انا عاوز اشترى صنى .... ياريت تساعدونى

**wadgentle** · 31-12-2009 09:28 PM

السلام عليكم .....
بصراحة انا كنت استقريت على الصنى قبل ما اعرف المنتدى دة .....بس لمل قريت شوية فى مواضيع المنتدى ....... لبست فى دماغى صنى يعنى صنى ..... و ان شاء اللة هاشترى صنى .... المهم .... انا معايا 58 - قول 60 - ..... و مش عارف دول يجيبولى موديل كام 2001 ولا 3 ولا 5 ؟ و اوتوماتيك ولا مانيوال ؟
ثانيا انا لسة متعلم السواقة ومطلع الرخصة ..... يعنى ابيض فى العربيات و مش عارف لما اشوف عربية اتأكد ازاى انها حالتها كويسة ..... بطريقة تانية اية اللى يخلينى اشترى العربية دى ولا لأ؟ الناس كلها اجمعت ان حالتها لازم تكون كويسة ..... اعرف ازاى ؟
و فى ناس بردة بتقول اكشف عليها فى التوكيل غير الميكانيكى و السمكرى - ازاى ..... يعنى اقول لصاحب العربة يالا نروح نكشف فى التوكيل ...... ولا اقولة اية ولا اعمل اية ؟؟؟؟ انا خلاص مش هاشترى عربية هههههههههههههههههه
لأ خلاص هاشترى ......... سورى ياجماعة انا طولت عليكم اعذروا جهلى

**aboezz44** · 04-01-2010 10:39 AM

اهلا بيك نورتنا والله
عند حضرتك خيارات كثيره بالمبلغ دا بالنسبه للصنى واعتقد ان المبلغ دا يجيب عربيه صنى مو2004 تقفيل يابانى وان شاء الله يتبقى معاك فلوس كمان
بالنسبه لمانيوال ولا اوتو انا من وجهة نظرى ان العربيه مادامت مستعمله يبقى ابعد عن الأوتو لأن الفتيس دا حساس فى التعامل يعنى لو ربنا ابتلاك بأن صاحب العربيه الى قبلك كانت رجله تقيله على البنزين ومش بيهتم بتغيير زيت الفتيس ولا الفلتر بتاعه هايعطيك جيير بوكس يكرهك فى نفسك
بالنسبه ليك تقيم عربيه ازاى لازم يكون معاك حد من اهل الخبره يعرف العربيه راشه بره وجوه حالة الفابريكه يبص على الماتور ينام تحت العربيه ويشوف حالة الشاسيه دى كلها حاجات لازم يقوم بيها واحد متمرس ممكن يوم ماتروح تشترى تاخد معاك سمكرى معرفه او ميكانيكى وتديله 50او100جندى وهوه يكون عنيك الى بتحكم بيها
ادخل على منتدى البيع والشراء هنا فى نايل موتورز وستجد الكثير من النصائح وايضا اسعار المستعمل
وخش على الموقع دا هتلاقى اسعار العربيات المستعمله contactcars.com
وابقى طمنا عليك

**wadgentle** · 04-01-2010 04:18 PM

دا نورك يا باشا
انا واللة فرحت ان فيه حد عبرنى ...... المشاهدات بقت 60 ولا حد رد عليا ..... بجد انت رديت فى الروح ....... و الف شكر على اهتمامك و نصايحك .
انا بصيت على شوية مواقع ...... لاقيت ان 58 دى تجيبلى 2002 ولا 2003 ... 2004 فى اول الستينات , ولا الناس بتعلى شوية فى السعر الللى بيحطوة على النت ..... يعنى فى السوق مثلا الوضع ها يكون اقل من كدة ولا انا فاهم غلط
ثانيا انا فية حل تانى انا مرتاحلة اكتر .... انا ممكن ازود شوية وابقى فى رينج 65 ل 67 و بكدة ممكن اوصل لل 2005 1600 , وانا بصراحة مقتنع بالاوتو عن المانيوال, انا لسة جديد فى السواقة على فكرة , و 2005 ما بقالهاش كتير ماشية , ممكن الاقى واحدة حالتها كويسة ..... ولا انت اية رأيك, فى الاختيارين 2005 والاوتو , و السعر دة هاعرف اجيب بية حاجة ولا لأ
انا اسف انى طولت عليك .

