فى منطقة وسط الدلتا(كفر الشيخ-طنطا-شبين الكوم)الشبورة الان كثيفة بشكل ربما لم اره من قبل
خذوا حذركم والله الحافظ
9
فى منطقة وسط الدلتا(كفر الشيخ-طنطا-شبين الكوم)الشبورة الان كثيفة بشكل ربما لم اره من قبل
خذوا حذركم والله الحافظ
9
شبوره غريبه حتي داخل المدن الشبوره كثيفه جدا ربنا يستر
شكرا بارك الله فيك
السلام عليكم ورحمة الله وبراكاته
بعد التحيه عاوز بس احذر من الشبوره الرهيبه بس الكلام دا بعد تجربه الحمدلله عدت على خير
البدايه خرجت من البلد وهى فى منطقه زراعيه مجرد ما طلعت على الطريق كان الطريق اتلغى وبقيت فوق السحاب ناقص بقى اركب اسبويلار على الابابين يمين وشمال وابقى كدا سايق طياره :colsmil:
المهم طبعا شفت الشبوره قلت موش مشكله ربنا هيسترها وانطلقت على الطريق بسرعه جنونيه بتاع 30 كم\الساعه طبعا دا فى الشبوره وفى فرق بين العربيات والطيارات :36_1_1[1]:
طبعا موش شابف حتى الطبلوه والزينون بقى مجرد لوح قدام العربيه ولا مرايه وانسى بقى الطريق فا قفلت الزينون وشغلت الفوج لمبات صفر حلوين كدا والانتظار ومكمل لحد ما وصلت لمرحله الخوف ليه لان الطريق فردي رايح جاي طريق زراعي بقى المهم قلت بس مبدهاش قمت راكن وملوع ومستني اي عربيه تكون ماشيه امشي وراها بس موش اي عربيه المهم لقيت عربيه نص نقل سوقها ما شاء الله تمام قمت لحم معاه على الطريق وماسك فى ديل عربيته لحد ما وصلت طنطا
المهم بعد ما خلصت مشواري فى طنطا بقت الساعه 2 صباحا
والله فكرت اني ابات فى طنطا لحد النهار ما يطلع بس قلت برده اتوكل على الله واروح
طبعا ابص يمين او شمال اشوف عربيه مروحه معايه مفيش قلت امشي لحد ما اجيب اخري المهم مشيت بتاع كيلو وركنت خلاص مفيش طريق بجد كانت حاجه وحشه بس الحمدلله لقيت اتوبيس مروح من بتوع النقل العام قمت شابط وراه بس لقيته مشي بتاع 2 كيلو كدا وجه راكن قلت خير
كملت طريق لحد مفرق طرق وركنت تاني لقيت تاكسي ورايا ركن نزلت ووقفت معاه لانه نفسي موش شايف حاجه المهم قلتله نشوف اي عربيه ونجري وراها لو فى طريقنا وماشي صح قالي تمام
لقينا عربيه تاكسي تويتا كرسيدا معدي طياره قمنا جرينا وراه المهم اول ما حصلته لقيته بيرقص على الطريق يمين فى شمال فى يمين وهدا خالص بعدين مشي وكل شويه رايح ينزل فى الارض الزراعيه وانا وراه باكلاكسات لحد ما كان هينقلب بس ربنا ستر المشكله الاكبر ان الطريق بقى مزحلق زي الشتا بالظبط المهم ركنا وفضلنا مستنين الفرج لحد ما بعته ربنا لقيت ميكروباص جاي اول ما عدا جرينا وراه بقيت قطر ماشي ورا بعضه المهم لاحظت حاجه رهيبه اولا ماشي على سرعه بتاع 90 كيلو\ الساعه كان مفيش شبوره :44: قلت بس دا مجنون ورايح ينتحر المهم فضلت وراه لقيته بيمشي على الخط الفاصل الي فى نص الطريق ولما تيجي عربيه فى المقابل ياخد يمينه عادي وبعد كدا يرجع على الخط لحد ما وصلنا البلد الحمدلله ربنا سترها معانا :coool:
الخلاصه والنصايح لوجه الله تعالى :
1.توكل على الله فى كل طريق ولا تنسى دعاء الركوب
ـ" بسم الله ، الحمد لله ، سبحان الذي سخر لنا هذا وماكنا له مقرنين وإنا إلى ربنا لمنقلبون "ـ ـ" الحمد لله ، الحمد لله ، الحمد لله ، الله اكبر ، الله أكبر ، الله أكبر ، سبحانك اللهم إني ظلمت نفسي فاغفر لي ، فإنه لايغفر الذنوب إلا أنت "
2. اوعى تسافر فى الشبوره الجامده دي لان فعلا موش هتشوف اكتر من الطبلوه
لو مضطر تسافر اتأكد من نور العربيه يكون لمبات هلوجين يعني اللمبات الصفر لا زينون ولا اي لون تاني .انا سمعت اللمبات الي لونها احمر بتكسر الشبوره كويس الله اعلم .
