فكرة مشروع "إعمل كاركير عربيتك بنفسك" لنايل موتورز
مساء الخير علي كل الناس الجميلة
انا بشوف كتير في المنتدي ناس بتسأل علي أماكن للكار كير في القاهرة ولا يخفي عليكم إن أسعارها عالية جداَ إضافة للنتيجة اللي مش مضمونة .. و أقرب واحد بيعمل كاركير مضمون و أسعاره ممتازة و 100 100 هو باشمهندس تامر في الإسماعيلية.
فا انا فكرت إن نعمل مشروع تعاوني كدة بينا و بين بعض .. لو حد عنده مكان يصلح لعمل الكار كير يكون فيه مصدر كهربائي مثلاَ قدام البيت واسع أو جراج خاص .. ممكن يساهم معانا بيه يوم في الأسبوع لوقت معين أو نأجره منه لوقت معين يوم واحد في الأسبوع برقم رمزي و يتم تنظيم الموضوع عن طريق الحجز .. و يكون فيه إشتراك رمزي في المشروع بيتدفع مرة واحدة في الأول .. نشتري بيه تلات صواريخ تلميع black&decker لعمل البولش و التشميع بحيث بدل ما كل واحد يبقي محتاج يشتري واحد لوحده (سعره 275 جنيه) و فين و فين اما هيستعمله .. نشتري كام واحد و نستفيد بيهم كلنا مقابل تمن زهيد جداَ .. و يتوزع التلات صواريخ دول علي تلات أماكن محتلفة في القاهرة لخدمة أكتر من منطقة.
و من خلال المواضيع في المنتدي اللي بتتكلم عن الكار كير .. نادر نبيل عمل موضوع و انا عملت موضوع و أستاذ توت عمل موضوع مفصل عن غسيل السيارات .. هنتكلم عن منتجات الكاركير المطروحة في السوق بحيث ميبقاش مفروض عليك المنتج اللي بيستعمله المكان اللي هتعمل عنده .. و تبقي ضامن المصدر و جودة المنتج و كمان فيه أنواه بوليش ممتازة بتتباع حسب لون العربية .. و من خلال المواضيع دي تعرف كيفية إستخدام المنتجات دي و إديها !
يعني كل واحد يشتري المنظفات و الملمعات بتاعته و ييجي يلاقي الصاروخ و ينطلق .. الملعات و المنظفات ذات الجودة العالية هتشتريهم أول مرة هتلاقي نفسك إتكلفت تمن عمل كاركير في مركز متخصص .. بس الفرق إنهم هيقضوك لمدة 6 مرات كمان و يمكن أكتر .. لذلك لو حسبتها علي المدي الطويل هتلاقي مرة الكار كير الكامل للعربية بتقف عليك ب 60 أو 70 جنيه مثلاَ ! تشميع و برة و جوة و فرش و كله و دي ممكن تدفع فيها 250 جنيه برة .. إلي جانب إحساسك بالإنجاز و التحول اللي عملته في العربية بنفسك! لأن لا يحك ظهرك مثل ظفرك.. و في نفس الوقت متلاقيش الجيران كلهم في شارعك بيتفرجوا عليك و إنت مشقلب العربية و شغال فيها وقت كبير (مالوا ده ياخويا هو يعني أول واحد يجيب عربية!)
إيه رأيكم في الفكرة و يا تري ممكن ننفذها ولا لأ؟
