه 90% بليه الفتيس والله اعلم

ربنا يسهلهك الامور وتطمنا وتطمن انت كمان:U_thin1[1]:

اقتباس:

---

المشاركة الأصلية كتبت بواسطة col. Eng. Khaled

أفضل المقطم ، هو زحمة و عايزين تبقى فوق دماغهم بس عندهم حتلاقي

جرأة إتخاذ القرار (كمركز رئيسي) .... دا إنطباعي .

لو العربية لسه في الضمان مش حتدفع حاجة .

غالبا الأحد (حتى الآن) ما عنديش إلتزامات إبعت لي رقمك على الخاص أقابل حضرتك هناك .

---

ربنا يكرم سعادتك يا سيادة العقيد
انا فعلا عملت بنصيحة حضرتك و استنيت و قلت اقضي اليومين دول في بورسعيد مع بنتي و ارجع علي يوم الأحد الصبح و انا حاليا في بورسعيد و اشتريت يو اس بي مودم إتصالات مخصوص عشان ادخل المنتدي من بورسعيد هههههههه:10d5c8~1107:
بس بصراحة انا كنت متردد اروح المقطم و لا العبور لكن طالما حضرتك هتكون هناك يبقي من حظي السعيد اني اقابل سعادتك في المقطم

بس هو انا ازاي اروح المقطم و انا داخل القاهرة من طريق الإسماعيلية و هو مركز الخدمة فين بالظبط

و متشكر مرة تاني لإهتمام حضرتك و انا هبعت لحضرتك رسالة عالخاص

اقتباس:

---

المشاركة الأصلية كتبت بواسطة alfa_we

ازيك يا مهندس مصطفى
انا كمان رأيى انك تفضل فى القاهرة وتعمل الموضوع دا فى مركز المقطم زى ما قالك سيادة العقيد وان شاء الله بسيطة
انا كمان عندى صوت ونة ولما سالت ميكانيكى عليه قالى دا من الدبرياج
احتمال يكون نفس الصوت وان شاء الله يتظبط

---

إزياك يا باشا
والله انا بدعي انها تكون حاجة بسيطة
بس هو ازاي الدبرياج ممكن يكون هو سبب الونة دي
و اشمعنا الصوت دا ما بيظهرش الا عن سرعة 70 عالغيار الرابع و 90 في الغيار الخامس

هو بس انا من فترة لاحظت حاجة برده في الفتيس و مش عارف هل ليها علاقة بالونة دي و لا لأ
لو انا جاي من مشوار بالعربية ووققفت بالعربية في اشارة او في كمين و جيت اطلع بيها تاني و اديها الغيار الأول اسمع صوت "دبة" كدا في الفتيس بس بسيييييييييييييط جدا لو انا اخدت الغيار بالراحة ما بيحصلش لكن لو جبت الغيار بسرعة بسمعة و لو دوست دبرياج مرتين قبل ما خد الغيار ما بيحصلش الكلام دا
فمش عارف ان كان فيه علاقة بين الحاجتين دول ولا لأ

عموما انا هروح التوكيل و ربنا يسهلها من عنده و يحلوا الموضوع

متشكر علي اهتمامك

اقتباس:

---

المشاركة الأصلية كتبت بواسطة elshinawy80

تستنى طبعا و انا رأى تروح العبور هو فاضى شوية و هيركزوا معاك عن المقطم
و ابقى طمنا عملت ايه

---

هو بصراحة العبور بالنسبة لي افضل لأني هكون جاي من بورسعيد و داخل القاهرة من طريق العاشر و العبور في طريقي لكن انا ملاحظ ان كل الناس بتشكر في المقطم

شكرا علي اهتمام حضرتك و ان شاء الله هبقي احكي لكم علي اللي هيحصل

اقتباس:

---

المشاركة الأصلية كتبت بواسطة bishoy02010

متهيقلى لو مكنتش غلطان حضرتك تقصد الهزة اللى فى دواسة البنزين والصوت بتاعها لما بيكون ال ار بى ام بين 2800 ل 3500 لفة صح كدة ؟؟؟

---

لا الونه زي ما انا شرحت بالظبط بعيد تماما عن الدواسات
علي فكرة موضوع هزة الدواسات دا بسيط جدا و بعد ما العربية تعمل 10000 كم هتلاقي الهزة دا راحت و مش محسوسة
العربية نعمت كتير عن الأول
اهو انا مستني ليوم الأحد و ربنا يصلح الحال

متشكر يا باشا

من طريق اسماعيلية في الاخر خالص فيه كوبري بتطلعه بينزلك شمال عند الشارع اللي فيه السندباد .... هتكمل للاخر عند السندباد و تكمل طوالي و تخش شمال ..... هيبقى سور الكلية الحربية يمينك ..... هتكمل طوالي و تكسر يمين مع السور (تخليه يمينك كمان) .... كده انت في صلاح سالم .... كمل طوالي لحد ميدان العباسية و خش شمال في شارع امتداد رمسيس ..... و بعديها طوالي لحد ما الشارع يبقى اجباري تخش يمين ..... كده انت في الاوتوستراد ..... تكمل طواااااااااالي لحد ما تلاقي تقاطع شمالك بيطلعك المقطم ..... هتخش شمال و هناك هتلاقي قبل اللجنة في اقصى يمينك فيه منزل ..... هتنزله و في اخره هتلاقي نفسك رجعت عالاوتوستراد في الاتجاه التاني ........ هتقوم كاسر شمال و نازل تاني ......

