بعض الأخبار السريعة عن سوق السيارات
انهاردة كنت بعمل لفة في التوكيلات كدة عشان ببص علي عربية .. فا عرفت شوية حاجات جديدة
- اول حاجة بالنسبة للدايهاتسو شاريد .. مسئول في توكيل دايهاتسو فرع المهندسين قاللي ان خلاص العربية مش هتنزل مصر تاني اصلا لأنها بقت 1100 سي سي و سعرها علي جدا في اليابان و لو نزلت مصر هتبقي قريبة من الفئة السعرية للسريون فا مش هتحقق مبيعات ..
و لكنهم بيدوروا في امكانية ان ينزلوا موديل تاني غير الشاريد في خلال شهر فبراير القادم انشاء الله يكون في نفس الفئة اللي كانت فيها الشاريد سواء السعر او السعة اللترية للمحرك . يعني مفيش دفعة شاريد جديدة .
- الدفعة اللي في السوق من السيارة شيفروليه سبارك اخر عربيتين منها اتباعوا من التوكيل امبارح و الدفعة الجاية نازلة اول السنة الجديدة ( كمان شهر ) .. و لكن العربية لسة موجودة عند بعض المعارض و بتبيعها اغلي 3 الالاف جنيه .. يعني ب 58
- صالة عرض سوزوكي اللي كانت في شارع رشيد في المهندسين قفلت و فتح مكانها صالة عرض لتوكيل عربية اسمها chana و دي عربية صيني جديدة واخد توكيلها (سعودي) برده اللي هو واخد توكيل سوزوكي .. العربية نفس امكانيات السبيرانزا الهاتشباك تقريبا و بتنافسها .. 1300 سي سي فيها ايرباج و ايه بي اس و سي دي بس اعتقد انها اوسع شوية خصوصا الشنطة اكبر من السبيرانزا بكتير .. و الموتور موتور سوزوكي بالينو .. و نازلة بسعر 53 الف .. و اعتقد انه فقط بيستغل ان مفيش اسبيرانزا في السوق دلوقت .. و ان اول ما الدفعة الجديدة تنزل كمان 3 شهور العربية دي كمان هترخص عشان تنافس .. و العربية الصيانة بتاعتها هتبقي في ورش سوزوكي .
- ارتفع سعر الكيا بيكانتو من التوكيل نفسه عشان يبقي 61 و نص هاف اوبشن .. و 64 كاملة .. في مقابل ان الضمان اصبح خمس سنوات علي العربية .