-
سؤال في الفيزا ؟؟؟؟
معلش إنتوا طبعا إخواتي وأنا موضوع الفيزا ده مش فاهمه شويه :-
النهارده جالنا واحد من بنك باركليز بيعرض علينا نعمل فيزا المهم هي بحوالي 3000 جنيه والسداد في خلال 55 يوما والفائدة بعد كده 1.85 % من ثاني يوم يعني على كلامه 65 قرش على الألف ، المهم هو ضمانه اللي طلبه مفردات مرتب أو فواتير خط بيزنس وبالنسبة للسحب النقدي أنا مش فاكر قال المكنة بتاخد 20 جنيه على الألف ولا على المبلغ كله لو سحبت ال 3000 جنيه ، الأسئلة بقه :-
1- الموضوع ده حلال ولا حرام ؟
2- ليه فوائد يعني لو مش حرام وإيه اللي أنا هاستفيده منها ؟
3- العرض ده كويس ولا فيه عروض من بنوك ثانية أحسن ؟
شاكر لكم حسن تعاونكم .
-
شوف يا سمسم
انا طبعا مش مفتى لكن انا عارف انك لو سددت خلا ال 55 يوم يعنى من غير ما تدفع فوائد يبقى مفيش حرمانية...
اما اذا سددت بعد ال 55 يوم (فيه ناس شايفه انها تبقى حرام وناس بتقول لأ على اساس انك بتشترى بيها سلع او خدمات يعنى كأنك بتقسط وده مفهوش حرامانية)
بس خلى بالك فيه طريقة لحساب ال 55 يوم - يعنى مش من اول ما تشترى يتحبلك 55 يوم !!
اما انك تسحب بيها كاش - نصيحة بلاش بلاش بلاش
لأن الفئدة بتاعتها يومية لغاية لما تسدد المبلغ اللى سحبته وكمان دى تعتبر قرض وانا اعرف ان القرض بفائدة حرام
نسيت اقولك انا عامل فيزا فى كذا بنك ( سويسته جينرال - Cib - سيتى بنك )
وكمان عامل باركليز بس لسه مستلمتهوش وعامل الأجراءات بقالى شهر بالظبط
-
تسلم يا محمد هو فعلا موضوع ال 55 يوم ده ناس أكدته إنهم بيحسبولك من يوم ما تشتري لغايو يوم 25 في الشهر اللي بعده باين أو حاجة زي كده يعني المهم إنهم مش 55 يوم .
طيب يعني المهم أجيبها ولا لأ ؟؟؟؟؟؟؟؟؟؟؟؟؟
-
لازم تبقى معاك طبعا لأنها بتفك زنقات كتير
-
إسلام حبيبى ذى ما أفادك تمام أستاذ محمد
أحب أئكدلك على إن لو إشتريت فى أى يوم من الشهر إنت ليك معاد على تقفيل ال statment وده مش إنت لوحدك ده موعد ثابت للبنك كله على سبيل المثال :
فيه بنوك بتقفلها يوم 1 فى الشهر و فيه بنوك يوم 5 فى الشهر
لو قولنا إنك إشتريت حاجات ب 1000 جنيه يوم 1/1/2008 و البنك بيقفلها يوم 5 كل شهر إذن المفروض تسدد ال 1000 جنيه أو الحد الأدنى لو هاتقسطهم يوم 27/1/2008
لكن لو إشتريت يوم 6/1/2008 و البنك بيقفلها يوم 5 يبقى هاتسدد يوم 27/2/2008 الحد الأدنى لو هاتقسط أو ال 1000 كلها لو عايز تتجنب الفوائد
أنا بعمل كده ببعد فى الفيزا عن الفوائد و ربنا ما يحوجنا لفوائد
لكن ليها حاجة فى الفتوى لو عملتها تتجنب الربا بس أنا مش متأكد منها
أرجوا إنى أكون أفدتك
معلومة أخيرة باركليز مش كويس فى الفيزا عن تجارب أصدقاء لى مدمنين فيزا
أقل فائدة فى الفيزا البنك الأهلى - يليه NSGB
