الموضوع: إيه أكتر كائن بتخاف منه وانت سايق ؟

انا بخاف من اللى قاعد جنبى

المشاركة الأصلية كتبت بواسطة hemavet

العجل ، فالعجل ثم العجل

بس دول بأخاف منهم وأنا واقف بالعربية مش وأنا سايقها

لأن آخر خدشين (والخدوش الوحيدة للأسف فى العربية بعد ما شديتها) حصلوا وأنا واقف فى إشارة وفى كل مرة كان واحد بعجلة بيحاول يحشر نفسه بينى وبين الرصيف علشان يعدى ...
وواحد منهم (عنده 12 سنة) بعد ما حكنى وأنا واقف زعق فيا وقال لى ايه يا عم مش تحاسب ...

فعلاً ملهمش أمان خالص بتوع العجل لأن حجمه صغير وبيخش في أي مسافة بين عربيتين ، وطبعاً العربية هي الضحية

المشاركة الأصلية كتبت بواسطة pro_samir

الحاجات دى كلها مقدور عليها

لكن اكتر حاجه بقيت اخاف منها الظلط ! جالى فوبيا منه بجد

أول مره الأزاز اتكسر وسرطن بسبب ظلطه طارت من عربيه تريلا خد شويه مطبات هوا

وتانى مره عربيه ماشيه قدامى داست على ظلطه طارت فى الأزاز بتاعى زى الطلقه بس الحمد لله كنت ركبته تريبلكس

بس فعلا جالى فوبيا من الظلط لدرجه انى لو معدى من عربيه شايله ظلط أو فى رمل خفيف طاير وعامل صوت ببقى شبه مغمض عنيا وبجرى على قد ما اقدر علشان اعدي

ياه .. ده الظلط مستقصدك يا باشا ، ليك حق تترعب منه ، وفعلاً الواحد لا إرادياً لو فيه شوية رمل أو حصى جايين في وشه تلاقيه لا إرادياً بيغمض عنه زي ما يكون مفيش قزاز

المشاركة الأصلية كتبت بواسطة newuser2009

- نص نقل زي ما قال الاخ abdo_eldesokey
بترعب منهم لما تلاقي واحد منهم راكب على شنطة عربيتك وبيرعشلك عشان تعديه
بصراحه بيعملولي ارهاب

المشكلة إنه كده بيربكك ومبتعرفش تتصرف كويس ، كائنات غريبة

المشاركة الأصلية كتبت بواسطة amrico

- تريلات: اكتر من 50% منهم بيسوق تحت تأثير المخدرات
فعلاً بتحصل كتير تلاقي واحد ماشي بالتريلا وهيا بتتطوح يمين وشمال ، بيبقى إعصار محدش عارف يوقفه

- أوتوبيسات: مابمشيش على يمينه ابدا، توقع اي حد ينط منه فجأه ، سواء كان راكب قرر ينط، او حرامي اتقفش بينشل.
آه المصريين ميتوصوش في اللامبالاة دي

- ميكروباصات: العن طايفة بالنسبة لي، غرز تلاقي، مفيش انوار اصلا في العربية ولا إشارات تلاقي، افترا وركن فجائي تلاقي، مش عارف اقول ايه ولا ايه.
هو الموضوع عندنا في المنصورة أقل لأن الميكروباصات معظمها تويوتا ، مفيش الترامكو ، فغالباً الميكروباص بيبقى فيه كام لمبة لسة منورين ، والبلد أساساً ضيقة جداً ومفيش مجال للغرز خالص

- نص نقل: اتفق مع الأخ اللي بيقول انهم بيركبوا على شنطة العربية، ساعات كمان ببقى سايق عربيات هاتش باك، فابيكون مشرف معانا في الصالون، وبيكون تذكير ليك بأشكال علامات العربيات، مثلا ممكت تلاقي حرف t كبير في المرايةاللي في النص، تعرف ان دي تويوتا ، او حرف d بحجم المراية كلها تعرف انها دايهاتسو، وهكذا، ادينا بنتسلى
والله بيبقى ناقص تمد إيدك تعزم عليه بسندوتشات

- ملاكي (شباب): بعضهم منظره مستفز اوي وخصوصا اللي بيبقى مايل بزاوية 45 على المخدع اللي جنبه وماسك الدركسيون بطراطيف صوابعه، ومديها اغاني بصوت عالي، وبعضهم محترم جدا
ده كده يبقى شاب فانكي