اقتباس:

---

المشاركة الأصلية كتبت بواسطة أحمد كمال

خليك في القاهرة و ما تجيبش سيرة حوار الاقصر و صمم ان مهندس او فني يطلع معاك تست درايف و انت اللي سايق و سمعه الصوت بنفسك

---

انا فعلا لما كلمتهم علي التليفون و حولوني لمهندس الصيانة كان رده لما شرحت له المشكلة انهم لازم يجربوا العربية بنفسهم عشان يقدروا يحددوا المشكلو و يحلوها

بس هو ليه كل الناس بتحذرني من اني اقول لهم في المركز اني غيرت زيت فتيس في الأقصر
علي فكرة انا غيرت زيت الفتيس في مركز خدمة رينو المعتمد مش برا
و دا كان بناءا علي كلام مهندس المركز و الكلام دا مكتوبب في امر الشغب بتاع صيانة ال 25000 و انا معايا الورق دا و معايا الفواتير كمان

يا ريت لو فيه سبب انا معرفوش تقولوا لي عليه عشان اعمل حسابي

شكرا جزيلا

متابع باهتمام

عملت ايه النهارده لاحد يارب يكون كله بقى تمام
ان شاء الله ف انتظارك

ايه الاخبار يا هندسة وصلت لايه مع الجماعة بتوع التوكيل ؟

مستنيين رد صاحب الموضوع

السلام عليكم و رحمة اله و بركاتة


معلش يا جماعة انا آسف عالتأخير

انا لسه و اصل النهاردة العصر للبيت و لسه داخل عالمنتدي

طبعا انا الأول عملت موضوع بشكر فيه سيادة العقيد خالد علي تعبه و مجهوده معايا و فضلت انه اعمله قبل ما ارد علي اي حاجة عشان كل حبايبنا هنا في القسم هنا يعرفوا اللي حصل و يعرفوا ان معانا شخصية محترمة جدا جدا هو العقيد خالد الله يطول عمره و يعطية الصحة و العافية http://www.nilemotors.net/Nile/112865-a.html

بالنسبة لموضوعنا الأساسي
طبعا انا رحت مركز خدمة رينو المقطم و قابلنا هناك م/ عمرو ابوالفتوح و الراجل بصراحة كان ذوق جدا جدا معانا و طبعا دا بسبب سابق معرفته و علاقته بسيادة العقيد خالد اللي بصراحة عامل احلي شغل لنايل موتورز هناك
المهم العربية ما كنتش حاجز ليها ميعاد بالتليفون و طبعا اليوم دا كان زحمة جدا جدا كم عربيات بتعمل صيانة بالهبل

المهم م/ عمرو اصدر اوامره بان يتم عمل امر شغل للعربية و يستدعي مهندس الصيانة فورا لتجربة العربية بنفسه و يقول ملاحظاته

و بالفعل وصل مهندس الصيانة م/ أشرف و طلع معايا بالعربية و كان هو اللي سايق و طلعنا جربنا العربية عالطريق و بسرعات مختلفة

بصراحة و انا راكب جنبه كانت بلاقي صعوبة عشان اسمع الصوت يتاع الونه دا ومع اني لما بكون سايق بكون سامعه و فضلت اقوله اهو الصوت و الراجل مش سامع حاجة و يقولي صوت العرية طبيعي جدا و كل اللوجان كدا و العربية ما فيهاش اي اختلاف عن الطبيعي و لو تحب تجرب عربية لوجان تانية انا تحت امرك :O_stupid[1]::11: بصراحة انا قلت تمممممممممام كدا ان عاوز اجرب عربية تاني و اشوف بنفسي
بس للأسف انا مشيت قبل ما اجرب عربية بالرغم ان م/اشرف قاللي انا هجيب لك عربية و نطلع بيها و تجرب بنفسك
" بصراحة مش عارف اقول ايه " الراجل لو كان بيزوحني ماكنش هيقولي تعالا نجرب عربية تاني لولا انه متأكد انه مافيش حاجة "

المهم قاللي العربية مافيهاش حاجة و لكن انا هرفعها و اكشف عليها عشان اتأكد ان كل حاجة تمام و فعلا دخلوا العربية جوا الورشة و قعدوا حوالي ساعة ونص علي ما طلعوها و قالوا لي كل حاجة تمام و ما فيش اي ملاحظات عالعربية


بس دا كل اللي حصل

انا هحاول اخلي اي حد غير يجرب العربية و يقولي هل بيسمع اي صوت ونه و لا انا عندي تهيؤات و خيالات



