العربية بتبطل لوحدها

**haitham83** · 06-12-2007 05:47 PM

دى اول مشاركة ليا فى المنتدى الرائع دة و انا فعلا اتعلمت كتيييييييييير اوى من مشاركات الاعضاء الموجودين هنا كلهم و عندى طلب و على فكرة دة اول طلب اطلبة منكم :
انا عندى عربية هيونداى اكسيل 1300 و بقالها حوالى اسبوع و انا ماشى بيها الاقيها بطلت لوحدها و هى ماشية و اقوم ادورها تدور عادى و تمشى شوية و تبطل لحد ما اتخنقت علما بانى بحطلها بنزين 92 و عمرى ما اسيب التنك يفضى غير لحد ربعة و البطارية فارتا جافة و لسه مغير الدينامو من 6 شهور ارجوووووووووووووووووووووو ووووووووووووووو الرد سريعا و متشكر مقدما

**hazem_khidr** · 06-12-2007 06:07 PM

اولا اهلا بيك معانا:)
مشكلتك 90 % البيكات مسدوده.
حلها انك تروح لميكانيكي نضيف يفك الكرابيرتير و ينضفه و غير فلتر البنزين و ان شاء الله العربيه حتظبط.
ممكن كمان يكون الهوا و صوت الموتور و الكهربا مش مظبوطين ف ممكن تخليه يبط العربيه الاول لو كانت مبرجله انما لو كويسه يبقي تنضيف الكرابيراتير

**ahmedsrs** · 06-12-2007 09:11 PM

شوف ياخ حاتم غير البوجيهات لو قديمة و راجع على قواطيش البطارية , وشوف الأرضى بتاع العربية , ونظف الكربيراتر اما عند الميكانيكى . او هات المنظف الى بيطحط فى التنك للعربيات الكربيراتير .

**Nader** · 06-12-2007 09:21 PM

اهلاً بك يا اخ هشام معانا في نايل موتورز.

كدة انت عندك المشط الالكتروني جاب اخرة خلاص وعاوز يتغير، روح اكشف علية ولو كدة ابقى غيرة.

**Nader** · 07-12-2007 12:21 AM

معلش يا هيثم مخدتش بالي ... المشط الالكتروني دة المقابل للابلتين والكوندنسر في العربيات القديمة.

**ahmed1981** · 07-12-2007 09:59 PM

إحتمال تكون مشكلتك إنسداد الكربيراتير زي ما الزملاء قالوا

ممكن تشتري إسبراي تنظيف كربيراتير
نوع أمريكي موجود عند بتوع الإكسسوار
وموجود في بعض محطات البنزين زي موبيل صلاح الدين بمصر الجديدة

تفك عمة الكربيراتير والعربية دايرة وترش الإسبراي على وش الكربيراتير وإنت بتزود بنزين أو يكون معاك واحد بيزود بنزين المهم ترش على كل الفتحات بتاعة الكربيراتير
ولو فيه مسمار للسرنسيه تفكه وترش عليه وترش مكان ما بيركب
ولو فلتر الهواء مش نضيف غيره

إحتمال آخر إن عندك تقطيع في الشرارة نتيجة لأسلاك بوجيهات بايظة أو بوجيهات بايظة
لكن خلي الإحتمال ده للآخر
وبالنسبة لمشط الكهرباء فهو غالي ولو عطل فعلا العربية تبطل منك وإنت ماش لكن في هذه الحالة مش هتدور بعد ما تبطل بسهولة