السلام عليكم يا رجاله
انا اسمى مايكل ماهر
وانا متابع منتدى بروتون هنا باستمرار بقالى يمكن 6 شهور باتفرج و اقرا و استفدت كتير قوى من ملاحظاتكم و مداخلتكم و قررت انى ابيع عربيتى القديمه و اجيب جين 2 2010 و فعلا بعت العربيه بخساره و الحمدلله
اللى حببنى فيها مش مجرد شكل او اداء ولكن كميه الاهتمام من قبل الاعضاء و مالكيها و ازاى بيتشاوروا مع بعض و بيفيدو بعض لمجرد المساعده مش اكتر من كده
بجد بحييكو جدا جدا على تعاونكم مع بعض و يارب دايما كده مع بعض و تبقو ايد واحده اكتر و اكتر وبروتون من خلالكم يكون ليها الانتشار الاكبر و السمعه الطيبه اللى فعلا ابتدت تتخلق فى السوق من فتره وجيزة
مع العلم انى ليا قريب شارى العربيه من اول ما نزلت من حوالى 5 سنين و عمرى ماسالته عنها خالص لخوفى منها و خوفى من قطع غيارها و من صياناتها - ولكن بعد ما شفت كلامكم و خبراتكم سألته و جوابه كان تكميلا لكلامكو - فعلا عربيه زيها زى الالمانى بفارق السعر الرهيب و كفايه انها ثابته على سعرها من 5 سنين - لا بتغلى ولا بترخص المبالغ الرهيبه اللى بشوفها فى عربيات اقل منها قدرا و مضمونا - ودى حاجة الواحد يشهد بيها للتوكيل انه مش بيستغل النقط اللى التوكيلات التانيه بتستغلها من العربيه بتتباع دلوقتى يبقى اغلى سعرها و اشيل منها - بالعكس عجبنى فيه حته العربيه تبيع نفسها و بنفس السعر و فعلا العربيه ابتدت تنتشر انتشار رهيب لانها فعلا عربيات اعتماديه جدا فى بلدنا
عاوز اقول كمان ان فى ناس كتير قوى متعرفش بروتون من اصله و بمجرد انه بيركبها بيشهد ليها انها اشد من اليابانى
ليا صاحب معاه صنى 2005 وفى مره بيقولى دى لو كنت اعرفها ساعتها كنت اشتريتها -(عن الجين 2 ) وغيره كتير وده مثال لمجرد التوضيح اد ايه هى عربيه اعتماديه
اناطولت عليكو بس انا عندى كلام كتير قوى قوى ليكم و ياريت تعتبرونى واحد من الالف المعجبين بالعربيه و بحبكم ليها و عن قريب ابقى مالك للعربيه و عضو فى Proton Club
شكرا على تعبكم و قرائتكم لموضوعى
تقبلو تحياتى / مايكل ماهر