عندى مشكله مع اللغه الانجليزيه

سلام عليكم يا شباب اخوكم مش بيحب الانجليزى حاولت اخد كورسات ومش جابت معايا نتيجه
انا بطبعتي مش بحب المذكره:whtauwant: بس مش عارف احفظ كلمات ومش عارف اذاكر القواعد بتاعت اللغه
نفسي اعرف اتكلم واقرا واكتب زاى الناس ممكن حد يقولي اعمل ايه وشكرا" ليكم

بص هو اولا اى حاجه فى الدنيا علشان تتعلمها صح لازم تحبها مش شرط اللغه بس يعنى كمان الشغل مثلا يعنى درستك كل حاجه
فا علشان تتعلم انجليزى صح حبو الأول بمعنى ايه
خلى عندك احساس دايما انك لازم تتكلم انجليزى علشان هيفيدك فى حجات كتير وعشان تحفظ كلمات ابتدى بالكلمات السهله اللى بنحتجها كتير وحاول دايما تقولها بالأنجليزى كتير على الفاضى والمليان هتلقيها لزقت فى دماغك بس بعد ما تحس انك حبيت اللغه قدم بئه فى كورس هيشجعك صح انك تتعلمها. ومش شرط القواعد من بديتها يعنى ممكن مثلا زى احمد حلمى فى فيلم كده رضا الأخ البرنس كن مبوظ ألانجليزى خالص بس كان مفهوم ...
وان شاء الله ربنا يوفقك

شكرا" ليك يا احمد وححاول اعمل زاى ما انت قولت

حاول تتفرج على أفلام و مسلسلات أجنبي كتير... و تسمع كويس الكلمات... و تربطها بالترجمة... الحكاية ديه هتساعدك كتير في النطق بتاع اللغة... و مع الوقت هتلاقي اللغة مبقتش معقدة زي ما كنت حاسس في الأول

اقتباس:

---

المشاركة الأصلية كتبت بواسطة m!na

حاول تتفرج على أفلام و مسلسلات أجنبي كتير... و تسمع كويس الكلمات... و تربطها بالترجمة... الحكاية ديه هتساعدك كتير في النطق بتاع اللغة... و مع الوقت هتلاقي اللغة مبقتش معقدة زي ما كنت حاسس في الأول

---

فعلا السمع كتير هايفيدك جدا

اسمع
إتكلم
إقرأ
إكتب

بنفس الترتيب ده
إسمع كتير وانت مشغول في أي حاجة
حتى لو مش فاهم أي حاجة من اللي بتسمعه، هاتتحسن كتير مع الوقت وهاتلاقي نفسك أكثر فهما لما يقال

إتكلم ومتتكسفش من الغلط
حتى لو كان حواليك حد بيتريق عليك
كل اللي بيتكسف مش بيتعلم حاجة
وحط في دماغك إنك لازم تغلط عشان تتعلم

بعدين إقرأ كتير
فيه قصص قصيرة موجودة كتيرة أوي بأسلوب مبسط
هاتستفيد منها جداً
والكلمة اللي متعرفهاش شوف معناها وجمع الكلمات دي في أجندة أو كشكول خاص بالكلمات.

وبخصوص الكلمات وحفظها هانصحك نصيحتين
الأولى احفظ صفات بقدر ما تستطيع
والثانية استخدم طريقة شجرة الكلمات
لو هاتعمل شجرة مثلاً خاصة بأدوات المطبخ اعمل مخطط للشجرة دي ولها فروع كتيرة وكل فرع اكتب عليه كلمة من الحاجات الموجودة في المطبخ وهكذا.

فيه كتاب هايل اسمه English Vocabulary in Use وله مستويات متدرجة من مستوى المبتدئ حتى المتقدم بيساعد بطرق كتير أوي على حفظ المفردات.

لازم الممارسة، ومتزهقش
وبعدين حفظ كلمات لوحده مش كفايه، لأنك هاتنسى اكيد.
الكلمة اللي هاتحفظها كمجرد كلمة هاتتنسى، لكن اللي هاتعرفها في سياق كلام، هاتثبت في مخك.
الأفلام الأجنبية، الأغاني الأجنبية، وشوف الكلمات المكتوبة مع الألبوم واقراها مع المطرب وهو بيقولها، عشان كمان تنطقها صح، وتعرف تنطق صح وتعرف مثلا الفرق بين ال p و الb في النطق، اللي هي تعتبر من اكبر مشاكل المصريين في النطق.
وربنا يوفقك

شكرا ليكو يا رجاله ححاول ابداء ان شاء لله بنفس الكلام اني اسمع واتكلم واقرا واكتب
وربنا يسهل عشان بجد طول عمرى متعقد منه