3. تشغل الانتظار طول ما انت ماشي فى الشبوره
4. اوعى تمشي لوحدك فى الشبوره واستنى لما تمشي مع عربيه او اكتر عشان تحذروا بعض والاهم ان الي فى المقدمه يكون شايف ويا سلام لو ترله او اتوبيس يبقى تمام .
5.اوعى تتهور وتفكر تعدي عربيه قدامك الكلام دا على الطرق الفرديه رايح جاي.
6. تكون الميه بتاعت المساحات مليانه والمساحات شغاله كويس وتشغل الهيتر على الزجاج الامامي فقط ودا عن تجربه عشان موش يشبر وتشغل الهيتر بتاع الزجاج الخلفي وتنزل الزجاج بتاعك شويه عشان تسمع الكلاكسات الي جايه او الي وراك .
تقريبا دا كل حاجه وربنا يسترها معانا جميعا ونسافر ونرجع لاهالينا سالمين اللهم امين
معلش طولت عليكم
:36_1_37[1]:
واضح ان الشبوره على اجزاء كثيره من مصر ان مكانش كلها اصلا
مدينة العاشر من رمضان ( مش هتشوف اي حاجه نهائي)
انا مش شايف البيت اللي ادامنا بالنسبالي يعتبر تهيئات
ربنا يستر
وشكرا على النصيحة
ربنا يسترها عليك والحمد لله انك عاقل ومشيت وراء نصف النقل
عندنا في العاشر من رمضان يوم 27 12 2009 الموافق الاحد صباح الفجر الشبوره نازله جامد والروئيه 3 متر علي الاكثر داخليا داخل المدينه وكنت مع صاحبي ابنه تعبان ولسه راجع من المستشفي معاه هو وابنه وكنت ماشي علي 20 كيلو وقلبي خايف والحمد لله لسه راحع من مشوار مش مكمل 6 كيلو
خرجت اتمشى من شويه على رجلى ومش شايف حاجه اكتر من 10 متر قصادى وفى شوارع صغيره قوى وكلها مبانى
ربنا يكون فى عون اللى مسافر حاليا , واحد صاحبى بيكلمنى من شبين الكوم بيقولى مش شايف العمود اللى قصاد البيت عندهم ب 3 متر من الشبوره
جزاك الله خيرا على النصيحه
انا كنت لسه هأعمل موضوع أحذر الناس
الشبوره كثيفه جدا ومش فى طرق السفر بس لا دى فى كل مكان
فى شارع الهرم كانت جامده بس معقوله يعنى الواحد يشوف
فى المريوطيه ماكنتش شايف نص متر قدامى !!!! حتى انا قلقت اطلع الدائرى ومشيت الطريق العادى
وانا فى البيت باينه جدا من الشباك لدرجه انى كنت فاكر ان فى حريقه جامده ودا الدخان بتاعها
ربنا يستر
دول كام صوره وانا فى الشارع من كام ساعه وكدا يعتبر كويس كمان
http://img7.imageshack.us/img7/9468/27122009535.jpg
