الموضوع: تجربتى المتواضعة فى إصلاح خط الإنترنت بتاعى

بسم الله الرحمن الرحيم

أنا حبيت أكتب لكم عن التجربة اللى أنا مريت بيها لإصلاح خط الإنترنت بتاعى والدروس المستفادة منها اللى اكتسبتها النهاردة من الأعطال بتاعة خط التليفون وخصوصا إن أى حد مننا ممكن يمر بيها وياريت محدش يستعجل زى كده ويشك فى السنترال أو شركة النت كده فى ساعتها .

بداية كده أنا اتضايقت فى الأول زى أى حد بسبب العطل اللى حصل ده وخصوصاً إنه أخد وقت ييجى حوالى 3 أيام من أول لما روحت شركة النت علشان العطل ده لغاية لما رحت السنترال بنفسى ، لكن قبل ما أقولكم على العطل اللى حصل وإزاى اتصلح لازم أقول الأعراض اللى حصلت :
أول حاجة حصلت هى إن الإنترنت فصل من نفسه وخط التليفون كان فيه حرارة ، أنا قلت مش مشكلة هتلاقى العطل ده بسيط والشبكة بتقع وهى كلها نص ساعة والنت ييجى تانى وده كان فى أول يوم ، ولما رحت شركة النت الناس هناك قالوا إن فيه صيانة فى السنترال وفيه حاجات هناك بيظبطوها علشان الضغط اللى حصل على طول بعد زيادة السرعات كلها بنسبة 100% وسبت الشركة ومشيت على طول وقلت فى نفسى كده الناس ممتازين برافو عليهم هما عاوزين يحسنوا جودة الخدمة لأنه فعلاً السرعة بعد ما زادت لم تعد مستقرة طوال النهار على نفس السرعة وإن الوضع الأول كان أحسن بكتير .
تانى حاجة وده اللى ضايقنى قوى ودى كانت فى تانى يوم إن الحرارة شغالة لكن فيها شوشرة عالية للغاية لدرجة إن المكالمة بتبقى مش عارف تفهم منها جملة على بعضها من كثرة الشوشرة ، وخدمة الإنترنت تشتغل 5 دقائق وتفصل بالربع والنص ساعة وكمان فيه لمبة فى الرواتر أسمها (Alarm) كانت بتفضل منورة على طول عرفت بعد كده إن اللمبة دى لما تنور يبقى فيه مشكلة فى خط التليفون ، ولما رحت الشركة تانى قالوا إن التعديلات اللى عملوها ليس لها علاقة بالشوشرة اللى موجودة فى خط التليفون وإن احتمال إن الخط يكون مكربن ، أو إن السبليتر يكون مش شغال كويس علشان كده فيه شوشرة فى الخط ، بس أنا لما كنت بتكلم فى التليفون قبل موضوع النت ده خالص الصوت كان رايق من غير سبليتر ولا حاجة .
تالت حاجة وده فى تالت يوم وده اللى ضايقنى أكتر إن الخط فصل خالص ولا بقى فيه نت ولا بقى فيه تليفون ، الحاجة الغريبة إنى لما كنت برن من الموبايل على رقم الأرضى كان بيرن عادى جداً ، نزلت زهقان ورحت الشركة علشان أشوف الحل ، وبعدين رحت السنترال وطلعت على غرفة ( التست ) لقيت هناك الفنى ولقيت كمان الناس بتوع شركة النت كانوا هناك ، المهم قابلت الناس وسلمت عليهم وشرحت المشكلة وهم تفضلوا مشكورين بعمل اختبار على الخط وبعدين طلع الخط شغال وكلموا الفنى اللى المفروض ييجى معايا علشان نشوف العطل ده .


لما جه الفنى مشينا أنا وهو وطلعنا علشان نشوف الكابينة وبعدين قولنا لأ نشوف (البوكس ) اللى هى العلبة اللى السلوك طالعها منها للشقق مباشرة ، المهم لما وصلنا احتجنا سلم علشان نعرف نوصل للبوكس قعدت أدور على سلم ييجى 10 دقائق وبعدين الحمد لله لقيت سلم وبعدين الفنى طلع لغاية البوكس ولما فكه اكتشفنا إن كل حاجة تمام .

