A516 وللا byd وللا نخلينا في اللانوس ونكبر ال d ؟
السلام عليكم يا معشر المشاركين ..
كل سنة وانتم طيبين الأول و happy new year عليكم جميعا ..
أنا دماغي لفت الشهرين اللي فاتوا من كتر ما بصيت وقريت ورحت وجيت عشان أرسى على عربية أشتريها .
أنا أصلي دورت بين المستعمل الألماني والياباني والفرنساوي ، وقارنت بين الجديد الصيني والتايواني " قصدي الكوري " !! وبعد التفحيص والتمحيص لقيتني باتشد بين 3 عربيات وهي الاسبيرانزا 516 و ال BYD , واللانوس .
فكنت عايز اخد رأي المحترفين اللي باعتز بيهم " انتوا يعني " في الموضوع ده .
طبعا كتير شكر في الصيني وكتير حاربه وبعثر كرامته .. بس أنا ركبت الاسبيرانزا وال BYD F3 وبصراحة عربيات تحفة في التصميم والرحابة والفخامة ونعومة وانسيابية في الطريق وسحب وهدوء حاجة يعني أوبهة .
وكمان اللي شجعني أكتر موضوع التاكسي ال 516 ده هيعلي سوقها ويرخص قطع غيارها و هيخلي ناس كتير تشتغل فيها .
وبالنسبة لل BYD فبقت تتقفل هنا وده ميزة كبيرة قوي وموتورها وعفشتها اليابانيين مدينني ثقة فيها .. بس توكيلها هو اللي يقلق شوية ..
بصراحة أنا واحد صاحبي بيقوللي خليك في المضمون وهات اللانوس ومتحطش فلوسك في حاجة ملهاش سوق و إعادة بيعها مش حلو .
بس أنا ناوي أشتري عربية وماغيرش قبل 5-6 سنين كده إن شاء الله ونطلع على الألماني بإذن الله .. بس ياريت يفضل ساعتها ألماني ومنسمعش إن شركة شانا الصينية اشترت مرسيدس مثلا زي ما حصل للانسة فولفو لما اشترتها جيلي اللي مش عارفة تبيع في مصر عربيتين أو تلاتة و بنتقالط عليهم ونقول ياعم حتجيب عربية صيني " disposable " يعني استعمال مرة واحدة بس وتترمي زي السرنجات البلاستك كده .. وربنا يرحمنا .
أرجو منكم الافادة ومستني ردودكم
د. محمد الفيومي
تم النقل للمقارنات بمعرفتى
مشرف الساحه
