احسن شركة للتأمين على السيارات

**Hanan** · 04-12-2007 11:10 AM

الاخوة الاعزاء , السلام عليكم
ارجو مساعدتى فى اختيار احسن شركة تأمين على سيارة لانسر 2008 "1600" سوف استلمها ان شاء اللة هذا الشهر
من حيث:
1- احسن سعر (نسبة التأمين)
2- الخدمة و التصليح فى التوكيل
3- شركة ذات سمعة طيبة
و هل لو حدث شىء لاقدر اللة هل لابد ان ادفع انا ثم بعد فترة اخذ المبلغ المدفوع من التأمين؟

شكرا جزيلا

**seka** · 04-12-2007 02:34 PM

يا استاذه حنان كل شركات التأمين زى بعض مافيش فرق لانهم مش هما اللى بينظمة القوانين لا اللى بينظم القوانين الحكومة لذلك كل زى بعض وكمان سعر تأمين نفس الحكاية سواء كان هتأمنى شامل او اجبارى والخدمة بردوا زى بعض وهما مش بيصحلوا بس هما اللى بيحسبوا ع الفاتورة اذا كان التأمين شامل واشهر الشركات هم مصر انا مأمن فيها اجبارى والاهلية والشرق ولو حضرتك عايزة اى معلومة اخرى بشأن هذا الموضوع او موضوع اخر ستجدى من يرد عليكى سواء انا او الناس المحترمين اللى موجودين فى المنتدى

**Heshaam** · 04-12-2007 03:05 PM

ناس كتير بتشكر في كونتاكت - وإن كنت لم أجربها

أنا جربت مصر للتأمين؛ والتعامل معاهم محترم جدا؛ والتصليح في التوكيل مباشرة - ولكن أسعارهم غليت مؤخرا. (لا قدر الله الله في حالة الحوادث أو الخبطات الخفيفة؛ يتم القيام بمعاينة لدى التوكيل من قبل أحد مهندسي الشركة؛ وبعد إنتهاء التصليح يدفع العميل قيمة التصليحات ويسلم الفاتورة لشركة التأمين ويتم أستخراج شيك بقيمة الفاتورة بعد حوالي أسبوعين).

سمعت إن فيه توكيلات بتتعامل مباشرة مع بعض شركات التأمين بحيث تقوم شركة التأمين بدفع قيمة الإصلاحات للتوكيل مباشرة دون تدخل العميل؛ وممكن حضرتك تستفسري عنها في التوكيل لو بيقدموا خدمة من النوع ده.

لا أنصح بالشرق للتأمين - عن تجربة أيضا

ومبروك مقدما على السيارة

**mohamed_rhem** · 05-12-2007 10:45 AM

كونتاكت طبعا
ده عن تجربه شخصيه والله في مهندس زميلنا في الشغل والمنتدي اسمه المهندس محمد حماد مأمن عند كونتاكت تأمين شامل بصراحه ناس محترمين قوي قالولو طالما العربيه مجبتش زيت او مياه مش شرط تعمل محضر ودا العربيه التوكيل كانت خبطه في الباب والرفرف هما اعطوه كارت يدخل بيه الوكيل كارت لونه برتقالي دخلها واتصلحت ومدفعش ولا قرش من الاخر تأمين تمام وناس كتير بتشكر فيهم
مفيش احسن منهم بصراحه

**analyzer** · 06-12-2007 01:19 AM

لا خلاف طبعا ان كونتاكت من افضل شركات التامين ولاكن سعره عالى شويتين
طيب مصر للتامين والشرق للتامين والاهليه انا مليش تجارب معاهم ومعنديش معلومه ماكده عنهم .
يتبقى الجمعية المصريه للتامين التعاونى
ارخص سعر تامينى شامل 1.6 % من سعر العربيه
لا ضرورة لمحضر الشرطه ما دام الحادث لا يزيد اصلاحه عن 10 الف جنيه
التصليح بيتم فى وقت يتراوح بين 5 ايام الى 25 يوم على حسب الحاله
يتم تحمل نسبة 30% من اصلاح الايرباج فقط
الاصلاح يتم فى مرتكز اصلاح معتمده وليس فى التوكيل
دى بعض الشروط الى انا فاكرها دلوقتى
لاحقا سوف انص عليكم الشروط والتفاصيل من واقع بوليسة التامين
اصلى انا مامن معاهم على 4 عربيات فيرنا ولانوس و 2 لانسر

**NaderNabil** · 06-12-2007 01:38 AM

المشاركة الأصلية كتبت بواسطة Heshaam

ناس كتير بتشكر في كونتاكت - وإن كنت لم أجربها

أنا جربت مصر للتأمين؛ والتعامل معاهم محترم جدا؛ والتصليح في التوكيل مباشرة - ولكن أسعارهم غليت مؤخرا. (لا قدر الله الله في حالة الحوادث أو الخبطات الخفيفة؛ يتم القيام بمعاينة لدى التوكيل من قبل أحد مهندسي الشركة؛ وبعد إنتهاء التصليح يدفع العميل قيمة التصليحات ويسلم الفاتورة لشركة التأمين ويتم أستخراج شيك بقيمة الفاتورة بعد حوالي أسبوعين).

ومبروك مقدما على السيارة

أحب أضيف ان مصر للتأمين دلوقتي بتدفع العميل نسبة 10% من تكلفة اصلاح السيارة و ده متضمن 5% رسوم ادارية و 5% نسبة اهلاك
زمان مكنش النظام كده عشان كانوا بياخدوا القطع المتغيرة التالفة ..دلوقتي بقي يديهالك و بيدفعك النسبة دي
يعني لو العربية التكلفت 20000 جنيه هتروح تدفعهم للتوكيل و تاخد شيك ب 18000 بعدها باسبوعين بالكتير

**dragonsmith** · 06-12-2007 01:28 PM

السلام عليكم،

كونتاكت غيروا النظام عندهم شوية الشهر اللي فات.
أول حادث في السنة بيتحملوه بالكامل. تاني حادث العميل بيتحمل 10% من تكلفة الإصلاح و تالت حادث 15% و بعد كده 25% لكل حادث.

بالنسبة لل airbags العميل بيتحمل 25% من التكلفة.

شكرا.

**zezo13178** · 07-12-2007 12:04 AM

الجمعيه المصريه للتامين التعاوني 115 شارع العباسيه
واحد صاحبي معاه لانسر 1600 مو 2007 لسه عامل حادثه وعملها في التوكيل وبيشكر فيهم جدا

**shawoi** · 03-04-2015 10:52 PM

تجربتي مع الجمعية المصرية للتامين التعاوني امنت على سيارة بمبلغ 117 الف جنيه والعربية عملت بها حادث وقرروا ان العربيه اهلاك كامل وقرروا لي مبلغ 80 الف وبعدها ب 3 ايام خفضوا المبلغ الى 37 الف بحجة اني غيرت الفتيس بعد الحادث وبعد اعتراضي طلبوا اعادة تقييم وجابوا مهندس تاني طلع ان التقرير كاتبينه صوري بدون معاينه فرفعوا القيمة الى 65 الف وساوموني اما تاخدهم على 65 شهر كل شهر الف او تاخد نص المبلغ وتكتب تنازل عن النص الثاني ولقيت نفسي مضطر الى الحل الاخير