طب وبعدين هى المشكلة فين ، قولنا نطلع نشوف التليفون لقينا إن السلك فيه طرف شغال والطرف التانى لأ ، سألته هنعمل إيه ؟ قالى لازم نشوف السلك كله علشان جايز يكون فيه قطع ، قلتله إحنا نغير السلك خالص ، وبعدين لما نزلنا تحت تانى بصينا على السلك لغاية فوق لقينا حتة من بعيد كده زى ما تكون سميكة شوية ، قالى جايز دى تكون المشكلة منها ، قولتله أنا هنزل السلك كله وأشوف القطع ده فين وبعدين هوصله لو معرفتش هبقى أكلمك ، لما مشينا ورجعت أنا تانى علشان أنزل السلك ، وبعد ما نزلته من فوق لغاية تحت تخيلوا كده لقيت إيه فى السلك ؟؟؟؟؟ أنا لقيت السلك ده فيه قطع والحتة اللى فيها القطع ده كانت دايبة على الآخر يعنى كان فاضل شوية والسلك يقع لوحده والصدأ ماسك فى الجزء الموصل اللى هو النحاس فى طرف والطرف التانى ماسك نفسه بالعافية ، نديت على أخويا وقولتله يحدف لى بنسة وجبت شكرتون وولاعة وبدأت الشغل .

قطعت الجزء المصدى والمهترئى وبدأت أقشر العزل كويس وأوصل السلك وأعزله بالشكرتون وبعدين وصلنا كل حاجة ، بعد كده وصلت كل حاجة السبليتر والرواتر والتليفون وجرب يا عم

كل حاجة كانت شغالة زى الفل ، والحمد لله الإنترنت اشتغل والتليفون اشتغل والشوشرة راحت وكل حاجة بقت تمام

إيه الدرس اللى أنا استفدته من ده كله :

أول حاجة: لما يحصل عطل زى ده ما أخدش كل حاجة على أعصابى وأتنرفز وأتضايق وأحمل المشكلة لغيرى لازم الأول أتأكد من كل حاجة من السلوك ومن الراوتر وإن كل حاجة تمام .

تانى حاجة : لما لمبة ( Alarm ) اللى موجودة فى الراوتر تكون منورة يبقى كده فيه مشكلة فى الخط زى المشكلة اللى كانت عندى دى كده .

وكل سنة وإنتم طيبين

المشاركة الأصلية كتبت بواسطة baskota

طيب انا جبت الفنى من السنترال وقال السلك سليم وعمل عليه تست لقى كله سليم ومفيش وصلات ولا قطع ولا حاجة
وامبارح السرعة كانت واصلة 198 اكلم تى اى داتا الاستاذ الفنى يقولى حضرتك تفكى الاسبليتر وتارجى سلك التليفون اللى جاى من البوكس وتوصليه بالروتر مباشرة
اقوله ازاى انا معرفش ان السلك بتاع التليفون بيتأرج يقولى لا حضرتك بيتارج اقوله طيب احط الراوتر والكمبيوتر فى البلكونة يعنى ازاى عشان اوصل بالخط الرئيسى قول كلام منطقى يولى بس حضرتك جربى وكلمينا من تليفون تانى وبعدين نشوف
زهقت منه قفلت وقولت مش عاوزة نت خالص
المفروض يكون فى فنيين مسؤلين عن الكلام ده
مش كلنا بنعرف نأرج ونعمل الشغل ده

حضرتك ممكن تجيبى فنى من أى شركة كمبيوتر بيعرف يركب شبكات يشوف المشكلة اللى فى الشبكة عند حضرتك ويقولك على الحل على طول ويجيب معاه كل حاجة يجرب بيها

اللى ساعدنى أكتر فى المشكلة اللى كانت عندى ربنا سبحانه وتعالى أولاً ، وثانياً أصحاب شركة النت عندنا هنا فى بلدنا أصدقائى من فترة كبيرة للغاية ، لإن قبل من كذا شهر حصل مشكلة فى الكابل اللى داخل للمنطقة عندنا واتقطع بسبب آلات الحفر وفضلنا أربع أيام من غير تلفون ونت وبعدين لما الكابل اتصلح الحرارة مجاتش والنت فضل فاصل لما رحت الشركة سلمت عليهم وبعتونى السنترال ووجدت هناك ناس من الشركة وصلحوا العطل فى نص ساعة وخصوصاً إنه ما ينفعش أى حد يطلع فوق عند غرفة ( التست ) اللى الحرارة والنت والبورتات وأجهزة النت بتبقى فيها .

بصراحة المعارف فى الحاجات اللى زى دى بتخدم