**aboezz44** · 05-01-2010 03:16 PM

بص يا حبى يا واد ياجنتل
انا متمرمط بقالى شهرين بافكر اشترى ايه بالفلوس الى معايا فأنامطحون فكر زيك
انتا الأول بدأت المشاركه بأنك عايز عربيه فى ال50,000ودلوقتى داخل على ال60,000 ربنا يباركلك
بس انا من وجهة نظرى الشخصيه مادام انك لسه جديد فى السواقه خلينا نبعد عن الحاجات الحديثه قولى ليه؟ علشان انتا كده كده هاتلط العربيه وربنا يباركلك وتعيش وتلط يامعلم وربنا يسترها علينا وعليك فالموديلات الجديده اسعار قطع غيارها نااااااااااااااار
انا بقى انصحك تجيب عربيه تلاقى قطع غيارها فى كل مكان وبأحلى فلوس
تويوتا كورولا من 93-97 ودى بيسموا موديلها الملكه وانضف عربيه مش هاتعدى ال50
يعنى انا كان معرووض عليا عربيه مو97ماشيه 68000كم بس فابريكه برا وجوا سعرها 49000جم بس
العربيه برده الى سعرها كويس واعتماديه لانسر لغاية مو 2000ودى بيسموها الكريستاله ودى برده بنفس سعر الكرولا الى فوق وان كانت تزيد حبتيين يعنى الفابريكه بره وجوه واوتوماتيك تعمل 51000بالكتيير
بص يامعلم العربيتين دووول وبس
لو عايز موديل عالى بس ماتنساش نصيحتى انك لسه جديد فى السواقه ممكن تجييب لانسر مو2006فابريكه بره وجوه اتوماتيك ب68000 بس دى 1300cc
الصنى غاليه وتقيله فى قطع غيارها بره التوكيل وجوه التوكيل ما اعرفكش
واهرس بالعربيه الى هاتشتريها ولما تبقى شوماخر وخارب الدنيا هاتبيع العربيه الى انتا كحرتها بأحلى فلوس وساعتها هاقولك ماتجيبش غير الصنى زيروووو
وربنا يوفقك يارب

**wadgentle** · 05-01-2010 05:33 PM

ازيك يا باشا
انا بجد بشكرك انك مهتم و بترد عليا

تسمحلى اطول عليك شوية واشرحلك من البداية
بص يا سيدى ... انا معظم معلوماتى عن العربيات تقريبا من اللى بقراه على النت و من المنتديات ... يعنى مذاكر كويس بس لسة ما حلتش مسائل .... ههههه
المهم .... انا ها ختار نوع العربية اية وموديلها كام .... انا هاقوللك جاوبت ازاى لنفسى على دة علشان تقوللى انا صح ولا غلط . اولا انا هاجيب مستعمل لغاية ما ابقى كويس شوية فى السواقة ... سنة ولا اتنين, وفى الغالب اشوف حاجة رشة بره علشان ما يحصلش دروب كبير فى resale - تقريبا احنا متفقين انى ها ضبش شوية فى الاول , انا حسيت بكدة وانا بتعلم السواقة انا اعتقد انى متهور شوية وبرتاح على السرعة العالية - , ثانيا انا هاجيب المانى او يابانى , ثالثا انا العربية اللى هاجيبها فى الاول لازم تبقى اوتوماتيك - دا لمصلحتى - , لما اتمرس كويس ممكن اجيب مانيوال , ثالثا الفلوس اللى معايا كام, انا ميزانية العربية عنى زى ما قولتلك الاول 57 كويس اوى , بس لو ما لاقيتش خالص حاجة ترضينى هاعلى شوية, رابعا واعتقد اهم حاجة, دى حاجة بيقولو عليها تقريبا Value Against Money القيمة مقابل النقود , انا بصراحة لما ركبت الانسر حسيت ان تمنها مش فيها خالص , هى اة سوقها ماشى و قطع غيارها مستريحة بس مش عارف مش حاسس انى راكب عربية قيمة - just احساس - , انمااقتراحك التانى الكورولا 97 انا كنت ما فكرتش فية بس ها شوف واسأل كدة وربنا يسهل,
فى نقطة تانية انا بفكر فيها وانا بشترى لنفسى عربية, انا مش هاستعمل العربية كتير .... انا بشتغل بسافر اسبوعين و باخد اجازه اسبوعين , وانا اللى هاركب العربية لوحدى , و لما هاكون بستعملها هايكون مثلا وانا رايح الكلية وانا رايح Course ..... فى خروجة بالليل يعنى اعتقد استعمال قليل ..... فانا قلت ببساطة اجيب حاجة كويسة شوىة واحاول ما اهينهاش , علشان كدة فكرت فى الصنى الموديل اللى قولتلك علية , فيها كتير من اللى عاوزة ,
وبجد انا مقدر اهتمامك و نصايحك