( saga ) روحت امبارح عز العرب فرع مدينة نصر عشان الساجا , و زعلان من سياسة عز العرب
السلام عليكم
طبعا انا كنت سألت قبل كده بعض الاعضاء هنا عن صاج الساجا ( مرتين ) والحمد لله ملاقيتش رد ( مع انى أظن السؤال مش صعب - يمكن مخدوش بالهم الله اعلم )
نظرا لأن المفتيين و العلماء كتره اوى زى الرز , قلت كفاية لحد كدة أشوف الحاجة بنفسى
عالعموم خطفت رجلى امبارح لفرع مدينة نصر-عز العرب , و شفت الساجا الحمرا المانيوال
(كان فى حتى جنبها على اليسار جين2 )
ملاحظتى الشخصية :-
- تابلوه العربية حلو , مش زى الصور , يمكن بالنسبة لى احسن من تابلوه اللوجان او الجيتز
- العربية مرتفعة عن الأرض , مرتفعة حتى عن البيرسونا و الجين تو
- الشنطة كبيرة , الكرسى الأمامى ممكن يطلع و ينزل فى اتجاه رأسى كمان
- الصالون بتاع العربية واسع مفيش كلام , لكن فرش العربية جيد بالنسبة لسعر العربية
- فتح الزجاج الخلفى باليد سهل
- نور التابلوه اورانج , النور العالى و الشبوره قوى , نور الأشارات قوى , الكلكس حلو
- الدريكسيون مرن و العربية واقفة
الجير بوكس محترم بس يمكن تسمع صوت النقلة ( يمكن السبب ان المكان تحت كان هادى اوى و مقفول بالزجاج) بس اعتقد ان جير بوكس الهيونداى انعم حاجة بسيطة
نيجى بقى لصاج العربية :-
- الكبوت ---- اضعف حبتين من البيرسونا و الجين تو
- الرفرفرين الأماميين --- زى البيرسونا و الجين تو
- الرفرف الخلفى الايسر --- اضعف شوية من البيرسونا و الجين تو
- الرفرف الخلفى الايمن--- زى البيرسونا و الجين تو( الرفرف اللى فيه التنك) جامد
- الأبواب الأمامية و الخلفية --- قوية , اقل قوة حاجة بسيطة اوى من ال البيرسونا و الجين
( المقارنة فى الصاج تمت عن طريق الضغط بنفسى على كل الأجزاء اللى انا ذكرتها على الساجا و الجين تى اللى كانت واقفة جنبها و البيرسونا سيارة صديقى )
- طلعت فوق ومندوب المبيعات رجل محترم و مهذب , و دخلنا المكتب بتاعه
- كلمته بصراحة عن وجود ضعف فى بعض أجزاء الصاج للساجا , قالى ماتخفش دا سمك الصاج 6.5 مم و متقلقش من ده , بس انا مقنتعتش
اللى دايقنى :-
- بنتكلم عن الأسعار,قال لى كانت 62.900 واصبحت الان 63.900
- قلت له ليـــــــه , قاللى علشان الطلب عليها كبير أوى , وفى احتمال كبير أوى ان السعر هيزيد 2000 او 3000 بعد 2010
- ( مش عارف الراجل بيشتغللى ولا دى الحقيقة . الله اعلم )
- طاب سالته اشمعنا الاوتوماتيك سعره ثابت دا الفرق بين المانيوال والاوتوماتيك هيقررب اوى
- ضحك و قاللى عالشان الطلب على المانيوال اكتر من والاوتوماتيك, و احنا ناوين نزود سعرها بعد 2010 علشان نحافظ على فرق السعر بين لمانيوال والاوتوماتيك
طبعا انا زعلان من سياسة الجشع دى , انا بعتبر دا استغلال
ولو دا حصل , الساجا هتفقد منافستها بين عربيات كتير فى نفس الفئة السعرية ( زى اللوجان مثلا )
و السلام عليكم