قالها بكل ثقة: موخضرات...مش عارف أفرح ولا أزعل؟..إيه رأيكم؟
في طريق عودتي أمس الساعة الواحدة صباحا وعلى طريق مفتوح خال في هذا التوقيت كنت باجري على سرعة متوسطة وفجأة لقيت قدامي أربع عربيات فرملوا مرة واحدة وحاولوا يفادوا بعض...انتبهت وفرملت وشغلت الانتظار وانحرفت يمينا تفاديا للاصطدام بالقادم خلفي وكذلك فعلت السيارات ورائي وتوقف الطريق
السيارات الخمس: أوكتافيا في المقدمة وقافلة على فيرنا وراها وحوالين الفيرنا لانوس وشاهين زانقينها في رصيف الجزيرة منتصف الطريق
ظننت في البداية إنها مشكلة مع قائد الفيرنا وقلت يمكن شارب ولا حاجة وحدف على الأوكتافيا فحب يربيه....لكن لقيت مجموعة حوالي ثمانية نزلوا من العربيات وبيحاولوا يطلعوا شباب من الفيرنا بالقوة وبيزعقوا ويشتموا طبعا شتيمة راقية جدا
قفلت العربية ونزلت أشوف فيه إيه لقيت واحد عريض المنكعين غير محدد الأبعاد ينظر إلى فضاء لا متناهي من فوق شارب ضخم -عرفت فيما بعد إنه مخبر- قلتله: هي العيال دي شاربة ولا إيه؟....رد بنظرة توحي بالخطورة والأهمية:...موخضرات....انتبهت بعد تفكير سريع إنها (مخدرات)
كانت حملة من مكتب المخدرات
قربت خطوتين لقدام لقيت واحد ضخم برضه بس شكله أنضف شوية-طلع ظابط- ماسك لاسلكي وبيقول كل واحد يرجع مكانه..قلتله: بالتوفيق
رجعت عربيتي وكذلك فعل كذا واحد كانوا نزلوا
الطريق كان مقفول فقام ظابط من الواقفين بتحريك إحدى السيارات لفتح الطريق وأنا باتحرك بالعربية شاورتله بالإبهام لفوق (كده) فشاورلي ورد التحية بامتنان
حقيقي كنت مبسوط جدا إن في حد بيبذل مجهود عشان البلد تنضف وقلت إنهم يستحقوا الشكر برغم إنهم بيقوموا بواجبهم الطبيعي
بعدما اتحركت بمسافة يسيرة جاءتني الخواطر التالية
- طيب ما تجار المخدرات الكبار معروفين بالاسم والصفة ونوع النشاط وكثافته
- الشباب اللي كانوا في العربية دول مجرمين أي نعم ولكنهم مجرمين صغيرين..طيب إيه الوضع مع المجرمين الكبار
- المجرمين الصغيرين دول دايما بيكونوا كبش فداء لمن هم أكبر
- لو المباحث كلها بتشوف شغلها بالدقة والكفاءة دي وجو مطاردات والذي منه..طيب المخدرات اللي ماليه البلد دي بتيجي ازاي
- أغلب الأفراح دلوقتي سواء الشعبية أو الهاي كلاس بتقدم فيها المخدرات بأنواعها سواء في الفنادق والنوادي أو على ترابيزات في الشوارع
- طيب ماهي الخمور برضه مخدرات ومحلاتها مالية البلد وبتتباع رسمي وبيتاخد عليها ضرايب كمان
- لمصلحة مين اللي بيحصل ده؟!!..
- إحنا شوفنا العجب أيام راوندات الطب الشرعي والسموم وفي الاستقبال خصوصا في الأعياد والمواسم...طب لغاية إمتى ده كله
على قد ما فرحت من الموقف..على قد ما الخواطر دي نكدت عليا
إيه رأيكم
