باركولى : الحمد لله جيبت الالنترا النهارده ولكن !!!

الحمد لله وفقتى الله تعالى واستلمت الالنترا اليوم , ودعواتكم ليا يا رجاله ...

أول مغامرة ليا النهارده بدأت ! :biggrin2:

وجات كده لوحدها :B4_592:
المهم عشان ما طولش عليكم , اللى حصل بعد ما استلمت العربيه وفرقت الحلاوة ركبت أنا وواحد صاحبى ولسه يطلع بالعربيه فلتت منى وكانت هتدخل على العربيات اللى أمام المعرض :10D5C8~1107:

لولا ستر ربنا عليا وما شاء الله الفرامل سعدتنى كتير , وبعدها مشيت شويه حلوين ولسه أول ملف ليا ودخلت فى الرصيف وكنت هدخل فى عربيه واقفه لولا رينا ستر :B4_592:

قام صاحبى قومنى وكمل هو الطريق وجرشهالى كمان :Ob_mak1[1]:

فأنا حبيت أعرف منكم عشان أستفيد من خبراتكم ؟

دى أول عربيه فى حياتى ولما روحت أتعلم اتعلمت على 128 , لانوس ...

مش عارف ثقتى اتهزت كتييير ولولا ستر ربنا انى جبت صاحبى معايا مش عارف كنت هاعمل ايه !

لدرجة انى بعدها كان عندى مشوار ليس ببعيد أخدتله تاكسى وأنا واقف قدمها هجنن :44:, افيدونى أنا هافضل كده على طول ؟ وايه فايدة المدرسه اللى روحتها على كده ؟

وايه نصايحكوا ليه ؟ وهل حد فيكم حصلوا كده من قبلى ؟ وهل اختيارى لالنترا كان موفق فى الوقت الحالى بالنسبه لى؟
مع العلم أن الشغل موفر لنا سيارة بسائق ولن أركب سيارتى ان شاء الله ...

أعتذر عن الاطاله ولكنى والله أحبكم فى الله وأرجو منكم النفع والنصيحة . وجزاكم الله خيرا .

نصيحة لوجة الله متبهدلش العربية حرام ارمى شوية فلوس فى مدرسة نضيفة حتى لو هتاخد كورسين ورا بعض تحمى بيهم عربيتك من البهدلة واختار عربية لانوس على الاقل علشان قريبة فى الاداء من عربيتك دا هيخليك تتعود اكتر على التعامل مع السيارة وربنا يباركلك فيهااا ويعطيك خيرها ويكفيك شرها

اهم حاجة اتعلم كويس الاول وبلاش تبهدل العربية وانت لسة جايبها خد واحد صاحك فى منطقة كويسة وسوق فيها كتيير وشوف ابعاد العربية وجرب امشى بيها فترة كويسة وانشاء الله هتبقى كويس انا كونت باسوق فيات 125 وبقيت اسوق اوبل استرا ومفيش اى مشاكل عادى بس اهم حاجة متبقاش متوتر وحاول تهدى وانت بتسوق

جزاكم الله خيرا على النصيحة , وايه المدارس المحترمه اللى فى وجهت نظرك أخى ؟

بص هى السواقه ممارسه مش اكتر انت انزل انت وصاحبك كل يوم باليل على 2 مثلا كده وامشى بيها فى واعرف ابعادها وتاخد على العربيه

وهى مسألة وقت بس وهتاخد على العربيه وتاخد غرز كمان بيها :)

السلام عليكم ورحمة الله وبركاته

الاخ الفاضل

اولا شعورك طبيعي جداا لان وانت بتتعلم غير لما بتسوق لوحدك

خصوصا وانت بتتعلم بتكون مطمئن ان في فرامل عند قدم اللي بيعلمك

المدارس الكويسة لتعليم القيادة لازم يكون عندها نوعين او تلاتة من السيارات واسوأ تعليم واصعبهم بيكون علي 128

لان الدبرياج والفتيس بيكون تقيل في الحركة

نصيحة مني تروح تتعلم تاني علي عربية فيرنا لانها تقريبا من نفس ماركة الالنترا وهتكون حاسس وحاطط في دماغك ان دي عربيتك اللي بتسوقها

والفيرنا موجودة في مدارس تعليم القيادة وهيا دي اللي اتعلمت عليها

ولما سألت صاحب المدرسة عن احسن تعليم علي اي عربية جاوبني وقالي لو هتركب عربية نضيفة او زيرو يبئا افضل انك تتعلم علي عربية كويسة زي الفيرنا

