العربية بتبطل لوحدها

**Strong** · 29-12-2009 02:13 PM

أنا جربت اضغط فرامل جامد والعربية واقفة العربية ما بطلتش

لون العادم أبيض وواضح جدااااااا إنه أبيض وساعات بسيطة بيكون فيه لون أزرق

العربية بتدور الصبح من أول سنة مارش وباقي اليوم بعد 5-6 لفات

المتور وهو شغال بيرعش ، غيرت البوجيهات مفيش فايدة حساس الشكمان سليم استهلاك البنزين معقول

ركنت العربية في حتة مستوية وكشفت على الزيت بعد 4 ساعات كان بين الmin والmax يعني مظبوط

على فكرة أنا دبحت 3 فرخات للعربية والحمد لله بقالها شهر ما طارتش على سرعة لغاية 110 ، ولو طارت هجرب عربية تانية مفيهاش علايات بدل مافك وأركب العلايات اللي عندي

العفريت اللي بيخبط في العربية مش راضي يطلع ومش عارف الصوت ده بيخبط فين ومنين كل حاجة سليمة ومتربطة تمام والصوت مش بيطلع غير على سرعة عالية وعلى الطريق المستوي تماما لكن في المطبات مفيش أي صوت

**samirayad** · 29-12-2009 02:21 PM

على فكرة أنا دبحت 3 فرخات للعربية والحمد لله بقالها شهر ما طارتش على سرعة لغاية 110

هههههههه

**bakroov** · 29-12-2009 07:34 PM

حبيبى عشان خاطرى روح لاى ميكانيكى قوله عايز اجرب كويل من عندك من غير ماتدفع فلوس حتلاقى العربية اختلفت قوم مغير كويل اصلى وسلك وبوجيهات (اسمه طقم سيرفس كامل ) لا حتلاقى دخنة ولا حتبطل وبعدين افهمك احنا عملنا ايه ممكن تجرب قبل ماترد

**Strong** · 31-12-2009 12:23 AM

باركولي يا جماعة اتحلت أكبر مشكلة وهي تبطيل العربية وأنا ماشي

النهاردة قلت أشتغل ميكانيكي شوية

اشتريت مفتاح بوجيهات وشوية بنزين وأسلاك بوجيهات وبوجيهات جديدة

طبعا أنا مش هاغير حاجة من اللي اشتريتهم غير لما أتأكد إن في منهم عيب

المهم جيت أعمل اختبار الشرارة راحت عملت فرقعة بانفجار خلتني سبت العربية وجريت والناس ضحكوا عليا ، مش مشكلة

قلت بلاش منها

وكشفت على البوجيهات لقيت بوجيه راسه عوجة ولما فكيته لقيت راسه مش مقفولة كويس وبتتحرك فغيرت البوجيه ده بواحد مستعمل وشغال كويس في عربية تانية وطلعت جربت

والحمد لله مفيش تبطيل والعربية نظمت عن الأول ونغمتها موحدة
=========================

لكن في حاجتين عايز أعرفهم
1- هل البوجيهات بتطلع سوداء علشان واحد منه بيفصل ويشتغل ؟
2- مازالت مشكلة الفرامل الفجائية عند سرعة 20 أو أقل لا تعمل والدواسة تحجر لكن لو ضغطت بهدوء العربية بتقف ، هل بيحصل كده عند حد ؟ أنا عايز حد مجرب مش بيخمن ( اوصل لسرعة 20 بس ومور العربية واتأكد إن مفيش حد وراك واضغط الفرامل بقوة شوف هتهدي أو هتقف ولا الدواسة هتحجر ؟ باقي السرعات أعلى من 20 عندي العربية بتقف عادي سواء فرامل فجائية أو عادية