المشاركة الأصلية كتبت بواسطة storm2020
اولا شكرا على الموضوع اللطيف اللى بيوضح حاجات مهمه فعلا لازم الكل ياخد باله منها..
وانا اقولك على اللى فيها ومن الآخر كده....واللى عامله عندى..
1- انبوبه اسبراى طوارئ للكاوتش (اللى بتنفخ الكاوتش وبيبقى فيها ماده صمغيه علشان يعالج الخرم بشكل مؤقت) يفضل عدد 2 لان احيانا بيحصل فى كذا كاوتش
ملحوظه: الانبوبه عندى افضل من الكمبروسر لان الكمبروسر مبيعالجش + بيحتاج توصله بالبطاريه وشعلانه
2- 50 جنيه على الاقل (علشان لو اتسرقت -لا قدر الله- او اتزنقت او نسيت الفلوس فى البيت.. وكنت عايز تمون ولا حاجه)
3- زجاجه مياه للشرب... وزجاجه سائل تبريد للتزويد او لو حصل تسريب
4- عده (كوريك ومفتاح صاموله ومفك عاده وصليبه وزراديه)
5- تليفون محمول من الانواع الرخيصه وتشحنه بشكل دورى ويكون فيه رصيد واهم حاجه تكون حافظ الرقم كويس وتحطه فى مكان غير معتاد بالعربيه (علشان الطوارئ وعلشان لو لا قدر الله والعربيه اتسرقت تعرف الشرطه تتتبع عربيتك) وشاحن عربيه
6- كابل جامبر علشان لو البطاريه عملتا معاك
7- واير لقطر العربيه فى حاله الطوارئ
8- جركن بنزين 4 لتر (بس يكون متقفل كويس ويفضل يكون جركن جديد ومتكنش ماليه لاخره سيب 2 سم على الاقل)
9- كشاف ضوئى للطوارئ يكون قوى واعتمادى (ويفضل يكون من الانواع المعدنيه زى الكشافات الالمونيوم)
10- فيوزات وسير دينمو وطقم بوجيهات
11- فوطه لوازم التنظيف
وحاجه أخيره قم بلصق فيلم حمايه ضد الكسر وعاكس لحراره الشمس لكل زجاج العربيه .. (انا عارف انه مكلف علشان كده ممكن تكتفى به للزجاج الامامى والزجاج الخاص بابواب السائق والراكب الامامى
ده طبعا بالاضافه لشنطه الاسعافات وطفايه الحريق اللى بيكونوا بشكل اجبارى لكن فى ناس بتطنشهم وتجيبهم فى الفحص بس.. وكمان المثلث العاكس يا جماعه بينفع جدا فى الظلام الدامس
وبالتوفيق للجميع وربنا يسترها يا رب معانا اجمعين ...