- ملاكي (كبار السن): احتراما للسن، لازم نوسعلهم، لكن الغريب ان بعضهم بيفتري اوي في الطريق وبيعمل حركات تكسف بصراحة.
من ضمن الأسباب كمان إن الي سايق ده ممكن يكون والدك أو جدك ، فبالتالي بتعمل المعروف عشان تلاقيه في أهلك

- ملاكي (ستات): البعد عنهم احسن
شايف إجماع ع النقطة دي

- تاكسيات: حسبي الله ونعم الوكيل، هو الوحيد اللي شقيان، وكلنا الست الوالدة هي اللي شاريالنا العربيات.
اسطوانة واحدة كلهم متبرمجين بيها

- توك توك: بستغبى عليهم بصراحة، وخصوصا لو كان ماشي عكسي في التراب اللي على يمين الطريق، خصوصا بلليل بروح ضاربله كل النور اللي في العربية في وشه. وابدأ اجنح يمين شوية عشان ارعبه.
يستاهلوا أكتر من كده

- بني آدمين: لازم نقدر شعورهم ونصبر عليهم خصوصا في المطر او الحر، ونفتكر النعمة ان احنا قاعدين في العربية مرتاحين وهم تعبانين برة، بس ياريت يلتزموا بأماكن العبور(ان وجدت) ولو عدوا الشارع يعدوا بشكل عمودي، مش بشكل قطري.
بالظبط .. ربنا يباركلك على الجزئية دي ، كفاية إنك معزز مكرم في عربيتك وهو الله يكون في عونه قدامه ساعة في الشمس على ما يركب


وعشان شغلي بسوق كتير جدا في الصحاري وعلى طرق صحراوية (في مصر وخارج مصر) انا هاضيف حاجة مرعبة جدا
الجمال: الجمل خطير جدا للي بيمشي على طرق صحراوية لأنه فجأة بيقرر انه يعدي الشارع وساعتها عينك ماتشوفش الا النور، والأخطر انه بالليل ساعات بيحي يقعد على الأسفلت متفهمش ليه.
فعلاً الموضوع ده بيحذروا منه في الطرق الصحراوية ، واحد قريبي في الجيش خبطوا في جمل قلبلهم العربية
ربنا يفاديك منهم يا باشا

المشاركة الأصلية كتبت بواسطة amrbakly

أولهم الستات و سواقتهم العجيبة اللي مرة واحدة تجيب من اليمين للشمال في ثانية


ثانيا البني أدمين اللي بيمشوا في الشوارع و لو ضربت فرملة قدامة فجأة يبصلك و كأنة شارع اللي خلفوة رغم أن الرصيف فاضي و كبير و زي الفل، و اللي عايز يشوف أتنح خلق الله ينزل ميدان الجيزة و يا سلام لو واد من شباب صفط اللبن و جايب بقي جاكيت بيلمع من سوق غزة و معاه المزة (اللي طبعا لابسة البادي الكارينا الأصفر الفحفحي و ضاربة شعرها اوكسوجين عند بتاع الدوكو و حاطة في وشها ربع علبة بودرة تلك) و عامل شعرة صابايكي (سبايك يعني شوكة ربنا يحفظنا) و ينقرك حاجب محترم علشان متخيل انك طمعان في المزة بتاعتة، ولا الشاب اللطيف اللي يطلعلك مرة واحدة من تحت الأرض و يتحول إلي لواء مرور علشان يعدي قافلة ستات و بنات و عيال و كأنة الرجل الأخضر !
هههههههههههههه ... بجد أسلوبك جامد

اما فيما يخص التوكتوك فأنت غلطان انك بتمشي وراة و هو بصراحة اكثر الناس أدبا لأنة ملتزم باليمين دايما ولا يظهر في الشوارع الرئيسية
أيوة بس ده يا باشا في الشوارع الكبيرة ، جرب تروح بلد قايمة على التوكتوك هتلاقي عشرات من التكاتك ماشية في جميع الاتجاهات

المشاركة الأصلية كتبت بواسطة ba7ary

الموضوع جميل والتعليقات كلها جميلة جدا
أكتر حاجة بخاف منها وأنا سايق هم المشاة للأسباب السابق ذكرها بالإضافة إلى إنه لو حصلت مشكلة لا قدر الله فإنت بتتعامل مع أرواح بشرية مباشرة يعني الخسارة بتبقى مؤلمة نفسيا جدا

