المعلومه صح بس السبب غلط
بديهى كدا ان حوار العربيه تطير ده فيلم بتاع واحد بتفرج على افلام كتير دخل عدل فى الايميل , بس اللى بيحصل كالاتى
المطر سواء كان خفيف او تقيل بينضف الاسفلت من الزيت وعلشان كدا بتبقى الميه مزحلقه جامد خصوصا كمان لو المطر لسه فى اوله او الدنيا بتمطر جامد ودى بيؤدى لعمل طبقه عازله بين الكاوتش نفسه والارض
الفراغات اللى فى الكاوتش وظيفتها انها تنضف الكاوتش من الميه ومتجمعهاش تحته بحيث انها متعملش طبقه عازله ولكن احيانا بسبب سرعه العربيه بيبقى الفراغات دى مش كفايه وتبدأ الميه فعلا تتراكم لحد ما توصل لمرحله ان الكاوتش يكون واقف على الميه ومش لامس الارض ساعتها هتلاقى وش او ظهر العربيه بيعوم حسب العجل اللى حصل فيه الموضوع ده اكتر
رد فعلك الطبيعى فى الحاله دى انك تسيب البنزين بسرعه ومتلمسش الفرامل نهائى وتبقى حريص جدا ان الدركسيون يفضل فى الوسط والعربيه هتتعدل لوحدها وتحاول تخفف سرعتك , لكن لو المثبت شغال برد فعلى تلقائى منه هيزود بنزين علشان يرجع العربيه لسرعتها وساعتها العجل هيلف بسرعه كبيره على الفاضى وهتفقد السيطره على العربيه فى الحال ويبقى المصيبه الاكبر انك هتضطر تدوس فرامل علشان توقف المثبت بتصرف بديهى وكدا يبقى ربنا يسترها
فالنصيحه صح فعلا ممتوع تشغل المثبت على اى طريق مزحلق سواء زيت او مطر خفيف او كثيف او حتى ميه عاديه لأنه مبيفكرش
المفضلات