انا والسيات وهواك (الحلو لما يتدلع يخلي الاسفلت يولع )
كنت كاتب الموضوع ده من فتره
وحصلت ظروف وتهييس في الداتا بيز والموضوع طار مع شويه موضوعات
ولما الظوف سمحت قولت اكتبهولكم تاني
ودي كانت الحكايه
======================
في الفتره الاخيره كلمني صديق عزيز عليا جدا
وقالي انه حيشتري عربيه سيات من اسكندريه وحيسيبهالي اسبوع اقضي بيها مشاويري لحد ما عربيتي تخلص
فعلا خالص شكري وتقديري للشخصيه الجميله دي اللي بحبها من كل قلبي وبعتبره اكتر من اخ
المهم بدات رحلتي مع السيات من يوم الاحد اللي فات
جابهالي عضو جميل سعدت بالتعرف عليه اكتر من سعادتي بركوبي عربيته
شخصيه محترمه جدااااااااا هو الاستاذ خميس عضو المنتدي وزميل المهنه
الراجل سابلي العربيه ومشي
وهي مركونه قدام المحل وانا عمال ابصلها وافكر
-العربيه دي حتشيلك يا واد يا محمد
- طيب لو دخلت جواها حتعرف تقعد
- لو قعدت جواها واتطبقت في بعضي يا تري حعرف اسوقها
6 ساعات ابصلها وتبصلي وهي نايمه كالقطه الوديعه بره المحل وتحمل في ثناياها موتورها الوحش الكاسر
لحد ما جالي صاحبي اللي بعمل عربيتي عنده وبيقولي انا رايح اجيب فلافل(طعميه) تيجي معايا
قولتله يلا بينا بس سوق انت
قالي ناخدها مشي ياعم
قولتله ونتمشي ليه طالما معانا عربيه نروح بقيمتنا برضه
بصلي بصه مفهمتهاش غير بعدين
المهم ربنا وفقنا ودورنا العربيه وجيبنا الاولاني كمان
وبدات اول رحله للسيات
الواد مكانش راضي يمشي في الشوارع الرئيسيه فقولت يمكن حد عاوز منه فلوس ومش عاوزه يشوفه
ووصلنا بسلامه الله للشارع اللي قبل بتاع الفلافل وركنناها صف تاني كمان ونزلنا
اول ما وصلنا للراجل راح مرحب بينا ودار الحوار الاتي بينهم
خير يا باشا جاي علي رجلك يعني النهارده
فقاله اهو قولت اتمشي شويه
امال فين عربياتك ياعم عاوزين حاجه كويسه
قاله زي ايه
اي حاجه علي قدها لانسر او جولف او زلموكه حتي نبيعها ونسترزق بدل ما الحال واقف
فقاله لا والله بس فيه سبيرانزا وفيتارا واكسبديشن عامله حادثه
وانا عمال اقوله ياعم قوله اننا معانا عربيه وهو مطنشني
اقوله ياعم قوله اننا مش جايين علي رجلينا وبرضه مش بيرد عليا
مشينا من عند بتاع الفلافل (الطعميه)
وروحنا لجماعه اصحابنا في المحل بتاعهم
لقيته بيركن العربيه بعيد
فبقوله ليه
قالي علشان محدش يحسدنا
وبرضه واحنا ماشيين واحد عرض علينا يوصلنا فقولتله لا احنا معانا عربيه
فصاحبي زغرلي جامد اوي بعينه
فقولتله مالك فيه ايه
دي عمر ما حد من اهلك ركب زيها
راح ماسك رغيف عيش ورافعه علي عينه ورافع وشه للسما
وقال باعلي صوته
والنعمه دي ولا اوعي اكلها
فعلا يا شنوري انا عمر ما حد من اهلي ركبها
المهم مشينا
وقولتله كفايه عليك كده
انا اللي حسوق
اول ما دخلت لقيت كتفي لازق في كتفه
فقولتله وسع شويه ياعم
راح فاتح الباب وكان عاوز ينزل
فقولتله هو انا زعلتك؟؟؟
قالي لا بس بوسعلك
ففهمت ان العربيه صغيره علينا لاني في الاول كنت قاعد بالعرض علشان التابلوه كان لازق في رجلي
راح راكب تاني
وبدات ادوس بنزين
حطيت رجلي في كل حته من العربيه لحد ما لقيت الدواسه وهي عباره عن حاجه صغننه اوي كده في اقصي يمين رجلك من تحت
يعني تزنق وش رجلك في العربيه وبالصباع الصغير تدوس عليها
وطبعا مش ححكيلكم عن باقي الدواسات لان الدبرياج والفرامل بيتحركوا مع بعض واصلا رجلي بتدوس عليهم مع بعض
تقريبا دا نوع من انواع الترابط الاخوي والمساواه بين الدواسات (اشمعني واحده تنزل والتانيه لاء)
ومشيت بينا العربيه زي الفل
ووصلته لحد باب بيته ونزل في حته ضلمه وبيقولي علشان محدش يشوفني
فقولت اكيد مش عاوز الناس تعرف انه جايب فلافل معاه او بيخاف من عنين الناس
واخدت بعضي وسط الظلام وروحت عند البيت ركنتها والناس عماله تبصلي بصات غريبه