وخلي بالك ال128 صغيرة جداا عشان كده مش هتعرف تتمكن من سواقة عربية اكبر وكل ماكانت العربية اللي بتتعلم عليها كبيرة كل ماكنت متمكن اكتر في السواقة

اقتباس:

---

المشاركة الأصلية كتبت بواسطة kanvict

اهم حاجة اتعلم كويس الاول وبلاش تبهدل العربية وانت لسة جايبها خد واحد صاحك فى منطقة كويسة وسوق فيها كتيير وشوف ابعاد العربية وجرب امشى بيها فترة كويسة وانشاء الله هتبقى كويس انا كونت باسوق فيات 125 وبقيت اسوق اوبل استرا ومفيش اى مشاكل عادى بس اهم حاجة متبقاش متوتر وحاول تهدى وانت بتسوق

---

يعنى أروح فى مكان فاضى زى الشروق ولا الأفضل فى المكان اللى فيه حركة ؟

وجزاك الله خيرا أخى على ردك واهتمامك , وياريت حد يقولى فيه أمل ولا لأ وحد حصلوا كده قبلى وكمل ؟ مع العلم انى كنت بطلع ب128 كويس بس الراجل طبعا كان جنبى :Ob_mak1[1]: , وشكرا ليك يا ذوق ...

اقتباس:

---

المشاركة الأصلية كتبت بواسطة aboudelmsry

السلام عليكم ورحمة الله وبركاته

الاخ الفاضل

اولا شعورك طبيعي جداا لان وانت بتتعلم غير لما بتسوق لوحدك

خصوصا وانت بتتعلم بتكون مطمئن ان في فرامل عند قدم اللي بيعلمك

المدارس الكويسة لتعليم القيادة لازم يكون عندها نوعين او تلاتة من السيارات واسوأ تعليم واصعبهم بيكون علي 128

لان الدبرياج والفتيس بيكون تقيل في الحركة

نصيحة مني تروح تتعلم تاني علي عربية فيرنا لانها تقريبا من نفس ماركة الالنترا وهتكون حاسس وحاطط في دماغك ان دي عربيتك اللي بتسوقها

والفيرنا موجودة في مدارس تعليم القيادة وهيا دي اللي اتعلمت عليها

ولما سألت صاحب المدرسة عن احسن تعليم علي اي عربية جاوبني وقالي لو هتركب عربية نضيفة او زيرو يبئا افضل انك تتعلم علي عربية كويسة زي الفيرنا

وخلي بالك ال128 صغيرة جداا عشان كده مش هتعرف تتمكن من سواقة عربية اكبر وكل ماكانت العربية اللي بتتعلم عليها كبيرة كل ماكنت متمكن اكتر في السواقة

---

أخى جزاك الله خيرا , ولكن كانت وجهة نظرى أنى لما أتعلم الصعب هيهون على السهل ! وبعدها أخذت 3 حصص لانوس عشان اتعرف عليها . وكأن شيئا لم يكن !

يعنى لو رحت مدرسه تانى أحسن ولا لما أذهب مع صديقى فى مكان واسع واتعلم ؟

اقتباس:

---

المشاركة الأصلية كتبت بواسطة mahamedaraby

بص هى السواقه ممارسه مش اكتر انت انزل انت وصاحبك كل يوم باليل على 2 مثلا كده وامشى بيها فى واعرف ابعادها وتاخد على العربيه

وهى مسألة وقت بس وهتاخد على العربيه وتاخد غرز كمان بيها :)

---

ربنا يباركلك ويطمنك زى ما أسعدتنى , وجزاك الله خيرا

بص انا انصحك انك تروح مدرسة تاني بس بلاش المدرسة اللي اتعلمت فيها

لان في ناس بتعلم غلط اقصد الاصدقاء والاقارب

لان ممكن هما يكونو بيعلموك غلط

ياريت تئولي مكانك فين وانا هئولك علي مركز بيعلم كويس

علي فكرة انا لما اتعلمت اتعلمت الاول في مدرسة مااتعلمتش منها اي حاجة

وكنت فاكر ان العيب مني وان السواقة صعبة اووي

سألت ناس تانية كتير عن مركز تعليم يكون 100 /100

الكل اجمع علي ان المدرسة الاولي مابيعلموش حاجة عشان ترجع ليهم تاني وتدفع فلوس تاني