لكن الأهلى معاملتهم وحشة و مش هاتقدر توصل لخدمة العملاء على التليفون إلا بدعاء الوالدين :)
ال CIB كويس و NSGB كويس برده
تجنب السحب النقدى من الماكينه لأنه فوائده فوريه
-
البنك الأهلى المتحد كمان فوايده قليلة ( 1.5%) (بيدى Limit مرتين زى المرتب )
ال CIB كان ممكن تسحب كاش و ميعدش الا بعد فترة السماح بس للأسف غيروها من 3 أو 4 شهور
لو حد عاوز نمرة البنت اللى عملتلى الفيزا فى الأهلى المتحد ممكن أدور عليها وأجيبهالو
-
طيب سؤال بمناسبة موضوع الفيزا
انا معنديش اى خبرة فى الموضوع دة نهائى
دلوقتى مثلا انا لو عايز اعمل فيزا .. وعايز احط مبلغ ما و ليكن 10000 جنية , عشان اعمل بية حساب و استلم فيزا
هل دة لة دعوة بكلام الاستاذ اسلام شاهين ؟؟
ولا دى حاجة ودى حاجة تانية ؟
انا طبعا مقصدش عروض ولا اى حاجة , انا اقصد انى احط مبلغ ما مثلا و اخد بية فيزا للسحب و الشراء
ممكن حد يفهمنى اعمل إية ؟؟
-
فيزا كارد
سلام عليكم جميعا
90% من الكلام المكتوب صح لكن بعد اذنكم عاوز اوضح حاجة صغيرة :-
كلكم عارفين ان فيه نوعين من البطاقات
1- فيزا كارد والنوع ده ما فيهوش فايدة من اول يوم سحب زي ما تفضلتم ووضحتم الفايدة بتتحسب بعد كشف الحساب زي الاستاذ حفناوي ما تفضل ووضح .
2- ماستر كارد والنوع ده الفوايد بتتحسب من اول يوم سحب.
عموما اسمحولي اقول رايي في الموضوع ده ياريت الي منكم معاه اي نوع من الاتنين يستخدمه بس في المشتريات ويحاول يسدد قبل يوم 25 في الشهر المبلغ كله علشان ما يتحسبش عليه فوايد وغرامات كتير.
اي استفسار في مواضيع البنوك انا تحت امركم.
يا جماعة راي شخصي الي منكم مش محتاجها ما يطلعهاش علشان الموضوع ده بيجر الرجل وبيحصل مشاكل كتير.
سلام
-
نسيت اقولكم حاجة تانية رد على الاستاذ اسلام شاهين
الفايدة الي قالهالك الراجل بتاع باركليز1.85 شهريا لو حضرتك حسبتها بالسنة هتلاقيها 22.2% سنويا ودي طبعا فايدة كبيرة وده بيساوي 18.5جم على الالف جم شهريا مش 65 قرش زي ما حضرتك وضحت في رسالتك يا استاذ اسلام الناس بتوع المبيعات دول بيبقم شاطرين اوي عموما اي استفسار انا تحت امركم.
تاني يا استاذ اسلام الفايدة هتبقى 22.2% يعني على الالف يبقى 220.2 جم تقسمهم على 360يطلع .0.61قرش في اليوم تضربهم في عدد ايام الشهر مثلا 30 يوم يطلعم 18 جنيه على كل ابف في الشهر.
-
اسلام بلاش منها
انا استلمت شهر اكتوبر اللي فات بطاقه من باركليز
و كان حدها الائتماني 18750 جنيه
و في خلال شهرين طيرتهم
علي العلم اني كنت واخد عهد مع نفسي اني استخدمها في المشتريات بس و انها تكون للطوارئ و كلام من ده بيني و بين نفسي لكن الحقيقه واحده دي فلوس سهله في ايديك و بالتالي اسحب اسحب اشتري اشتري و في النهايه يا حليله في انتظار الفرج
Content Relevant URLs by
vBSEO 3.6.0 PL2