زيرو تقسيط ولا مستعمل كاش؟؟ أفيدوني

**esam** · 01-12-2007 01:09 PM

السلام عليكم ورحمة الله
أنا بصراحة محتار يا أخوانا بقالي شهر تقريبًا، معايا حوالي 35 ألف وعايز أحيب عربية لإن سكني في القاهرة الجديدة وشغلي في وسط البلد، قلت أجيب مستعمل خاصة أني لسه جديد في عالم السواقة، وابيعها بعد سنة ولا انتين، وأريح نفسي من الأقساط والدوشة بتاعته، لقيت الأغلب خاصة الأهل بيخوفوني من المصاريف الكتيرة بتاعة المستعمل، واللف على الميكانيكية والخسارة عند البيع، فقلت أقسط عربية جديدة وكان عيني على اللادا تمنها كويس وعربية متينة وتستحمل، قلت أجيب الروسي من 2017، بس برضو كتير خوفني منها ومن خشونتها وموتورها وكمان بتسخن ومفيهاش تكييف ودا مهم بالنسبة لي عشان انا من الصعيد وسفري للبلد يحتاج 6 ساعات وممكن أسافر مرة كل شهر على الأقل، وأنا حاليا محتار فكرت في لانوس فول اوبشن ادفع نص تمنها واسدد الباقي على اربع سنين، عن طريق بنك فيصل أو أي نظام إسلامي، ودا حاليا رأيي الحالي بس بصراحة الفوايد هتكون حوالي 12 ألف، فانتو رايكم ايه، أنا بجد محتاج نصيحة أي أخ عنده علم أو تجربة، وجزاكم الله خيرا

**mino** · 01-12-2007 01:59 PM

المشاركة الأصلية كتبت بواسطة esam

لانوس فول اوبشن ادفع نص تمنها واسدد الباقي على اربع سنين، عن طريق بنك فيصل أو أي نظام إسلامي،

الجديد احسن طبعا حتي لو في فوايد العربيات كده كده بتزيد اسعارها كل يوم يعني الكيا برايد العصفورة اول ما نزلت كانت زيرو ب 23 الف دلوقتي استعمال بحاجه و ثلاثين اتكل علي الله و هات جديد البدايل هتبقي كتير لانوس ، افيو ، فيرنا و ربانا يوفقك

**eng_mkhalaf** · 01-12-2007 03:51 PM

أرجوك بلاش القسط - مش هتحس بية غير بعد كام شهر يعنى ما بعد حلاوة العربية الجديدة يروح وتبقى شىء عادى فى حياتك وساعتها هتلاقى نفسك عمال تعد فى أقساط فى عربية مش بتاعتك ودخلك الشهرى متعفرت يمين وشمال
أحسن حاجة بالمقدم روح جيب إلى عربية حالتة كويسة وعلى الأقد على الأقل لو ربنا قدر وحصلت حاجة مش هتبقى زعلان ومش عمال تدفع فلوس فى حاجة مش بتستخدمها

**eng / AhmeD** · 01-12-2007 04:38 PM

أنا رأيي القسط افضل
لعلشان هيدخلك في شريحة عربيات احسن بكتيييير من اللي ممكن تجيبها مستعمل
و بعدين القسط مش هتحس بيه بل هتتعود عليه زي ايجار الشقة كده و الفواتير يعني هيبقي من الثوابت
لحد ما هتتفاجيء ان القسط خلص و الحمد لله
و بعدين العربية الزيرو ما بيتصرفش عليها زي المستعمل
المستعمل عمرك ما تقدر تضمنه في الفلوس و الصيانة
و ربنا يوفقك

**eng / AhmeD** · 01-12-2007 04:44 PM

أنا رأيي القسط افضل
لعلشان هيدخلك في شريحة عربيات احسن بكتيييير من اللي ممكن تجيبها مستعمل
و بعدين القسط مش هتحس بيه بل هتتعود عليه زي ايجار الشقة كده و الفواتير يعني هيبقي من الثوابت
لحد ما هتتفاجيء ان القسط خلص و الحمد لله
و بعدين العربية الزيرو ما بيتصرفش عليها زي المستعمل
المستعمل عمرك ما تقدر تضمنه في الفلوس و الصيانة
و ربنا يوفقك

**esam** · 01-12-2007 08:16 PM

السلام عليكم ورحمة الله
بارك الله فيكم على نصائحكم، أنا بصراحة مستريح للجديد عشان مصاريف المستعمل، وعايز أجيب لادا 2107 روسي عربية متينة وتمنها حنين، لكن خوفي إنها تهلك بسرعة وألقى نفسي بعد سنتين مثلا محتاج أغيرها، والبديل لانوس، لكن ميزة اللادا طبعا هو سعرها مش هاضغط نفسي لا في مقدمها ولا في أقساطها، فما رأيكم

**ramyfawzy** · 02-12-2007 02:00 AM

السلام عليكم اخي العزيز
مفيش اختلاف ان اللادا عربية ممتازة وقوية وبستحمل وكل الحاجات دي (انا ركبت 7 عربيات لادا من سنة 90 لحد 2001 وعارفها كويس)
بس الفكرة انك ممكن بتمن اللادا الزيرو الروسي مش المصري (تقريبا 46 الف جنيه) تقدر تجيب عربية لانوس او اكسنت (موديلات 99 او 2000) وفيها تكييف ومواتير كويسة وعربيات ناعمة وبعدين قطع الغيار والصيانة متوفرة و كتير
ده رأي الشخصي ولو انا كنت مكانك كنت هاعمل كده وطبعا ليك حرية الاختيار
وربنا يسهل وترسى على بر بأذن الله

رامي (ابو احمد)

**Ahmed Anwer** · 02-12-2007 02:12 AM

المشاركة الأصلية كتبت بواسطة eng / AhmeD

أنا رأيي القسط افضل
لعلشان هيدخلك في شريحة عربيات احسن بكتيييير من اللي ممكن تجيبها مستعمل
و بعدين القسط مش هتحس بيه بل هتتعود عليه زي ايجار الشقة كده و الفواتير يعني هيبقي من الثوابت
لحد ما هتتفاجيء ان القسط خلص و الحمد لله
و ربنا يوفقك

+1

ربنا بيرزق و بتعلي إمكانياتك و اعتبره تحويش ،، عقبال ما تخلصه هيكون معاك عربية كويسة ، تبيعها بمبلغ محترم

و لو عايز تعلي يبقي معاك أرضية بتبني عليها

كل الناس بتحسبها كده دلوقتي ، هاجيب عربية مثلآ ثمنها كاش 70 الف ، عقبال ماخلص القسط اللي مش هحس بيه مع المصاريف هابيعها ب 47 الف مثلآ ، يبقي حوشت و الفلوس أصلآ قيمتها بتقل و الأسعار بتزيد

انا مثلآ كان ممكن اوصل لعربية ثمنها 90 الف ، و مش هتفرق 200 جنية في التقسيط و نتيجة لضغوط حكومية تراجعت للحد الأدني

رغم إن ال 200 جنية مبيعملوش حاجة الزمن ده