ونصحوني بمكان تاني وهناك بئيت برفكت والحمد لله في السواقة

(( لو مصر اووي انك تركب عربيتك وتسوقها خلي صاحبك يعد جنبك وتكون ايده علي فرامل اليد وتكون انت يمين الطريق عالطول وامشي بملل وماتعبرش حد من اللي وراك اهم حاجة انك تاخد علي العربية وبس كفاية رغي كده اكيد دوشتك ))

الالنترا فيها 3 مشاكل كبار اوى بالنسبه لمبتدىء
1 الموتور قوى جدا وسريع الاستجابه فلازم تبقى رجلك حساسه اوى
2 الدركسيون حساس اوى لانه كهرباء فلازم تحسس عليه وبلاش اى توتر او شعفه
3 الفرامل حساسه اوى برده ودى كويسه

المهم
نصيحه اتعلم على عربيتك علشان لو اتعلمت على اى عربيه تانيه وبعدين ركبت عربيتك هتصتدم بنفس المشاكل اللى انا قولتهوملك
بس
تكون باليل وفى نكان فاضى وريلاكس خالص وواحد يوديك ويجيبك وهو سايق لحد ما تتعود عليها

وعلى العموم ربنا يديك خيرها ويكفيك شرها ومبروكه عليك
ومتخليش اللى حصل يدايقك لان انت معذور علشان توتر الاستلام ولخبطت العربيه الجديده

الاول الف مبروك مقدما وربنا يديك خيرها ويكفيك شرها
تانى حاجه الانترا باورها كهربا وناعم جداا انا ما جربتوش بس من كلام الناس وانا سايق قبل كده لانسربوما ووانا رايح استلمها ان شاء الله هاخد واحد معايا سايقها قبل كده على ما اتعود عليها مع نفسى
وربنا يكرمك ان شاء الله

تدريب لمدة 6 اشهر فى الأوقات غير الذروة وفى اماكن نائية وان شاء الله هتبقى ممتاز

اقتباس:

---

المشاركة الأصلية كتبت بواسطة esamghanayem

الالنترا فيها 3 مشاكل كبار اوى بالنسبه لمبتدىء
1 الموتور قوى جدا وسريع الاستجابه فلازم تبقى رجلك حساسه اوى
2 الدركسيون حساس اوى لانه كهرباء فلازم تحسس عليه وبلاش اى توتر او شعفه
3 الفرامل حساسه اوى برده ودى كويسه

المهم
نصيحه اتعلم على عربيتك علشان لو اتعلمت على اى عربيه تانيه وبعدين ركبت عربيتك هتصتدم بنفس المشاكل اللى انا قولتهوملك
بس
تكون باليل وفى نكان فاضى وريلاكس خالص وواحد يوديك ويجيبك وهو سايق لحد ما تتعود عليها

وعلى العموم ربنا يديك خيرها ويكفيك شرها ومبروكه عليك
ومتخليش اللى حصل يدايقك لان انت معذور علشان توتر الاستلام ولخبطت العربيه الجديده

---

++++++++++++++++++1

انا رايى تتعلم على عربيتك بمساعدة صديق فى مكان فاضى و ان شاء اللة هتتعود عليها بسرعة

أولاً ألف مبروك على العربية

ثانياً متوهمش نفسك انك لسه مش متعلم كويس ومحتاج تدريب اكتر وكل ده، دور مدرسة القيادة فى رايي هي انها تعلمك ازاي تشغل العربية وأساسيات السواقة وما شابه، لكن السواقة نفسها ممارسة وكل ما تمارس كل ما هتتعلم وتاخد ثقة أكتر، ووهتفضل تتعلم كل يوم مع كل موقف جديد يظهرلك!

عموماً فيه حلين، اول حل انا عملته اول ما جبت العربية خليت واحد صاحبي (محترف سواقة) ينزل معايا اول كام يوم، كنت انا اللى باسوق بس كان بيبقى جنبي لمجرد اني احس بالاطمئنان بس ويديني ارشادات بسيطة وكده، وكنت باوصله لشغله (اللى قريب من شغلي) ويرجع معايا من غير ما يسوق متر واحد، لغاية ما اخدت الثقة الكافية فى الطريق وبعدها دلقته آآآ قصدي قلتله شكراً خلاص كده انا بقيت تمام :shine[1]:


لو معرفتش تعمل كده مع حد من صحابك يبقى الجأ للحل التاني وهو انك تاخد كام حصة تاني فى مدرسة قيادة لمجرد الممارسة مش اكتر، وحاول تخلي المدرب يمشيك مشاوير طويلة في حتت زحمة، وبرضه كام يوم بالكتير وهتلاقي نفسك اخدت الثقة

وبرضه مع ده استغل اي فرصة وانزل بعربيتك بالليل فى حتة هادية زي ما الزملاء قالولك وخليها دي للتعرف على عربيتك، ظبط احساسك بالدواسات واتعرف على ابعاد العربية وجرب الركنة وهكذا

وربنا يباركلك فى العربية ويحفظك من شر السواقة فى مصر! :biggrin:

نصيحة اوعى تتعلم على 128 , أنا فاكر لما كنت جايب عربيتي القديمة كنت عامل زيك كده عشان اتعلمت على 128

خلي حد من اصحابك يخدك في مكان فاضي و سوق لمدة اسبوعين

انا اعرف واحد ممكن يجي يعلمك على عربيته
هو بايخد تقريباً من 30 لـ 40 في الحصة
مش عارف احط رقم تليفونه هنا و لا ممكن يعتبر اعلان
ياريت لو حد من المشرفين في القسم يرد علىا

الف مبروك على الالنترا ربنا يباركلك فيها
بس انت لازم تسوق شوية كتير لوحدك لان ابعاد كل عربية مختلفة عن التانية وانت لازم تسوق شوية اكتر من مجرد فترة كورس تعليم القيادة
جمد قلبك وسوق بعيد عن الزحمة فى الاول عشان مش تتوتر وواحدة واحدة هتتعود

اولا الف مبروك على العربيه ربنا يباركلك فيها

ثانيا اللى انت فيه دا طبيعى لسببين

اولا انك لسه جديد فى السواقه

ثانيا ان العربيه لسه زيرو وخايف عليها ودا طبيعى حتى للى بيسوق بقاله كتير

انا رأيى تنزل بيها كل يوم بليل متأخر فى حتت فاضيه

وبعد شويه هاتتعود عليها ان شاء الله ويبقى الموضوع طبيعى جدا

ومبروك مره تانيه

بص احسن زى ما الزملاء قالولك انزل مع واحد صاحبك بليل من اول 12 و انت طالع مثلا يومين كده عشان تحس بيها و بعدين انزل لوحدك بقى بليل شوية كمان لغاية ما تحس ان انت تمام و بدقت تحفظها .خلاص بقى انزل عادى فى اى وقت (لو اتوماتيك هتلاقى الموضوع كله خلص بسرعة).

ماعرفش الكلام ده مضبوط ولا لأ اصلى الحمد لله بسوق من و انا عندى 15 سنة فمجربتش موضوع المدارس ده

مفيش كلام اقولو تاني
بس ممكن ازود شوية نقاط صغيره اوي
السواقه خبره والخبره بتيجي عن طريق الممارسه زي اي حاجه بتعملها في حياتك
زي شغلك مثلا فاكر لما روحت اشتغلت ومكنتش فاهم شغلك اوي وبعد كدا بالممارسه بقى عندك خبره ؟
هو كدا بالظبط
وبالظبط زي شغلك انت بتسوق وسط ناس بقالها سنه بتسوق واكثر واقل وهتلاقي منهم المحترف والجديد في السواقه
مع الوقت هتكون خبره وهتعرف تسوق كويس
خليك واثق في نفسك دي اول حاجه
افتكر وانت بتتعلم كنت بتعمل ايه في المواقف الصعبه
ابعاد العربيه سهلة الحفظ فقط ظبط مراياتك ولف لفه كدا حوالين العربيه وشوف طولها اد ايه وعرضها اد ايه وحاول تحفظهم بنظرك
ولما تركب خلي حد يقف ادام العربيه ووراها وقدر المسافات بنظرك
الدريكسيون خفيف جدا طبعا مش زي العربيات القديمه
الموتور مش هتحس بصوته مش زي العربيات القديمه
العربيه دي حلوه واختيارك موفق لانك في عصر متقدم بتكنولوجيا متقدمه والعربيه دي وقتها مش وقت القديم
فقط ركز في طريقك ومتشغلش بالكبأي حاجه تانيه
واحذر خطأ الغير

والف مبروك
ربنا يديك خيرها

اقتباس:

---

المشاركة الأصلية كتبت بواسطة د.محمود صلاح

تدريب لمدة 6 اشهر فى الأوقات غير الذروة وفى اماكن نائية وان شاء الله هتبقى ممتاز

---

أعتقد إن ديه فترة طويلة جداً...بس التدريب فى الأماكن الفاضية أفضل فى الأول و لازم تتعود على الإشارات حتى و لو مش وراك و لا جنبك عربيات...