عموما انا زي ما قلت الصوت ضعيف جدا و ما بيظهرش عندي الا لو انا مثبت السرعة علي 70 و انا عالغيار الرابع و عند 90 لو انا ماشي عالخامس
ولو انا فاتح زجاج الباب اللي جنبي سنة بسيط جدا حوالي نص سنتيمتر و انا ماشي بالعربية ما بسمعش الصوت ولو انا مشغل الكاسيت مابسمعش الصوت و التكييف شغال ما بسمعش الصوت


بصراحة مش عارف اقول ايه تاني
هل مثلا خوفنا من ظهور اي عيوب بالعربية بسبب انها لسه نازلة جديد في السوق المصري فكل الناس قلقانة منها
او مثلا وجود بعض الشكوي من بعض ماكي العربية بوجود ملاحظات في العربية زي رعشة الفتيس و علو صوتها مخلينا بنهلوس بيها

بصراحة انا مش عارف

لكن مجملا انا العربية الحمدلله مرياحني جدا و لما جربتها في السفر الطويل حوالي 1000 كم متواصل بصراحة ممتعة و مريحة جدا لدرجة اني بفكر اسافر بيها علي طول سواء القاهرة او بورسعيد

و ياريت لو اي حد منكم عنده اي تعليق بخصوص الموضوع دا يقوله و ينصحني باي حاجة ممكن تفيدني
و لو حد عندي لوجان و حس بحاجة من اللي انا بقوله دا يشاركنا بيها


متشكر جدا لككل من اهتم بموضوعي و بطمن كل الناس الموضوع بسيط جدا جدا و انا متأكد انه ناس كتير ممكن ما تحسش بيه لو كان فلع موجود و مش بيتهيألي

شكرا ع التقرير ياباشا وحاجه بسيطه وربنا يباركلك فيها ان شاء الله

الحمد لله انها مفيهاش حاجة و بالنسبة للعقيد خالد فهو انا مقبلتوش بس نفسي اقابله علشان الرجل ده فعلا مش ممكن ربنا يكرموا يا رب

انا بس حبيت أقول ان لازم نضع فى اعتبارنا اننا نتعامل مع الة بها العديد من الأجزاء الميكانيكية المتحركة يعنى لازم نلاقى أصوات احتكاك
و أصوات صادرة عن الحركة وأصوات ناتجة من التروس

وما دامت هذه الأصوات من المسموح به أو بمعنى أصح ليست ناتجة عن مشكلة فلابد من تحملها و التعايش معها

ثانيا بالنسبة لمشكلة الونة
يفضل الأنتظار حتى تصبح مسموعة بدرجة واضحة يعنى حد تانى يبقى سامعها معاك فى العربية لأن هذا سيساعد على التشخيص السليم و يرحمك من اللف والدوران بدون الوصول الى الحل السليم

كان فى صوت عندى فى الفيليشيا قعدت ألف و أدور و غيرت حاجات كتير جدا معظمها كان سليم و المشكلة زى ما هى
و بعد سنة و نصف لما الصوت بقى واضح الميكانيكى عرف المشكلة فين بالظبط

فعلا انا هعمل كدا هستني شوية و الاحظ الصوت هل هيزيد و لا لأ

بس انا نفسي حد يركب العربية و يجربها مكاني و يقولي ايه رأيه يمكن اكون انا موسوس ولا حاجة

او اني اركب عربية لوجان تاني و اقارن بينها و بين عربيتي

بصراحة انا ندمت اني مجربتش عربية و انا في المقطم مع ان مهندس الصيانة بنفسة عرض عليا تجربة و انا اللي استعجلت و مشيت

المشكلة اني لما بركب العربية ببتدي اطقطق و دني عشان اسمع الصوت :shyy::B4_556::,:
لدرجة اني بقيت بتخيل الصوت او ممكن اسمع صوت لعربية نقل و لا مقطورة ماشية و رايا ولا قدامي و طبعا بيبقي فيها و نة افتكره في عربيتي و اتخض بس لما بعرف انه برا العربية خالص بضحك علي روحي

بس انا عاوز اسأل سؤال للناس الي عندها خبرة
هو انا الفروض لما افصل الفتيس و اجيبه علي المور مش المفروض انه اي صوت يختفي لأنة التروس انفصلت عن الموتور ؟؟؟؟

طيب انا جربت في مره اني اوصل لسرعة ال 70 كم/س و اسمع الونه دي و رحت فاصل الغبار و جبت الفتيس علي المور و بردا الصوت كان موجود و مارحش الا لما السرعة هديت و نزلت عن ال 70كم/س

طيب هل ممكن يكون زيت توتال بتاع الفتيس خفيف و لا حاجة


طيب ممكن يكون مثلا مشكلة في بلية عجلة من العجلات ولا مستحيل لأنها لو في العجلة المفروض انها تبقي موجودة باستمرار مش عند سرعة معينة ؟؟؟:shyy:

ممكن تفكروا معايا

ريح ودانك شوية و لو فى مشكلة فعلا هتظهر نفسها بنفسها ولا تقلق