http://img709.imageshack.us/img709/9555/27122009536.jpg
http://img23.imageshack.us/img23/6594/27122009537.jpg
http://img32.imageshack.us/img32/995/27122009538.jpg
http://img707.imageshack.us/img707/9423/27122009539.jpg
http://img15.imageshack.us/img15/3566/27122009540.jpg
بالتجربة: الأسوأ هو النور العالى ، بيعمل قدامك زى ما يكون مراية أو حائط أبيض ، ممنوع يشتغل فى الشبورة خالص
الأقل سوء منه النور المنخفض ودا بيسمح بمجال رؤية محدود
فانوس الشبورة بيسمح لك تشوف حافة الطريق لو ماشى يمين أو شمال وجزء بسيط للأمام
إشارة الانتظار لازم تكون شغالة فى الوقت ده
التكييف السخن موجّه على الزجاج الأمامى لمنع تكاثف بخار الماء عليه + قليل من ماء المساحات كل شوية+ تشغيل السلك الحرارى فى الزجاج الخلفى
حمدا لله على سلامة اللى وصلوا وعقبال الكل
انا ببص دلوقتى من الشباك ولقيت الشبورة فظيعة جدا
مش شايف اكتر من 10 متر
فعلا أنا لسه جاي دلوقتي من الهرم و الشبورة مرعبة
ربنا يباركلك يا أخي على التحذير
بصراحة لو لقيت بكره على العشا أى بوادر ليها مش خارج من بنها والله الغنى
ربنا يسلم ويستر
فعلا يا جماعة أنا أول مرة أشوف شبورة بالكثافة دي حاجة غريبة ربنا يستر فعلا
انا راجع امبارح بالليل على لاصحراوى للاسكندريه وكانت شبوره لاتوصف
اول مره ما شوفش زجاج العربيه حتى ووقفنا شويه لغايه لما الدنيا اتظبتت
هي كانت غريبه، شويه شبوره وشويه حلو كده من القاهره حتى الاسكندريه عالبحر.
سترك يا ستار
انا لسه جاي من حلوان للتجمع الخامس
شبورة ماشفتهاش في حياتي غير مرتين...على طريق العين السخنة الفجر و على طريق مرسى مطروح الفجر
كون ان انا أشوفها تحت البيت و على الاوتوستراد دي جديدة :) أول ما نزلت حسيت اني ممكن ملاقيش العربية من الشبورة
بس للأسف جزء كبير من الشعب المصري غير مهيأ لمواجهة هذه الظروف......تخيلوا الناس فاكرة نفسها بتلعب فيديو جيم و الشبورة دي هما اللي حاطينها من الSettings بتاعة السواقة!!! جري على غرز على زمامير و كأنهم مركبيين رادار في العربية مخليهم يشوفوا كل حاجة و الرؤية أصلاً لا تتعدى ال 5 متر!!!