معلش انا لي وجهة نظر تانية وطبقتها مع واحد صاحبي
تاخد معاك صاحبك اللي بيعرف يسوق وتسافر يوم بره المحافظة بتاعتك وتاخد طريق كويس زي اسكندرية الزراعي او السخنة
وهو مسافة المشوار رايح جاي ان شاء الله هتلاقي كله تمام بنسبة عالية جدا

أولاً: ألف مبروك على العربية و ربنا يديك خيرها و يكفيك شرها
ثانياً: أترك العربية فى الوقت الحالى و لا تغامر بقيادتها
ثالثاً:إبحث عن مدرسة للقيادة و ياريت تتعلم على عربية حديثة مثل اللانوس لأنها قريبة من الانترا كما ذكر بعض الزملاء
رابعاً: بعض إكتساب بعض الثقة إبدأ أثناء الحصص بمدرسة القيادة النزول ليلأ بعض 12 مساءً مع صديق مقرب ليك و يجيد السواقة وإبدأ السواقة و هو بجوارك واحدة واحدة حاتبدأ تتعود على معالم و أبعاد السيارة و حساسية الدواسات و ستجد نفسك بعض مرتين زى الفل إن شاء الله و رجاء لا تتسرع فكلنا مرينا بنفس المراحل التى تمر بها الأن حتى تعلمنا السواقة و بقينا زى القرود

تهنئة عميقة جدا على السيارة وأدعو الله أن يأتيك خيرها وخير ما صنعت له ويجنبك شرها وشر ما صنعت له ، وأحسنت فعلا باستشارة السادة أعضاء المنتدى فما خاب من استشار ولن أزيد على مال قال السادة الأفاضل ، أرجو منك الحرص الشديد والصبر حتى تتمكن تماما من التحكم فى السيارة. وكل نصائح السادة الأعضاء سديدة اختر منها ما يناسبك ولكن لا تتعجل الأمور ، واعلم أنه هناك ناس أعلم منك فى القيادة ومازالو يجدون صعوبة فى شوارع مصرنا المحروسة ، فاحذر ولا تتعجل. وفقك الله لما فيه الخير.

تقبل تحياتى

أحسن حاجة هو انك تطلع بالعربية أخر الليل و الشوارع فاضية خالص لغاية ما تاخد على العربية و هي كمان تاخد عليك .
وده بالظبط اللي عملته بعربيتي بعد ما استلمتها

معلش نسيت اباركلك الأول

ربنا يعطيك خيرها و يكفيك شرها

الف مبرررررررووووووك

بجد جزاكم الله خيرا كثيرا

ولله الحمد طلعت بالعربيه النهارده وأنا برخص وكان جنبى الولد بتاع المعرض للترخيص " على فكرة حقيقى معرض اوتو رضا حمزة اللى فى مصر الجديدة محترمين جدا وأخلاق ومش كذابين , وقالولى استنى الشكل الجديد وفعلا جابوهولى "

المهم شعرت انى نوعا ما أحسن من امبارح , وطلعت باليل كمان مع صاحبى وماشى فى أمان الله مبسوط وفجأة جانى سواق تاكسى ابن حلال من شارع من الجنب واداها خبطه من فوق العجل طبقتها الى حد ما والحمد لله فى السراء والضراء وحزنت عليها أوى وخايف ليحصل أكتر من كده فى المرات القادمه, وجيت عند اشارة روكسى وماختش بالى وقطعتها واصورت كمان :Ka_che1[1]: ايه نظام الغرامه دى ؟ وهل فيها سحب رخص لو حد كان واقف ؟


ايه رأيكوا يا شباب ؟ معلش بطول عليكوا لكن أحلى كلام بلقيه عندكوا هنا لأنه بصدق و من القلب وبيدخل القلب على طول ..... استحملونى :B4_033:

باشا

مبدئيا حكاية السواقة انا مش حقدر اقولك اكتر من اللي الاخوان قالوه
وان كان فيه رأي ثاني مقالوهوش انك ممكن تأجر عربية النترا او فيرنا معتقدش اكتر من 100 جنيه في اليوم
تاجرها يومين او ثلاثة كل اسبوع وتروح بيها الشغل وتطلع من الشغل لمشوار مثلا الدائري او 6 اكتوبر
وبعدين ترجع
اغلى شوية من الدروس بس حتكون بتتعلم على عربيات ايجار اللي غالبا بيبقى متأمن عليها


انما انا اصلا عايز اكلمك على حاجه ثانية (الاعصاب)

لازم تحط في دماغك انك بتعرف تسوق
فاكر اول مرة رحت فيها الشغل (كنت خايف لتتكشف !! صح؟؟) كلنا هذا الرجل ........ لحاد ما فيه يوم قلت في نفسك : العالم اللي معايا في الشغل دول حمير ولا بيفهموا حاجه (حصلت ولا محصلتش)

فاكر اول مرة اتجوزت فيها : كنت خايف انك تدربك الدنيا وبعدين
لو سمعت مثلا ان فيه واحد خايف من الجواز احساسك حيكون ايه (دا فافي اوي ومش حمل مسئولية ) رغم انه اي واحد من حقه انه يخاف من حاجه جديدة

ليه انا بقولك كده

اكتر حاجه لفتت نظري انك رحت بعد ما اتعلمت وسوقت لانوس 3 مرات
وبتقول ولا ليهم لزمة ؟؟؟ اشمعنى ؟؟؟ يعني السواقة في اللانوس حلال والالنترا حرام

اقنع نفسك انك سواق ماهر
اقنع نفسك ان عربيتك فاضل عليها شوية وتتخبط ...يعني حتتخبط حتتخبط لانك كتلة متحركة في شارع فيه كتل متحركة غيرك ... يعني حتيجي يوم وحتتخبط ايه يعني الدنيا طارت
الالكترونات في مدارها حوالين النواه بتخبط في بعض ساعات

ايه اللي حيحصل يعني
قول لنفسك انا حستمتع بسواقة العربية
قول لنفسك انا سواق ماهر والناس حتشوف مني اجمل سواقة
انا وحش السواقة في مصر

صدقني حتيجي في يوم وواحد ماشي جنبك حتقول في سرك : ايه العالم الغجر دول, محدش علمهم السواقة ؟؟؟

اقتباس:

---

المشاركة الأصلية كتبت بواسطة aboudelmsry

السلام عليكم ورحمة الله وبركاته

الاخ الفاضل

اولا شعورك طبيعي جداا لان وانت بتتعلم غير لما بتسوق لوحدك

خصوصا وانت بتتعلم بتكون مطمئن ان في فرامل عند قدم اللي بيعلمك

المدارس الكويسة لتعليم القيادة لازم يكون عندها نوعين او تلاتة من السيارات واسوأ تعليم واصعبهم بيكون علي 128

لان الدبرياج والفتيس بيكون تقيل في الحركة

نصيحة مني تروح تتعلم تاني علي عربية فيرنا لانها تقريبا من نفس ماركة الالنترا وهتكون حاسس وحاطط في دماغك ان دي عربيتك اللي بتسوقها

والفيرنا موجودة في مدارس تعليم القيادة وهيا دي اللي اتعلمت عليها

ولما سألت صاحب المدرسة عن احسن تعليم علي اي عربية جاوبني وقالي لو هتركب عربية نضيفة او زيرو يبئا افضل انك تتعلم علي عربية كويسة زي الفيرنا

وخلي بالك ال128 صغيرة جداا عشان كده مش هتعرف تتمكن من سواقة عربية اكبر وكل ماكانت العربية اللي بتتعلم عليها كبيرة كل ماكنت متمكن اكتر في السواقة

---

كلام حضرتك مضبوط تماماً , واتفق معاك فى الرأي.
مبروك لصاحب الموضوع على العربية

حقيقى جزاك الله خيرا دكتور أحمد على ردك الجميل ده , وفعلا أنا معاك ان أهم حاجه الثقه ولكن بيصعب على الواحد الفلوس وخصوصا ان العربيه ماجتش بالساهل , أما بالنسبه لتأجير فيرنا أو النترا والله فكرت فيها ولكن قلت ماهو لو حصل فيها حاجه هيحملوهالى برده يبقى عملت ايه ؟
ومتشكر جدا أستاذ أحمد شرف وجزى الله خيرا كل من أبدى رأى أو خط حرف فى موضوعى . ودعواتكوا ليه بظهر الغيب ...