الموضوع: يااهل الخبرة مارايكم فى سيارة تيجو

السلام عليكم ورحمة اللة وبركاتة

انا معايا التيجو اتوماتيك 4x2 منذ1/1/2009 وعامل بيها حتى الان اكتر من10000كيلو متر وبركبها انا ومراتى، وجربتها فى السفر(4مرات)وداخل المدينة، وبالطبع مريت على مراكز الخدمة، يعنى اتعرضت لكل الظروف معاها تقريباً. علماً بان علاقتى بالسيارة الاسبيرنزا بدأت منذ 7/11/2006 وهو تاريخ استلام اول سيارة اسبيرنزا اشتريها، علماً بان التيجو هى ثالث سيارة اسبيرنزا اركبها بعد (516،620) ،يعنى تقدروا تقولوا خبرة فى الاسبيرنزا او ادمان.

أولاً/ تجربتى مع الاسبيرنزا بشكل عام اقدرالخصها فيما يلى:

• السيارة الاسبيرنزا سيارة بدرجة جيد مرتفع وليس امتياز.
• اغلب مشاكل السيارة-ان وجدت - ترجع الى التقفيل المحلى وليس مشاكل فنية.
• الاهتمام بالسيارة والخدمة يتحسن من جانب الوكيل بشكل كبير يوم بعد يوم، ولكن المشكلة فى الناس - على طول معترضة.
• السيارة متينة جداً وثابتة جداً ودرجة الامان فيها عالية جداً،والمشكلة فيها لو جدت بتكون محصورة بشكل كبير فى العفشة،بتتفكك بسرعة شوية.
• نقدر تقول ان السيارات اليابانية او الكورية اكثر جودة- ولاكن موش بدرجة فرق السعر العالى(مثلاً الفيترا المعادلة للتيجو وبنفس الموصفات تقترب من200 الف جم - وهى احسن من التيجو، بس موش بدرجة فرق يصل الى ضعف السعر).
• يعنى انتى راكب سيارة بمواصفات وامكانيات اكثر من السعر المدفوع فيها تحت اى مسمى – ودة الخلانى بغير بنفس النوع (مناسب جداً لامكانياتى وموش ممكن يتناسب فى اى عربية تانية).
• اعادة البيع ليها وعن تجربة جيدة جداً.
• معظم الناس العيبت فيها اصلاً لم تركبها - واعترضت عليها من باب الاعتراض وبس.

ثانياً/ بالنسبة للسيارة التيجو:

• ارتفاعها وحجمها وامكانيتها، تجعل قيادتها ممتعة جداً ومناسبة جداً لشوارع مصروسعرها لمثيلاتها ببلاش ، وطبعاً مراتى بعد سواقتها باعت عربيتها الاسبيرنزا516 واستولت عليها، لسهولة سواقتها لان ابعادها مع ارتفاعها وحجمها بتسهل التحكم فيها خصوصاً مع شوارع وزحمة مصر وارتفاع الارصفة، وانا سوقت على طريق العين السخنة على سرعة اكتر من 170 كيلو متر ، ومكملتش عشان مراتى كانت جنبى وخافت.
• طبعاً فى تحميل الشنط اوالاشخاص وخلافة - بتشيل بتشيل (عربية نص نقل)- خصوصاً لو تم طى الكراسى الخلفية.
• مشاكلها منحصرة فى عيوب التقفيل المحلى ، زى الابواب بتشخشخ شوية عن القفل والفتح والزجاج نازل والابواب الخلفية تقيلة شوية فى الفتح والقفل - وهى عيوب بسيطة وموش فى كل السيارات- وبتحتاج تربيط عفشة بسرعة شوية .
• التكييف كافى واستهلاك البنزين بالنسبة للمحرك ال2000 سى سى معقول وموش اكتر من مثيلاتها اوى.
• من الاخر هى سيارة مناسبة جداً وجيدة جداً وليست ممتازة وموش ممكن تركب اى سيارة بدفع ثنائى وبالامكانيات والكماليات وقوة المحرك دة بالسعر دة .

فاللى عاوز يشتريها يتوكل على اللة وميدقش فى الملاحظات البسيطة الممكن يلاقيها، وهى على فكرة ممكن تلاقيها العربيات الاخرى اسيوية او اوربية - بس احنا موش بنسامح على اساس انها صينى ولو فى عربية تانية بنقول عادى.

واى استفسار انا تحت الامر،،،،،،،،،،،،،،،،،،

اذا كان موضوع السيارة الركبتها قبل الاسبيرنزا هيفرق معاك، احب اقولك انى ركبت الاتى(فيورا/فورد/بولو/اوبل/ابيزا/نوبيرا)- يعنى من الاخر ركبتها بعد عربيات محترمة ، وبالتالى لما اقول عليها جيدة موش عشان اول مرة اركب عربية او مشفتش عربيات قبل كدة،بس انا احب احكم على الحاجة لما اجربها بنفسى موش لما واحد فى الشارع الورانا يجربها، وفى النهاية دى اراء واختلاف الراىْ لا يفسد للود قضية.
وكل سنة وانتى طيب،، واشكرك على المشاركة،،،،،،،،