ازيكم يا شباب ,
طبعاً انتم عارفين موضوع تعديل الفرامل في اللانوس ,
و انا الفرامل بتعاتي مش مريحاني و قلت ربنا يسهل و أعمل موضوع التعديل ده ,
بس طبعاً لازم أغير الجنوط و بالتالي الكاوتش , و انا الكاوتش عندي كان عامل في حدود 33 الف ,
و كمان لقيت الميكانيكي بيقوللي نبقى نغير الطنابير علشان بدأت تضعف و طبعاً التيل ,
فقلت طيب اعمل موضوع التعديل على مراحل ,
و بدأت بتغيير الجنوط و الكاوتش , و علشان الموضوع ميفتحش فرحت لواحد أعرفه بتاع استيراد و طلبت منه جنوط حديد استيراد , فجابلي 5 جنوط حديد استيراد و فيهم جنطين فيهم كاوتش ,
المهم انا رحت عند بتاع كاوتش و قلتله اكشف على الكاوتش ده فشافهم و قاللي دول مشيوا حاجة بسيطة و مفيهمش غير لحام واحد خابور , فقلت على البركة و اشتريت فردتين جديد كومهو و خليتهم قدام و استخدمت الاستيراد و خليتهم ورا و جبت واحد تاني مستعمل استبن , و بتاع الكاوتش خد الكاوتش القديم بتاعي بالجنوط ,
و على فكرة مقاس الكاوتش اللي جبته 185/65/14 و كنت قلقان من الثبات بتاع المقاس 65 و لكني فضلتهم علشان العربية تبقى اريح في المطبات , دا غير إن الكاوتش الإستيراد كان نفس المقاس ,
و بعد تجربة العربية لقيت تحسن في المطبات بالرغم من إني كنت بعاني من صوت دبدبة قبل التغيير ده و الصوت قل كتير ,
طيب بالنسبة للثبات , جربت إني اجري بالعربية على الدائري و مشيت على 135 و الطريق مكنش يديني اكتر و لقت الدنيا حلوة , و لقيت ملف في الطريق و انا ماشي فأخدته بنفس سرعتي و محستش بعدم ثبات ,
دا غير إن العربية بقت عالية شوية و دي حاجة حلوة برده , و انا عارف إن قراءة عداد السرعة ممكن ميكونش مضبوط و لكن مش مشكلة كبيرة لأني معظم مشاويري جوه البلد ,
أرجو إني مكونش طولت عليكم .