المشاركة الأصلية كتبت بواسطة KSA2011
انا لسه راجع من راس البر
يا بختكم يا دمايطه
دمياط الجديده ولا دمياط ولا راس البر البلد كلها تجنن
نظافه و ناس كويسه و اكل كويس و مناظر جميله
حاجه تبهر بجد والطريق الدولى كان جميل جداا والصبح منظر طبيعى روعه وبالليل وقت الغروب حاجه سبحان الله
انا ما قضيتش هناك وقت كتير عشان طلعت متاخر الصبح عشان الشبورة انا طالع من المنصوره الساعه 11 مثلا وصلت الساعه 12 وما حسيتش بالطريق
الهيونداى اكسنت الجديده منتشره جداا مش عارف ليه
العربيات كلها نضيفه اوى والناس جميله
وصلت الحمد لله صليت فى الجامع الكبير و دورت على شقه بس للاسف قالوا مفيش ولازم تكلمنا قبلها بيومين عشان نعمل حسابنا تتعوض المره الجايه
رحت بعد الصلاه على اللسان الجو كان حر اوى والشمس صعبه قعدنا شويه وبعدين رحنا اتغدينا فى مطعم بزوم انا كلت جمبرى و باقى الاهل اكلوا كباب
ورحنا السوق اشترينا حاجات واشترينا اسماك وجمبرى الاسعار كمان ممتازه يعنى الراجل اول ما دخلت قالى الجمبرى ب 75 قلتله ب 35 قالى ماشى هههه
وبعدين الساعه كانت وصلت 4 اهلى قالولى نرجع بقى عشان الطريق بالليل
كان يوم جميل بس كان قصير تتعوض مرات جايه ان شاء الله
وشكرا لاهل دمياط