المعدل الفعلى لاستهلاك البنزين فى الانسر 1600

**limo** · 01-12-2007 09:12 PM

يا ريت كا واحد معاه لانسر 1600 اتوماتيك او مانبوال يكتب الاستهلاك الفعلى للعربيه بتاعه سواء داخل المدينه او خارجها بتشغيل التكيف وبدون قياده هادئه او رياضيه
وياريت يكتب موضفات العربيه سواء خليجى او مصرى

انا واحد صاحبى معاه لانسر 1600 مو2007 اوتوماتيك هاف سبورت خليجى بيقولى ان عربيته بتعمل 160 فى الصفيحه فهل اللكلام ده صحيح؟
كمام سواءهل فيه فرق فى الاستهلاك بين الفتيس الاتوماتيك والمانيوال ؟
هل فيه فرق فى الاستهلاك بين المصرى والخليجى ؟

متشكر جدا جدا يا رجاله المتسوبيشى على المساعده واتمنى انى مكنش اثقلت عليكم بكثره اسئلتى

**اسلام المصرى** · 01-12-2007 10:41 PM

حاليا و بدون تشغيل التكييف: 20 لتر بنزين 92 = حوالى 300 كم قيادة هادئة 90 100 كم/س خارج المدينة.
مع تشغيل التكييف: 20 لتر بنزين 92 = حوالى 270 الى 280 كم قيادة عادية و جزء رياضية :) 100 120 كم/س خارج المدينة.
أنا ممكن أمشى ب 20 لتر بنزين 92 مسافة 300 كم و بالتكييف و لكن السرعة تكون 90 كم/س.
الحمد لله أنا شايف أنه أستهلاك معقول و مقبول بالنسبة ل1600 أتوماتيك.
السيارة "مصرية"
160 كم فى الصفيحة أستهلاك عالى جدا من رأى!!! هو أكيد كلامه صحيح بس فى الحالة ديه أكيد فى حاجه مش مظبوطة أو سواقته رياضية جدا و مشغل التكييف على طول أو سرعات عاليه , بس برده كتير و الله أعلم.
على حسب علمى و الله أعلم أن الفتيس الأتوماتيك يستهلك بنزين أقل من المانويل بس فى حالة أنك ماشى على ال D و عدد لفات الموتور واطى , بس الفرق بسيط جدا.
سؤال فرق الأستهلاك للأسف مش هقدر أفيدك فيه. "من قال لا أعلم فقد أفتى"
الشكر لله يا أخى. شكرا جزيلا على موضوعك الشيق و أرجو أنى أكون أفدتكم و لو فى معلومات خطأ الرجاء تنبيهى و تصحيحى :) تصبحوا جميعا على خير.

**أبو عبدالله** · 01-12-2007 11:40 PM

على حسب علمى و الله أعلم أن الفتيس الأتوماتيك يستهلك بنزين أقل من المانويل بس فى حالة أنك ماشى على ال D و عدد لفات الموتور واطى , بس الفرق بسيط جدا

لا الأوتوماتيك اعلى في الأستهلاك سواء ماشي على الــ D او اي حاجه تانيه والفرق داخل البلد بيبقى اعلى طبعا من المانويل بفارق ممكن يعتبر

**محمد عز** · 02-12-2007 07:39 AM

انا كان معايا لانسر 2007 اتوماتيك هنا فى الامارات ، تكييف شغال على طول والسواقة من 90 الى 100 كانت تقريبا بتعمل 9 كليو لكل واحد لتر وده داخل المدينة
الحقيقة مقدرش اقولك على الطريق السريع والسفر لانى لما كنت بروح دبي رايح جاى كنت بمشي على 160 والار بي ام كان بيكون عالى مش فاكر كام والتكييف كان شغال برده فكان تقريبا نفس معدل استهلاك البنزين او اقل سنة بسيطة

**tutankhamoun** · 02-12-2007 07:56 AM

الفتيس الأوتوماتيك أستهلاكه أعلى من الفتيس العادة (المانول)
و دي حقيقة و معروفة للجميع و ليس العكس

**limo** · 02-12-2007 06:20 PM

متشكر اوى يا جماعه على الردود
ياريت لو حد معاه 1600 مانيوال يقولى الاستهلاك بتعهاكام فى الصفيحه
انا عارف ان استهلاك المانيوال اقل من الاتوماتيك بس انا سمعت ان فتيس الانسر 1600 الجديد بيوفر فى الاستهلاك البنزين وسحبه عامل زى المانيوال

**اسلام المصرى** · 02-12-2007 10:16 PM

شكرا جزيلا يا أبو عبدالله على تصحيحى :)
شكرا جزيلا يا أخ tutankhamoun عى تصحيحى :)
ومنكم نستفيد.
جزاكم الله خيرا.

**محمد أنور** · 03-12-2007 02:42 AM

انا عربيتي سفاحة بنزين .. عربيتي 1600 مانيول مصري .. بحطلها 35 لتر بيمشوني 350 كيلو بالضبط .. يمكن عشان انا سواقتي كلها سرعات عالية من ساعة ما جبت العربية .. مش اقل من 140 داخل المدينة وخارجها و على المقيمين في ضواحي المدينة مراعاة فروق التوقيت :d