الموضوع: New Brilliance FSV Sedan

المشاركة الأصلية كتبت بواسطة amrnader

92 الف قليل على عربية صينى!! ايه وجهة نظر حضرتك، مع العلم ان فى حدود هذا السعر ممكن تشترى عربيات يابانى و كورى ليها اسمها فى السوق و تنفد بجلدك من الصينى و بلاويه.

على فكرة انا شفت العربية دية فى الشارع وحكمت عليها مباشرة من منظرها، من غير معرف اى حاجة عنها، انها وافد جديد من الصين.

أولآ قصة عربية صينى تتكرر تاريخياً
والدى كان من اول من أشتري تويوتا فى المنطقة اللى احنا فيها و الكلام دة فى اواخر السبعينات
و كان تعليق الناس : يااااااباني ؟؟؟ ، اية ياباني دة ، الحق بيعها و جيب الاسد الفرنساوي بيجو ، على الرغم ان والدى كان جايبها على اقتناع من لحظة ما شافها فى الخارج و كانت دفع خلفي و طلعت مرتفع جبلي زى الوحش ، فسأل عليها و شافها و جربها و جبها استيراد نظراً لعدم وجود وكيل لها في مصر .... و طبعاً حالياً الياباني محدش يقدر يقول علية كلمة .

فى اواخر التسعينات ظهر الدايو و الهيواندي و الكيا
كوررررررررررررري ؟؟؟؟؟ اية كوري دة ، هي كوريا بقت بتصنع عربيات
و حالياً بعد عشر سنوات بقي فى الصيني بريليلنس و اسبرانزا و ...
و نفس النغمة تتكرر ، صيييييييييييني ؟؟؟؟

و أعتقد انة بعد عشر سنوات هيبقي في هندددددددددددي

و برضة هنقول هنددددددددددددددددددي

المهم

العربية انا ركبتها في المعرض و شوفت كماليتها و التقفيل بتاعها و كان جيد جداً لدرجة انى طلبت احجزها لكن ما كنش في معلومات عن سعرها او موعد طرحها بالسوق المصري و طبعاً الكماليات اللى هاتناسب مصر عشان دي اللى بيتحدد عليها السعر
و اعتقادي الشخصي ان العربية دى لما هاتنزل السوق هتبقى الفرس الرابح لشركة البافارية .... و الايام قريبة .
ملاحظة : العربية صينى أغلبها تجميع صيني ( موتور ميتسوبيشى ، نظام تعليق الماني ، ..... الى اخرة ) بمعنى ان تويوتا بتجمع عربيتها في البرازيل و جنوب افريقيا و بتبيعها لك و في اجزاء من السيارة مصنعه في الصين ؟؟؟؟؟؟

شركة BMW عاملت اتفاقية تجميع مع شركة بريليانس بالصينحط الدقن شيل الدقن يبقي اننا في زمن التجميع للخفض الاقصي للتكلفة .

تحياتي لك

طب يا استاذ شريف، والدك لما اشترى التويوتا زمان، كان سعرها ايه مقارنة باسد البيجو فى ايامها؟؟

اكيد ارخص بالشكل اللى يخليك تتقبل المخاطرة، لكن لما تبقى عربية لسة بنت امبارح و شكلها صينى، و مفيهاش اى افتكاسات او كماليات خارقة و مع ذلك بنفس سعر العربيات اللى ليها اسمها فى السوق، يبقى ايه اللى يشد الناس ليها اساساً؟؟!!

مش عارف هتفهمنى و لا لا، بس فى عربيات من النظرة الاولى بتعرف انها صينى، بتلاقيهم سارقين حته من التصميم من هنا و حته من هناك ، يعنى مثلا العربية دية فوانيسها اللى ورا بتاعة اللانسر الشارك.

المشاركة الأصلية كتبت بواسطة amrnader

طب يا استاذ شريف، والدك لما اشترى التويوتا زمان، كان سعرها ايه مقارنة باسد البيجو فى ايامها؟؟

اكيد ارخص بالشكل اللى يخليك تتقبل المخاطرة، لكن لما تبقى عربية لسة بنت امبارح و شكلها صينى، و مفيهاش اى افتكاسات او كماليات خارقة و مع ذلك بنفس سعر العربيات اللى ليها اسمها فى السوق، يبقى ايه اللى يشد الناس ليها اساساً؟؟!!

مش عارف هتفهمنى و لا لا، بس فى عربيات من النظرة الاولى بتعرف انها صينى، بتلاقيهم سارقين حته من التصميم من هنا و حته من هناك ، يعنى مثلا العربية دية فوانيسها اللى ورا بتاعة اللانسر الشارك.

أولاً و أخيراً .... خلينا نتفق ان احنا بندردش مع بعض مش شرط انى أكون صح 100% أو العكس

انا والدي لما جاب العربية و استيراد كان تقريبا البيجو أغلي منها 500 ج و دة فارق كبير في الزمن دة .

كل قاعدة ولها شواذها ، بمعني أن زي ما في في كل حتة ناس مش محترمة في ناس محترمة ، و برضة زي ما فى شركات صيني مش محترمة في شركات محترمة و منها بريليانس و اسبرانزا ، و دى اللى يخلينا نقول في استثناء وألا توكيل محترم زى BMW ما كنش عمل معها اتفاقيات تجميع بمصانعها و بورش عملت اتفاقيات اشراف معاها ، و ميتسوبيشى كمان .