متفق معاك .. بس الي سايق عجلة بردوا أو موتسيكل بيكون في خطر ، يمكن كمان أكتر من الي ماشي على رجله ، لأن الخبطة في الحاجات دي بتبهدل الراكب جامد ، وكمان مش بيعرف يفادي عربية بسهولة زي الي ماشي على رجله

المشاركة الأصلية كتبت بواسطة mostafa_elhussain

مرره زلطه طارت بنفس الطريقه وخبطط في وش والدي وهو سايق قريب من عينه
بس الحمد لله ربنا ستر
الحمد لله على ستر ربنا

اسوأ حاجه بكرهها كره العما هي التكاتك تحس انها صراصير ولازم يمشي عكس
وبخاف من اي مخلوق متخلف يمشي عكس لان ده بني آدم غبي لدرجه زياده عن اللزوم ولما تكلمه ويقولك واسعه يا استاذ يبقى نفسك تنزل
وبخاف من العجل اللي بيقع قدامك مره واحده وطبعاً لو خبطه الناس هتتلم وتظبطك انت والعربيه بعلقه محترمه ماهو طالما انت راكب عربيه يبقى انت اللي غلطان

سبحان الله طلع كل الناس متعقدة من العجل مش أنا بس :b4_611:

المشاركة الأصلية كتبت بواسطة zalpany2000

الOpject الاولاني طبعا طبعا هو الرداااااار

و بعدين البني آدمين
و دول بقي معظمهم عالم ظريفة جدا جدا
فيه ناس بتعدي الشارع في الحتت اللي لازم يتقال عليهم فيها مخابيل.. زي .. علي كوبري الدائري مثلا ... في منزل اي كوبري ... تلاقيه بيجري في صلاح سالم ... تلاقيه لابس اغمق جلابيه عنده ولابس عمة سودة ويمكن داهن وشه اسود و بيجري يقطع الصحراوي الساعة 2 بالليل -للي مش متمرس ممكن يصنف الكائن ده علي انه شبح-
هههههههههههه ، بس فعلاً الي يعمل كده ملوش دية

و فيه نوع تاني بيمشي بمبدأ .. انا امشي و العربيات هي اللي تقف لما تشوفني :)
اما النوع التالت فنوع ظريف جدا بقي .. متخيل نفسه هوجان في زمانه ... يعدي الطريق و يرفع ايده يشاورلك انك تقف ... ولو انت شديت شويه تلاقيه اتسمر في مكانه و مادد ايديه الاتنين قال انه يعني هايوقف العربية ؟؟؟؟
فعلاً فيه بني آدمين حاسين إن الطريق معمول عشانهم والعربيات هي الي المفروض تمشي ع الرصيف

النوع الاخير بقي ده غريييب جدا .. وبدأت ألاحظه مؤخرا ... ناعامات بتعدي الطريق ... مبدئه ... طالما انا مش شايف العربية .. تبقي العربية مش موجوده اساسا :) .. زي النعامة اللي بتدفن راسها في الرمال لما تحس بالخطر.. تلاقي ده بيعدي ووشه الناحية التانية .. مابصش ناحية اتجاه سير العربيات اساسا .. ولو غلط و بص في الاتجاه ده تلاقيه يروح مغير علي طوول اتجاه راسه ... وباصص الناحية التانيه ويقنع نفسه ... انه ما شافكش .. انت شبح .. انت شبح .. هو اكيد ماشافاكش ...
انت ما شاء الله مصنفهم أحلى تصنيف ، ضيف عندك كمان الي يبدأ يعدي الشارع وهو باصص الناحية التانية ، وفجأة يبصلك ويتخض زي ما تكون انت الي غلطان إنك قطعت عليه خلوته

المشاركة الأصلية كتبت بواسطة ahmed2y

باختصار انا بخاف من كل انسان جاهل ومعندوش زوق ومبيعرفش فى قواعد المرور والادب والذوق سواء راكب نقل تقيل او حتى عجلة لان مهما كان العيب بيبقى على الانسان من الجماد

للأسف دول ما لا يقل عن 75 % من المصريين

المشاركة الأصلية كتبت بواسطة mrghost

التوك توك والموتوسيكلات والعجل والميكروباصات

عفاريت الأسفلت

المشاركة الأصلية كتبت بواسطة ams

انا بخاف من اللى قاعد جنبى

غريبة دي .. يا ترى إيه الأسباب ؟؟