الموضوع: قصه نجاح ..وقصص فشل(تجربه حياه) الجزء الثانى

طبعا فى المرحلة اللى فاتت مستفدش أى حاجة لأنى ببساطة
كنت طفل لايُدرك أى شئ سوى المدرسة واللعب مع أخواتى والشغل فى الأجازات
خلصت أولى إعدادى وجت الأجازة
.... طبعا كنت متعود أشتغل مع والدى بس للأسف المحل متأجر وأنا مش بحب أقعد فى البيت
فقرى غاوى شغل دايما ...مطولش عليكم نزلت أشتغل عند النجار اللى تحت البيت من نفسى
كان بيدينى فى الأسبوع 10 جنية بحالهم....
شغل من 8 الصبح الى 8 بالليل وفى ساعة فى النص علشان الغداء
طبعا كنت باكل وبريح فى البيت ومن أول قبض جبت لأخواتى وللبيت طبعا فاكهة لقيت والدى بيقول اهوا لو أنا مت هكون مطمن عليك
وعلى إخواتك مش هتطلع ندل وتسيبهم
طبعا مفهمتش هو كان بيقول كدة لية بس عرفت لما
مات ان ادكتور قالة الكبد بايظ تماما ويمكن يكون فاضلك 6 شهور وتموت

والباقى إديته لوالدتى علشان تجيب بية أكل للبيت
والله أنا كل مبفتكر الحاجات دى بتألم أوى
لأنها حاجات حاولت جاهدا انى أمسحها من ذاكرتى بأستيكة
وفعلا نسيتها وبفتكرها معكم علشان أفكر نفسى بالأية القرانية
( ولسوف يعطيك ربك فترضى ألم يجدك يتيماً فآوى و وجدك ضالاً فهدى و وجدك عائلا فأغنى )
والله أنا فاكر موقف عمرى ما أنساة أبدا فى إمتحانات اخر السنة لأولى إعدادى

والدى ادانى ربع جنيه علشان أشرب بيها حاجة ساقعة
وتقريبا والله أعلم كان أخر فلوس فى البيت المهم خلصت
الإمتحان وقولت أروح أشوف عمتى اللى كنت بناديها بماما
وهيا كمان ادتنى ربع جنية وانا طبعا ببراءة الأطفال صرفتة
فى شيكولاتة ولبان واللذى منة وطبعا داخل البيت زى الباشا
والدى قفشنى وعرف الموضوع.... والله ياجماعة يومها أنا أكلت
علقة مخدهاش حرامى جزم فى جامع بالحزام تلاقى بالشلاليط
تلاقى وأنا مش فاهم انا بضرب لية علشان صرفت نص جنيه
وأبويا يقولى دا مفيش عيش فى البيت وإنت تصرف نص جنية لوحدك
من ساعتها وأنا مبقولش حتى هات مصروفى لأنى
كنت عارف البيت وازاى كان ماشى طبعا بستر ربنا وحدة
طبعا اللى كنت بشتغل بية والله كان فى إيد والدتى علطول
مكنتش بجيب حاجة لنفسى ولاحتى حاجة ساقعة ...
أيام العز خلاص راحت مبقيناش زى الأول وفهمت معنى المثل
اللى بيقول ( إرحموا عزيز قوم ذل ) والدى كان راجل دماغ
لف واتفسح واشتغل فى 26 دولة اه والله العظيم 26 وأنا طبعا طالع زيه
تمام احب ألف وأشوف ناس وتقافات مختلفة ... ما علينا
قبل ما والدى يموت كان كل يوم يقرء سورة الزلزلة لحد محصل
زلزال 92 الشهير طبعا كنت فى المدرسة ورجعت قولت لبابا
شفت من كتر قرايتك للسورة دى حصل زلزال وطبعا لبست
شبشب محترم فى وشى

بعد الزلزال بحوالى شهر نص ونص مات والدى
اليوم دا والدى كان تعب جدا وماما اضررت ترةح بية
مستشفى المحلة العام رغم ان والدى مبيحبش الدكاترة خالص
ولا المستشفيات الحكومية بس تقولوا ايه مكتوبلة ان يموت هناك
فاكر آخر كلمه قالهالى بالليل ( قوم يا وائل نام على السرير اللى فى الأوضة التانية )

وصحييت الصبح بطنى كانت بتوجعنى جدا ورحت لدكتور المدرسة
اللى حولنى على نفس المستشفى اللى والدى مات فيها ويمكن فى نفس اللحظة كمان .
رجعت البيت علشان اجيب حاجة
لقيت الناس كلها فى الشارع بيبوصولى ومحدش بيتكلم نفس الحكاية مع
الجيران اخواتى الثلاثة فى الحضانة وأمى مش موجودة فى البيت
وعرفت من جارتنى ان ابويا مات .......

برجاء مراعاة الدقة في الآيات القرآنية

مشرف الاجتماعي

المشاركة الأصلية كتبت بواسطة eng.octooo

موضع جامد جدااااا وعلى رأى غزالى ومهندس مصطفى بلا مذاكرة بلا وجع دماغ نايل موتورز هوة الاحساس كملوا ياشباب كدة كدة مش هانجح فى الفيزياء ولا الرياضة

متشكر جدا مستر eng.octooo و مستر Mostafa_Elhussain
و مستر mohamed.mostafa و مستر
Eng_Mostafa_89على اهتمامكم بالموضوع
وبشكر كل الناس اللى متابعة الموضوع
وأتمنى أكبر قدر من الناس تستفيد منة
ويارب مكنش السبب فى سقوط حد منكم


بالنسبة للى اتعلمته فى المرحلة دى إن الدنيا ملهاش أمان
ولازم تعمل حساب كبييييير للمستقبل ومكنش زى والدى
اللى صرف ولف كتييير وفى الأخر مكنش معاه حق الدواء
أو أنه يصرف على البيت
قاعدة ذهبية : حافظ على القرش زى عينك يحافظ عليك هو كمان


أنا معكم طول الليل انتظرونا بعد الفاصل .... راجعلكم تانى

والله انا كنت صاحي علشان اذاكر بارا وفارما بس بقولك إيه فكك من البارا كمل إنت ياوائل أنا قاعد مستني ............

