إستفسار عن سحب السيارة

**wael_dosoky** · 19-12-2009 07:33 PM

السلام عليكم ي اخواني في المنتدي
عندي مشكلة في العربية إلي لسه شاريها شيفورليه لانوس 2010 وعامل بيها 900 كيلو لغاية دلوقتي
المشكلة هي ان سحب العربية علي النقلة الأولى والثانية ضعيف اوي فهل ده طبيعي؟ياعني الطبيعي الواحد يوصل لسرعة كام في النقلة الأولي وتكون قرأة ال rpm كام ونفس الشئ للنقلة الثانية؟

**samirayad** · 19-12-2009 08:31 PM

بما أن السياره لسه جديده
وتعتبر غريبه عليك
أعتقد الأفضل أنك تجرب عربيه تانيه من نفس الجيل
وكده تقدر تحكم على الأمور صح

**beckeryahia** · 19-12-2009 09:09 PM

النقلة الاولي لحد 25 والتانية لحد 45 ,, الكلام دة لو مش قارص طبعا ,, واعتقد ان ماتور الانوس كلة كده بس هاتتعود علية مع الوقت , ونصيحة متكبسش بنزين جاامد عشان اما تكبس بنزين زيادة عن اللزوم العربية بتتكتم من غير اي فايدة , انت مع الوقت هاتعرف انهي دوسة هي اللي تخلي العربية تجري.

**bondjames** · 19-12-2009 11:20 PM

معلهش يا جماعة أنا باسوق من 1985 - الأول فقط لتحريك السيارة من الثبات - مجرد ما تحركت لا تنتظر لتصل لسرعة 25 - غير للثانى لو قبلت و ما كركرتش - إطلع وكمل ولو حسيت صوت الموتور بيعلى منك - إديها الغيار الأعلى - وهكذا - ده على أرض مستوية - لكن لو مطلع يبقى الكلام عايز تعديل -صدقنى أنا ممكن أجيب الخامس وأنا ماشى على 50 كم/ساعة المهم إنك تريح الموتورو نفس الوقت العربية ماتكركرش وتقف منك

**SBkr** · 19-12-2009 11:37 PM

المشاركة الأصلية كتبت بواسطة samirayad

بما أن السياره لسه جديده
وتعتبر غريبه عليك
أعتقد الأفضل أنك تجرب عربيه تانيه من نفس الجيل
وكده تقدر تحكم على الأمور صح

+11111111
نصيحة متشغلش بالك بموضوع السحب دة في الأول بس دايما سخن كويس و متعديش لفات المحرك عن 3000 او 2800 كمان لحد ما تكمل اول الف كم ونصيحة أحذر النقلات المنخنقة اي الكركرة دايما انقل بإستمرار للسرعة التي تناسب سرعة حركة السيارة وربنا يباركلك فيها

**رزق** · 19-12-2009 11:42 PM

أنا أعتقد وأظن إني قريت الموضوع ده في كذا سيت برده إن النقل السريع في الغيارات مضر عالموتور زيه زي القرص عليه, ويمكن أكتر.
يعني مثلا إنك تبقى ماشي عالرابع أو الخامس على سرعة واطية.

ممكن حد يصلحلي المعلومة دي أو يؤكدهالي؟

**samirayad** · 19-12-2009 11:46 PM

كلام سليم
وهو ده المقصود بمصطلح
تشبيع الغيار قبل النقل

لو مشبعتش الغيار بطريقه معقوله
المكنه حتعجز بدرى

والحرق الزائد برضه مش مطلوب

يعنى الوسطيه مطلوبه فى كل حاجه

**رزق** · 19-12-2009 11:51 PM

كلام جميل جدا, أشكرك

**samirayad** · 19-12-2009 11:57 PM

تأمر يازوق

**lanos_power** · 20-12-2009 12:28 AM

اولا احب اقولك ان كلامك فى الاول صح ان العربية اول ما تتحرك تديها التانى بس فى نفس الوقت كل غيار و لية روح يعنى مينفعش انى متديهوش راحتة و على فكرة دا فى السلانسية تانى حاجة الحامة ميتجبش الا عند 100 او 90 بالكتير عشان العربية تفضل فايقة معاك انما بالطريقة لما تجيب الخامس على 50 دا يخنقها