ربنا يعديها على خير
الموقف ده حصل معايا السنه اللي فاتت
وكنت كل شويه اقف وامسح القزاز من بره ومن جوه لحد ماطلعنا علي الصحراوي ومشينا ورا ملاكي لحد ماجت تحويله من التحويلات الكتير لكن للأسف الراجل اللي قدامنا مااخدش باله وحضن الرصيف واحنا الحمد لله طلعنا منه باعجوبه
ربنا يسترها معانا دنيا واخره
انا بقي امبارح كنت حاسس اني ماشي فوق السحاب راجع باليل واللي الريق مكنتش عارف احدد انا ماشي في اي اتجاه مره يمين ومره شمال واللي يضايق تلقي عربيه ماشيه وراك مستنيك يحصلك حاجه علشان يفادي نفسه بس الحمد لله كان معايا اخواتي كان كل واحد قاعد في شباك العربيه
سمعت دلوقتى ان فى حادثه بشعه على الطريق الزراعى فى اتجاه القاهره وموقفه الطريق
حد عنده معلومات
تقرير وزاره الداخليه عن الشبوره
ظˆط²ط§ط±ط© ط§ظ„ط¯ط§ط®ظ„ظٹط© - ط£ط®ط¨ط§ط± ط§ظ„ظ…ط±ظˆط±
بس على فكره فى الصحراوى الشبوره لغايه الاسكندريه عالبحر مش الكيلو 83 زي ما بيقولوا
الكوميدى فى الموضوع اننا اكتشفنا الموضوع ده انبارح و احنا رايحين نلعب كورة فى ملعب فى التجمعات جنب الرحاب,مش ممكن كنا عاوزين نعمل زى عادل امام فى أمير الظلام و نركب للكورة جرس,و طبعا انتا أخر رؤيتك نص الملعب بعد كده ماتشوفش أعدنا نلعب بتاع 20 دقيقة بالمنظر ده لغاية سبحان الله فرجه حل علينا فى ثانية بنبص لقينا كل حاجة وضحت و الشبورة اختفت الى حد كبير, بس النجيلة كانت كلها زحاليق مفيش حد موقعش
ربنا يستر علينا
ربنا يحمي جميع المسلمين
اللهم سلم اللهم امين
ربنا يستر يا جماعة الخير
كل واحد ياخد باله طويس يا جماعه وربنا هوا اللى بيسترها
جزاكم الله خير
انبارح كده كنت راجع 10 ونص من المقط ورايح التجمع بامانه مش شايف حاجه كل العربيات مشغله الانتظار علشان نخد بالنا ومخدش يخبط ف حد والحمد الله عديت ع خير بس بجد مكنش يتشاف حاجه وربنا يستر طريقنا كلنا ان شاء الله
انهاردة الصبح وانا راريح أكتوبر من على الدائرى وقفت بعد ما طلعت من القومية حوالى ساعة ودا لان فى حوالى من 8 الى 10 عربيات عاملين حادثة... ربنا يسترها
دى صور الشبوره عندنا فى شبرا الساعه 7 صباحا
و دي صورة شوارع حلوان الساعة 7:30 الصبح:
امبارح اول مره في حياتي امشي في شبوره او اشوفها من اساسه
كنت ريح مشوار الساعه 12 بالليل في اسكندريه ولازم امشي من الطريق الزراعي
وفعلا كان الطريق مرعب
بس مكانش زحمه وكانت الناس كلها ماشيه باعتدال
بس كانت تجربه جديده ليا ومش ناوي اكررها باذن الله
طب ايه اخبار الشبورة انهارده انا عندى مشوار فى الدقى بليل و هطلع من التجمع عن طريق الدائرى
مفيش اخبار عن الشبورة انهارده؟
انا ربنا سترها معايا امبارح .. كنت مسافر من المنصورة للقاهرة وخارج الساعة 10 واصل الساعة 3 بالليل ... مجال الرؤية ما يتعداش متر قدامك وفى بعض الاحيان مفيش خالص .. العربيات كلها ماشية صف واحد ورا بعض وعلى سرعة 20 الناس الحمد لله كانت عاقلة ومفيش تهور .. كنت فى بعض الاحيان انا اللى ببقى قدام فجأة وانا ماشى لقيت الطريق سد وجدار تراب قدامى وقفت بالظبط قبله بنص متر :) خرجت عن الطريق ومش شايف حاجة خالص والناس كلها ماشية ورايا هههه بس الحمد لله ربنا ستر .. وكان احيانا بيبقى فيه مفترق طرق الناس كلها وقفت ومش عارفين احنا ماشيين صح ولا غلط كنا بنسأل اللى جاى من الناحية التانية