والله ما أنا مذاكر ............

المشاركة الأصلية كتبت بواسطة yse

والله انا كنت صاحي علشان اذاكر بارا وفارما بس بقولك إيه فكك من البارا كمل إنت ياوائل أنا قاعد مستني ............

والله ما أنا مذاكر ............

ياجماعة والله انتوا كدا هتخلونى بجد أحس بالذنب تجاهكم
أبوس إيدكم تذاكرو على الأقل يكون معاكم شهادة
هيا لا بتجيب ولا بتودى بس اسمها شهادة بلد بتاع شهادات صحيح

طبعا بعد موت والدى دخلت مرحلة المطحنة :b4_237:
اللى هيا من سن ١٢ سنة الى سن ٢٢ سنة

طبعا إحساس فظيع انك تصحى من النوم متلاقيش انسان إنت بتحبة ...

الغريب لما والدى رجع البيت ملفوف فى بطانية مفيش دمعة نزلت منى
وكأنى أصبحت فجأة بلا إحساس وناس كتيرة فى الشقة من قرايبنا
موجودين وناس بتصوت وأنا مش فاهم حسيت انى دماغى ومشاعرى
مش قادرين يستوعبوا الموقف لسة
الراجل ميت قدامى
وأمى وأخواتى بيعطوا وأنا زى الألف
مش عارف ايه اللى حصل وكنت زعلان من أبويا أوى
لأنة مات من غير ما يودعنا ولا يقول أى حاجة ...
بس فى الأخر دى حكمة ربنا محدش يقدر يعترض ( وله فى ذلك حكم )
اه نسيت أقولكم سبب الوفاة : هبوط حاد فى الدورة الدموية
لأن الهانم الممرضة إدت حقنة لوالدى كانت قوية جدا
أدت إلى إنتقالة الى العالم الأخر فى دقايق معدودة
طبعا أمى وعمتى كانوا جنبة وعمتى طلعت تجرى على
الدكتور علشان يلحق أبويا يقوم البيه الدكتور يرد عليها
( ياه انتى لحوحه أوى يا ست إنت طيب والله ما أنى جاى)
طبعا بعدها بثوانى اخد لقب المرحوم
( وحسبى الله ونعم الوكيل فى كل دكتور ميلحقش
مريض ويكون السبب فى موته وتشريد عيلتة )

علشان كدا احترمت دكتور أحمد أوى لما حكى
وقال انه كان بيروح بيوت الناس بالليل
أو يجرى يجيب دكتور لمريض والله ربنا هيكرمه دنيا وآخرة



الكل توقع بعد موت والدى إنى هسيب الدراسة
وأشتغل صبى نجار ولا صبى ميكانيكى
بس محصلش أبدا بالعكس كملت الدراسة
لأن ببساطة دخلنا الشهرى كان ٢١٠ جنية
منهم ٣٠ جنية ايجار شقة ( ايجار نوعا ما قديم والحمد لله)
كان مطلوب مننا نحقق المعادلة الصعبة اللى كل المصريين
بيحاول ألا وهي نعيش ب ١٨٠ جنية فى الشهر ل خمس
أفراد ما بين أكل وشرب ومصروف يومى طبعا
( المرض ممنوع حتى لو كان إنفلونزا عادية لأن دا هيأث
ر على الميزانية اللى هيا أساسا بايظة ومخرمة ....
بصراحة أهل والدى مسابوناش أبدا كل اللى كان
عندهم أرض زراعية من زكاة الأرض كان بيجيب
... شوال رز من هنا على شوال فاصوليا من هنا ,
.... فعلا ربنا مبينساش عبيده أبدا

المهم روحنا ندفن أبويا صلينا عليه فى الجامع
وتقريبا كل البلد كانت موجودة لأننا كنا
معروفين هناك بسبب محلنا اللى على الشارع العمومى
وبعد مخلصنا الصلاه وماشيين من الجامع الى المدافن
تقريبا فوقت من الصدمة ونزلت دموعى
قعدت أعيط كتيير أوى لحد ما وصلنا المدافن
رجعت البيت والناس و قرايبنا لسة بتصوت
وتعيط وطبعا منهم أمى وعماتى ....
٣ أيام من الجو الكئيب طبعا مكنتش بعيط قدام الناس
و قدام قرايبنا فكرونى انى كنت بكره ابويا
وناس كتييرة استغربت الموضوع بس لما
سألونى مبتعيطش لية رديت وقولت الحزن فى القلب
مش لازم أعيط علشان تحسوا إنى زعلان عليه

صممت أروح المدرسة لأنى زهقت من جو الصويت واللطم
كان فاضل على الأمتحان حوالى شهر !!!
بس الراجل اللى كان بيذاكرلى خلاص مات أعمل ايه وجت الأمتحانات والنتيجة ......
فى الترم ده انا جبت مجموع ٥٨ من ١٤٠ يعنى تقريبا ساقط....

اللى اتعلمته من الدرس دا إن الحى أبقى من الميت
حاول ترمى الماضى ورا دهرك وإبتدى حياة جديدة
لأن اللى راح مبيرجعش تانى وصممت أنجح وأبقى متفوق كمان فى كل حاجة