اخيرا غيرت رشاشات النوبيرا
انا من ساعة ما جبت العربيه و انا حاسس بمشكله فى الرشاشات طبعا مشكلة الدوارة الشهيرة و استهلاك البنزين الفلكى العربيه كانت بتعمل 200 كم /28 لتر اى ما يعادل 7كم/لتر مع العلم ان دة جوة البلد و عربيتى اتوماتيك.
المهم من يومين بعد الشغل خدت القرار و نزلت الحرفيين و بدأت ادور على رشاشات BMW m40 و لقيت تفاوت غريب فى الاسعار اللى يقول 300 و دة 250 و انا عارف ان تمنهم 200 جنيه المهم دورت لحد ما جبتهم بـ200 و الراجل كان محترم فكهم قدامى من موتور و اداهملى بالمسطرة.
و رحت للميكانيكى بتاعى امبارح و يالا يا اسطى على سمى كدة و ركب. طبعا كعادة كل الصنايعيه لازم يفتكسو يا باشا دول مش بتوعها و جاب البتاعة اللى بيقيس بيها وعمل فيها مهندس وقالى فيه فرق بتاع 2 مللم و قالى كدة الرشاش هينفس.
يا عم على ركب و مالكش دعوة انا مركب نفس الرشاش قبل كدة فى نوبيرا ولانوس المهم الراجل ركب و الرشاش ركب زى الفل و جربنا العربيه اول فرق حسيته ان العربيه دارت من اول تكة ودة غريب على النوبيرا.
المهم صوت العربيه مكانش مريحنى قام جالى جيب منظف رشاشات و اعمل مشوار حلو و العربيه هتتظبط معاك المهم انا لسه بجرب و هقولكو على الاخبار ومعدل الاستهلاك للبنزين اول ما اخلص تجارب.
كان ليا استفسار و احنا بنركب الرشاش كشفنا على البوجيهات و لقيتها NGK R 2 شمعه .هل يا ترى ممكن الرشاش 2 شمعه يكون مزود استهلاك البنزين و الافضل اركب البوجيه العادى 1شمعه ولا اسيب الـ2 شمعه؟