المشاركة الأصلية كتبت بواسطة ecybrarian
يوم الجمعة إللي فاتت قررت أخد العيال وأطلع على أي صحراوي..قعدت اسأل نفسي يا ترى أبرسع (أروح بورسعيد) ولا أعنسخ (العين السخنة)..قلت أبرسع علشان بقالي فترة طويلة ما رحتش هناك..وأنا من عشاق بورسعيد..أرض الأبطال..دبي المصرية ...لا بل دبي هي بورسعيد الإمارات
بورسعيد مدينة باسلة حمت مصر كلها من أن تنهار أمام هجمات الأعداء..ترى دم الشهادة يغلي في وجوه البورسعيدية..فمنهم من قضى نحبة ومنهم من ينتظر..استراتيجيا بورسعيد هي الأهم في مدن القناه..فلو ان أهل القرى كلهم في القناه قد استسلموا يكون استسلام اهل بورسعيد هو الأخطر..ولكن ابدا لا يستسلمون..فالأبطال أبناء الأبطال احفاد الأبطال لا يستلسمون..وما ادراك لعل الله اطلع على قلوب أهل بورسعيد فغفر لهم ما شاء..
***ملحوظة غريبة..العربيات في بورسعيد بتقف في الاشارات وهي حمرا من غير ما يبقى في حد مرور واقف..مش بس كده..دول كمان يبقفوا حتى ولو الشارع فاضي!!!!!!!!!!!!!!!!!!!!!!********
وأما عن الطريق من القاهرة إلى بورسعيد فحدث ولا حرج..هما ساعتين فقط بس ملل الدنيا فيهما..طريق بلا خدمات على عكس طريق اسكندرية الصحراوي إللي هو لوحده فسحة وقاعدات وحكاية..واسالوا منظمين الأجتماع القادم..كمان ما فيش رادار ولا يحزنون ..طير ياعم ولا يهمك..انا كنت ماشي على 130، 140 وكنت أبطأ واحد على الطريق....ارشادات الطريق قليلة بس الطريق واضح من العبور لحد طرح البحر (شارع الكورنيش في بورسعيد)
الفتادق والقرى هناك زحمة مووووت انا لقيت سويت بالعافية في "مرحبا" بس طلع حكاية..مش هاكلمكم عن الشرا (الشوبينج يعني).المهم وانا قاعد في البرج لقيتهم رافعين ورقة عليها رقم عربيتي..جريت اشوف في ايه لقيت شباك مفتوح والحرامي الخايب سرق البامبرز بتاع نورا :-! الظاهر انه تصور ان الكيس الأزرق في شيء وشويات..الدرس Never تسيب حاجة في صالون العربية مهما كانت..الحمد لله ان الحرامي كان محترف enough انه ما يكسرش زجاج ولا بوظ center lock ولكن انا رفضت ان إللي حصل ده يبوظ علي الفسحة..منطقي في الحياة ان طالما بنتي ومراتي بخير يبقى طظ في اي حاجة تانية
الرخم بجد موضوع الجمرك ده..بقى في حد يجمرك وهو لسه في بلده..ده حتى الحاجة هناك مش رخيصة اساسا..بس انا مجمركتش بس برضة متغاظ..وانا راجع عديت على أبو رشا (بتاع السمك) في الأسماعيلية..ورجعت إلى بيتي بحمد الله سالما غانما ومعي انفلونزا مبهدلاني وانا باكلمكم دلوقت