إنه فى تمام الساعة الثامنة مساءً يوم الثلاثاء 29/12/2009 استلمت (وبعد انتظار دام لحوالى 4 شهور) السيارة الرائعة (حتى الآن) كيا كارينز أوتوماتيك.
سوف أحكى لكم عن انطباعاتى الأولية عن السيارة وانظروا التقرير المفصل بالصور قريباً جداً إن شاء الله
الحجز: أنا كنت حاجز عند محمد زكى من يوم 2/9 واستلمت يوم 29/12 (حوالى 4 شهور)
السعر: دفعت 1000 جنيه فقط عند الحجز وباقى السعر عند الاستلام 111000 (إجمالى السعر 112000)
الاستلام: وصلت عند محمد زكى وكانت هناك سيارتين أمام الباب للتسليم (كلاهما باللون البنى) وكان الاستاذ تامر الجمال يقوم بتسليم إحداهما إلى أحد العملاء.
انتظرته حتى انتهى من إجراءات التسليم وقام بتسليمى السيارة بعد الفحص والتمحيص والتدقيق(والتعليم أيضاً) حيث أننى أول مرة أقود سيارة أوتوماتيك (وأنا بستلم كان فيه سيارة ثالثة بتتسلم لونها بنى برضه) . أستاذ تامر قالى إن الدفعة اللى جاتلهم كلها لونها بنى والفرش الداخلى بيج ( أنا كان نفسى الفرش الأسود عشان الواد ابنى بيبهدل العربية) بس الحمد لله -الخيرة فيما اختاره الله-
انطلقت بالسيارة إلى أقرب محطة بنزين وملأت الخزان بالبنزين (حوالى 45 لتر)
السيارة كانت عاملة 11.5 كلم فقط وأنا قدتها لحد البيت فى الهرم وذهبت بها إلى العمل اليوم فى القرية الذكية (حوالى 70كلم)
طبعاً أول ماركبت العربية الإحساس بالوسع الرهيب فى الصالون، وضع الكرسى مرتفع ومريح جداً. المشكلة اللى قابلتنى إن المراية الجانبية كبيرة وبتبين الأجسام اللى وراية أقرب من الطبيعى (عربيتى القديمة كنت مركب مرايه عادية فى الجنب وبالتالى مكنتش بحس بالمشكلة دى) .
مكنتش حاسس بمشكلة فى العفشة ولكن بعد ما ظبطت ضغط العجل حسيت إنها ناعمة فى المطبات بس حسيت إنها بتترجرج كتير شوية ( مش عارف أنا اللى حساس بزيادة والا المشكلة فى الشارع واللا إيه بالظبط)
على فكرة الكاسيت دلوقتى LG صوته كويس بس ضايقنى إنه مفيش شرايط كاسيت (هو فيه AUX , USB, CD, MP3, windows media files
أنا مبسوط جداً من العربية وانتظروا التفاصيل الكاملة والصور قريباً إن شاء الله ...