سؤال في الفيزا ؟؟؟؟

**Mahmoud Saloum** · 05-12-2007 03:00 AM

اسلام باشا نصيحة من اخ ليك بلاش بلاش بلاش - انا كان معايا 3 كروت ، ماستر من CIB وماستر من City bank و فيزا من EAB قبل الدمج فى كريدت اجرى كوول والحمد لله تخلصت منهم جميعا من فترة طويلة للتالى:
1- بتصرف بدون وعى لدرجة قد تصل الى الهبل والهطل وبدون تفكير وبتحصل تراكمات مهما حاولت تمسك ايدك ودايما تقول " اجيب دلوقت وادفع الشهر الجاى" وابقى قابلنى.
2- اى كارت فيزا او ماستر بيحسب فايدة من اول يوم لو سحبت من الماكينة ( الفرق ان الفيزا منتشر اكتر فى امريكا والماستر منتشر اكتر فى اوروبا وكله حاجة واحدة)
3- اى محل او سوبر ماركت بيتعامل بالبطاقات سواء فيزا او ماستر او دينر كلوب او غيره بيضيف 1% على سعر السلع اللى بيبيعها لو دفعت بالكارت.
4- اهم نقطة السادة العلماء المبجلين قرروا ان استعمال بطاقات الائتمان جائز ومباح لو مدفعتش قرشواحد فوائد غير كده يبقى ربا بين.
5- بطاقة ال ATM تقوم بكل ما يقوم به كارت الائتمان فى الشراء والسحب حتى من خارج مصر اذا كانت master electronic فيما عدا الدفع فى الانترنت وما فيهاش فوائد لانها فلوسك.

واخيرا والله يا اسلام هتندم بعد ماتجيبها بشوية وهيا فايدتها الوحيدة الدفع عن طريق الانترنت لحاجة زى فاتورة التليفون او لبعض الخدمات وده ممكن تشترى كارت انترنت مدفوع القيمة لو عايز.

**Heshaam** · 05-12-2007 03:43 AM

المشاركة الأصلية كتبت بواسطة Shocky

اشكرك جداً على الرد و الأهتمام , وانا كدة فهمت المقصود , واعتقد ان الواحد لو عايز يريح دماغة يخلية فى ال Debit Cards احسن

بالظبط ... بس ده طبعا لواحد عنده مبلغ موفره ويقدر يسحب منه؛ إنما كارت الائتمان بينفع واحد بيجيله دخل ثابت كل فترة من شغله مثلا ومعندوش فلوس موفرها فبيمشي نفسه بالكارت.

إنما أنا رأيي طبعا إن الواحد ما يدينش نفسه إلا لما يكون مضطر

وبخصوص نوع البنك ... أعتقد إن اللي بيحدد ده نوع الحساب المسموح استخراج البطاقة عليه ومعدل العائد.

**Tamer-Ezzat** · 05-12-2007 03:54 AM

المشكلة فى حاجة غريبة بحس بيها كل مرة بأشترى باستخدام الفيزا ... طيب مين يضمن عمره ؟ ,,, طيب 55 يوم يا عالم ... مش ممكن نقابل وجه كريم ويبقى دين ؟!!

هى أغراء فظيع بس فى يوم هو انسب يوم للمشتريات يعنى بعد تقفيل الحساب السابق مباشرة (غالبا يوم 5 من كل شهر) على حسب سياسة البنك لانها أمامها شهر كامل وبعدين 25 يوم سماح يعنى فعلا 55 يوم لكن بعد كده تطرح (30- يوم الشراء + يوم التقفيل+ 20 يوم سماح) تعرف المفروض تسدد بدون فوائد ...

طبعا لو حتستخدمها بفوائد تبقى حرام × حرام ...

طب والتقسيط على الكارت رأيكم أيه ( عندى رأى بس أحب أسمع أرائكم)

**marsguy** · 31-12-2007 04:35 AM

السلام عليكم ورحمة الله وبركاته،،،

اللي أنا أعرفه بالنسبه للـ Credit Cards إنها حرام شرعا حتى لو إنت دفعت اللي عليك قبل فترة السماح وحتى لو ما دفعتش ولا مليم فوائد. وده عشان العقد اللي إنت بتمضي عليه بتاع الفيزا عقد فيه شروط ربويه، يعني مثلا:اً

تخيل إنك راجل غني جدا ومن عيله غنية جدا وإنك إتزنقت في مبلغ 300 جنيه عشان مثلاً محفظتك ضاعت منك أو لإن البنك قافل أو أي سبب، وإنت عارف إن مبلغ 300 جنيه ده هايف جدا ولا يمثل بالنسبه لك أي مشكله في تسديده.

لو أنا جيت قولتلك أنا هاسلفك الـ 300 جنيه بس بشرط إنك لو ما جيبتليش الفلوس قبل سنتين أنا هاخدهم منك 350. (طبعا إنت هاتقول لنفسك سنتين مين يا عم دا أنا ممكن أجيبهمله بكره إن شاء الله)، لو إنت وافقت على الشرط ده على أساس إنك كده كده هاتجيبله الفلوس قبل السنتين وبالتالي مش هاتدفع فوائد اللي هي حرام، يبقى إنت كده برضه آثم عشان العقد اللي إنت وقعت عليه ورضيت بيه عقد ربوي حتى لو إنت سعيت جديا إن الشرط الربوي ما يتحققش أبدا.

