حركة نص كم

**رزق** · 22-12-2009 04:54 PM

السلام عليكم,
وديت العربية لميكانيكي بتعامل معاه واتفقنا حيغيارلي سير الكاتينا وسير الدينامو وأنا قلتله شللي كل الزيوت اللي فالعربية وأمت جايبله زيتي أنا يحطهالي وغيرنا فلتر زيت.

لحد هنا والكلام زي الفل.

جيت النهاردة , أول مرة اسوقها من ساعتها , طلعت مشواري اليومي..وابتديت الحركات..ساعات..لما أجيب غيار واجي ادوس بنزين يقوم صوت الموتور يعلى قوي والربم معاه والعربية زي ما هي..كإني دايس بنزين مع دبرياج بظبت

لما أشيل رجلي من عالبنزين في وسط مالموضوع ده شغال يقوم الربم نازل ل 2 مثلا من 5 بسرعة قوي..أحط رجلي تاني نفس الحوار يقوم طالع 3-4-5 بسرعة قوي وصوت عالي طبعا بس في نفس الوقت العربية بتزحف.

عملت معايا الموضوع ده بتاع 4 مرات في طريق 100 كيلو.

اخطرهم على طريق الواحات باخد يوترن زي كل يوم ..الفرق المرادي إني اخدتها وكنت مجهز تاني, سبت الدبرياج وبدوس بنزين...ولا كاني هنا..الموتور بيجاهد
بس العربية ماشية تاتا تاتا.

جبت تالت مفيش..جبت أول برده ملوش فيه مش ناوي يتحرك..قعدت اكارك فدواسة الدبرياج وحاول ازق فيها لفوق برجلي كانت راجعة في مكانها الطبيعي..فرامل يد ونازلة عالآخر..
طبعا المقطورة اللي ورايا كانت جاية بتجري وانا ماشي عالشمال قدامها على 30 مثلا ولولا ستر ربنا وإني لزقت في الرصيف كان شالني.

أحب اقول إن العربية عمرها معاملة معايا كده خالص..كان الموتور الحاجة اللي أنا معتز بيها في العربية دي جدا..مطيع وتمام قوي..

المهم رجعت عالميكانيكي مالقيتش بس الحاج والده,اللي برده أسطى بص كده وقاللي شكل الإسطوانة بتاعت الدبرياج اتكلت..قلتله طب إزاي دي كانت شغالة زي الفل لغاية ماجبتهالكو قاللي ماهو ممكن عمرها يتاصف في أي لحظة.

قلت لازم ارجعلكوا استشركم.

عذرا للاطالة

**khalid9411** · 22-12-2009 05:09 PM

اولا /اكبر غلط اللى يسيب العربيه عند ميكانيكى ويمشى غلط غلط لازم يقف على حاجاته ويشوفها بتعمل فيها ايه مش فاضى لا تشتغل فى العربيه الا لما تفضى ده نصيحة لله تعالى
ثانيا/ روح لميكانيكى تانى يشوفلك السبب هل هى صح الاسطوانه ولا ايه بالظبط ما كنتش اسطوانه اكشف اسكنر
ثالثا/ لو اسطوانه ابقى غير بالمرة الديسك والبليه مع الاسطوانه ويشكف على الفرش ومعك الله

**رزق** · 22-12-2009 05:14 PM

المشاركة الأصلية كتبت بواسطة khalid9411

اولا /اكبر غلط اللى يسيب العربيه عند ميكانيكى ويمشى غلط غلط لازم يقف على حاجاته ويشوفها بتعمل فيها ايه مش فاضى لا تشتغل فى العربيه الا لما تفضى ده نصيحة لله تعالى
ثانيا/ روح لميكانيكى تانى يشوفلك السبب هل هى صح الاسطوانه ولا ايه بالظبط ما كنتش اسطوانه اكشف اسكنر
ثالثا/ لو اسطوانه ابقى غير بالمرة الديسك والبليه مع الاسطوانه ويشكف على الفرش ومعك الله

شكرا لردك,
أنا ماسبتهاش عنده ومشيت أنا كنت واقف معاه في كل حاجة بس منحيا el technical أنا طبعا مش عارف هو كان بيعمل إيه..بس في جميع الأحوال كان شغال في السيرين بس, مجاش ناحية الدبرياج ولا الفتيس.

**MMamdouh** · 22-12-2009 05:19 PM

اسطوانة دبرياج

MMamdouh

**samirayad** · 22-12-2009 06:19 PM

جيت النهاردة , أول مرة اسوقها من ساعتها , طلعت مشواري اليومي..وابتديت الحركات..ساعات..لما أجيب غيار واجي ادوس بنزين يقوم صوت الموتور يعلى قوي والربم معاه والعربية زي ما هي..كإني دايس بنزين مع دبرياج بظبت

غالبا
سير الكاتينه مش راكب صح
والتقسيمه مش مظبوطه

**رزق** · 22-12-2009 06:23 PM

المشاركة الأصلية كتبت بواسطة samirayad

غالبا
سير الكاتينه مش راكب صح
والتقسيمه مش مظبوطه

واللهِ يا باشمهندس نفسي كلامك ده يبقى فعلا صح عشان ده يبقى مقبول فعلا..هو لعب في السير مجاش ناحية الفتيييييييييس

وشكرا ل رد حضرتك.

**samirayad** · 22-12-2009 07:01 PM

واللهِ يا باشمهندس نفسي كلامك ده يبقى فعلا صح عشان ده يبقى مقبول فعلا..هو لعب في السير مجاش ناحية الفتيييييييييس

ماهى ملهاش تفسير غير كده

أنت رايحله والعربيه سحبها تمام
بس رايح تغير السير كنوع من الأمان
وأيه اللى ممكن يربك العربيه ( بمعنى أصح آداء المحرك )

خلل فى تركيب وضبط السير ده بالذات
دا أسمه سير التوقيت timing belt

**رزق** · 22-12-2009 08:39 PM

لسة راجع حالا من ميكانيكي تاني في بين السرايات.
من قبل ماتتحرك متر, قعد يجرب كده في الدواسة...قاللي بص دي اسطوانة مش محتاجة كلام..كلمتين كده مافهمتهمش (كان معايا ابن عمي فهمهم قال له تمام)
مشي بيها بتاع 10 دقائق ولل اسف معملتش معاه الحركة إياها..شرحلي بقى من وجهة نظره المشكلة.
أما بنقل و الموتور شغال جامد بتظهر المشكلة, عزم الموتور بيخلي السليبينج ده يحصل.

الظاهر للاسف إنه مش في الكتينا مع إن كان نفسي المشكلة تبقى منه عشان ماروحش للميكانيكي ده تاني.

عامةً حاروحل للتاني الجمعة اجاية اغير الطقم كله.

ياريت المشكلة تختفي بعدها.

اشكركم وحقولكو عالنتيجة إن شاء الله لما اغيره.

أجيب طقم دبرياج أصْلي منين ياريت؟