بالنسبة للتصميم ... اة انا معاك ان في عربيات صينى تصميمها الخارجي مسروق من أخري مثل BYD و النص الامامى تويوتا و الخلفي فوانيس هوندا سيتى ، و برضة بيجو و سيتروين ، و سوناتا و الاكورد ، جاكور XK و استون مارتن DB9 ، لهم تصميمات قريبة من بعض جداً يعنى الموضوع مش حكر علي الصين ، الفارق هو مدى الاقتباس الي السرقة .

المهم عشان ما نخرجش عن موضوعنا .... احنا بنتكلم علي عربيات شركة بريليانس ، شركة بريليانس منذ سنوات و هي تلجاء لمصممين عالمين للحصول علي تصميم مميز لسيارتها و منهم مكتب التصميم الايطالي بينينفارينا ، و كذلك الاستعانة بشركة بورش الالمانية في تطوير السيارة بالاضافة للاستفادة من انظمة التعليق و العفشة الخاصة بها و غيره ... يعنى من الاخر اللى عاوز اوصل لة ان شركة بريليانس بتطور نفسها لخلق شخصية و تصاميم متميزة لها مثل جالينا و اسبلندور


نيجي لموضوع السعر : هل تنكر ان احنا فى مصر نسرق علنا من التوكيلات في السعر
العربيات الصيني مش رخيصة و الاخري مش عالية ، لكن العربيات الصيني داخلة سوق جديد و بتعمل انتشار بتقليل هامش ربحها اللى هو اصلا ً مش قليل ، و هو نفسة اللى عملتة العربيات الكورى اول ما دخلت ، و شوف الالنترا اول ما نزلت بكام و حاليا بكام مقارنة بنفس فئتها في تلك الفترة سابقا و حالياً .
مثال عملى : برتون الماليزية فى مصر مكسب عز العرب في العربية الواحدة لا يقل عن 25000 الف جنية بلا مبالغة ، و دة كلام ناس عارفة اللى شغالين في التوكيل ، و غبوووووووووووور يا مان و انت معاك النترا ، و طبعاً مش هانتكلم علي المرسيدس و الجيب .

المهم اللى انا عايز اوصل لة ، انت بتتكلم على كل الصيني ، و احنا هنا بنتكلم على بريليانس ، و على فكرة انا من انصار انك تجربها و علي سبيل أخذ فكرة مش ها تخسر حاجة .
و الكلام عن الصيني مش ها يخلص ، لكن انا عايز احكى لك قصة صغيرة :

صديق لوالدى كان فى شغل في كوريا و هو هناك لفت انتباه ان التاكسي هناك اغلبة دايو لانوس و ليجانزا ، و لما ركب اكتر من مرة لاحظ الفارق الشاسع في الكماليات و المواصفات و الفخامة بالاضافة للاسم .

فسأل أحد الافراد في المؤسسة اللى كان بيعمل معاها شغل ، اية القصة .... فطلب منه الراجل مهله للاجابة .
اليوم التالي مباشرة فوجيء بأحد المسئولين عن التسويق من الشركة ينتظر مقابلتة ( شغل على مياة بيضاء ) ، و رد علي الاستفسار بالاتي :

- الوكلاء المصريين عندما يأتون نعرض عليهم السيارة و مواصفاتها و سعرها .
- يقوم الوكلاء بحساب سعر السيارة + ارباحهم = غالية و ارباحهم قليلة
- فيطلبون أزالة بعض المواصفات مثل عدد الاير باج + أنظمة الفرامل + حساسات الاضاءة و الركن + أنظمة الصوت +.......
- و يتفقون معهم على العدد و خطوط الانتاج
- يتم تصديرها الى مصر لتجد عربية فول ابشن + فول ابشن و كماليات اضافية+ نص اوبشن + عربية فاضية + و عربية اسبور

الخلاصة : سوق العربيات في مصر صبح صبح يا عم الحاج

تحياتي لك

طبعا مسألة ان الوكلاء كلهم نصابين و انهم دائما بيحاولوا يقصقصوا فى العربيات قبل ما يجيبوها اصبحت حقيقة علمية مؤكدة. المانى، يابانى، كورى، صينى كله نفس الصنف.

النقطة المهمة، ايه اللى يخلى الواحد يقبل على عربية صينى مش مضمونة لو ان مفيش فرق سعر مغرى!!

حتى لو العربية كويسة، هتقابلك صعوبة فى اعادة البيع و توافر قطع الغير.

طيب، ايه اللى حلو اوى فى العربية دية بالذات اللى يخليها افضل من كل العربيات التانية اللى فى السوق. انا شايف ان السيارة كشكل و مواصفات و امكانيات سيارة متواضعة لا تتميز عن سيارات فئتها فى حاجة.

نقطة اخيرة، البريليانس صينى متفرقش عن اخواتها و انا شفت بعينى الكبيرة بتاعتهم ( الجالينا ) مجرورة فى الشارع، و دية كانت العربية الصينى الوحيدة اللى عاجبنى شكلها الخارجى.