الـ credit card بكافة أنواعه لعنه يا جماعه، ويمثل مصدر كبير من مصادر دخل البنوك الربوية عشان معظم الناس للأسف مش بتسدد فس الميعاد وبيدفعوا فوايد، وده يفسر الإلحاح الشديد من البنوك والإغراء اللي بيعملوه للناس عشان يعملوا فيزا.

دلوقت البنوك بتلهث ورا الناس عشان يعملولهم فيزا، واي حد دلوقت عاوز يعمل فيزا بيقبلوه.

الحل يا جماعه هو debit card ودلوقت كل البنوك بتطلعهولك مع فتح أي حساب جديد، وبالنسبه للشراء من على الإنترنت: البنوك دلوقت بتعمل كروت بتستخدم على الإنترنت فقط وبتكون كروت debit يعني بتسحب من الفلوي اللي إنت حاططها فيها فقط.

شكرا

**Moh.Fahmy** · 31-12-2007 05:19 AM

يا جماعة مافيش حرام علي المطلق و حلال علي المطلق
بمعني ان كل حاجة ممكن تكون حلال لو استخدمناها في حدود الشرع يعني مثلا النت اللي احنا داخلين عليه دلوقتي حلال عشان بنتكلم في امور مفيدة و ما بيعطلناش عن آداء فرائضنا انما لو استخدمته في المواقع اياها طبعا حيكون حرام و ستين حرام
برضه نظام الفيزا كده بمعني انه فيه شق حلال و شق حرام المفروض اني استفيد من الشق الحلال و استخدمه يعني للاخوة اللي بيقولوا انك حتي لو سددت في فترة السماح حيكون حرام عشان انت كتبت من البداية عقد ربوي ..ارد و اقول لأ انا ممكن من البداية برضه اكتب في العقد بدلا من ان يتم خصم الحد الادني في نهاية ال55 يوم سماح اكتب و اطلب ان يتم خصم المبلغ بالكامل 100% حتي لا اترك نفسي صيده للشيطان لأ انا احسم الموضوع من البداية فيقوم يجيي البنك يخصم اتوماتييك مع نهاية ال55 يوم اللي هي متسجلة عندهم في الحاسب الالي و اريح نفسي من حساب فترة السماح ازاي و ابعد نفسي عن الشبهات
نصيحتي يا اسلام ان الفيزا النهاردة اصبح لا غني عنها ابدا فأنا لا اتخيل حياتي بدون فيزا يعني مثلا لو روحت تعمل الصيانة الدورية و عامل حسابك علي مبلغ و فوجئت بتغيير اجزاء لم تكن في الحسبان فوقتها الفيزا تقوم بدورها صح و بعدين طالما انا عامل كنترول في مصروفاتي و عارف تماما اني الاشياء اللي انا باشتريها دلوقتي و ما بدفعش تمنها حدفعه بعدين من فلوسي يبقي حعرف ازاي اعمل كنترول و الله طالما انت طالب من البنك انه يخصم المبلغ اللي عليك في نهاية فترة السماح حترتاح جدا جدا و ساعتها حتكون الفيزا نعمة و ليست نقمة
و الموضوع ده انا سائل فيه شيوخ و علماء افاضل و ردوا طالما حتمشي الموضوع بالشكل ده يبقي حلال المهم انك ما تاخدش فلوس نقدا من الماكينة عشان دي بتعد فوايد من وقتها و ده حرام
اما الفرق بين الماستر كارد و الفيزا فاشتراك الماستر ارخص كثيرا من الفيزا و انا افضل الماستر عن الفيزا لهذا السبب لان السبب في ارتفاع قيمة الفيزا ان السلع التي تشتريها في الفيزا و ضاعت تكون مؤمن عليها و هذا سبب ارتفاع سعر الفيزا عن الماستر و اذا قارنت هذا بالواقع العملي فمثلا من الصعوبة انك اذا اشتريت سلع من كارفور بمبلغ 100 جنيه و ضاعت فعليك ان تحرر محضر بذلك و تتقدم لادارة البنك بصورة رقم المحضر و تدخل في اجراءات حتي تسترد نسبة من قيمة السلع المفقودة
فأذا كنت تستطيع ان تعمل كنترول فلا تتردد في استخدام الماستر كارد و لكن بالطريقة التي ذكرتها لك

و انا تحت امرك في اي استفسار

محمد فهمي

**محمد عز** · 31-12-2007 06:51 AM

أخي اسلام حمد لله على السلامة ن كنت حارمنى من مشاركاتك ومواضعيك المميزة
الكريدت كارد سواء كانت فيزا او ماستر كارد تقريبا كلها مشكوك فيها
يعنى اى حاجة فيها تسديد بفوايد تبقى ربا وحرام
وده محرمه من جميع العلماء
اما الكريديت اللى انت بتسدد كامل المبلغ خلال 55 يوم العلماء اختلفوا فيه لانك لو اتاخرت فى السداد هوا بيحسب عليك فايدة وده حرام
فالاحسن انك تبعد عنه

**Ahmed Samy** · 31-12-2007 10:16 PM

عندي واحدة على حسابي الجاري في باركليز
و منهم لنفسهم كده ,, عملولي المفتوحة دي و بعتوهالي
طبعا ماستعملتهاش خالص ولا أكتفتها أصلا
بس شايلها في المحفظة علشان أسد الدوري النجليزي شكله حلو