الموضوع: المقصات مقلقانى

نصيحة لله اشترى السيراتو ولاتقلق من اى جزء فى السيارة لانها صممت باتقان كما سترى فى بعض التقارير التى وعدت اعضاء المنتدى المحترمين بها وبعد ان تم اخضاع السيارة لفحص دقيق فى ورشة متخصصة باحدى الشركات الكبرى باشراف مهندس ميكانيكى ذو خبرة كبيرة فى السيارات وحاصل على دورات كثيرة من بلدان اوربية... ستكون التقارير تحت عنوان ( سيراتاوى ) اشارة الى كل واحد اقتنى هذه السيارة... وتقريرى الاول مقدمة بسيطة عن مصمم السيارة وهو / بيتر شراير الالمانى وما ادراك ما الالمان فى تصميم المعدات والسيارات على وجه الخصوص وسيرته الذاتيه تشمل الاعمال الاتيه ( مصمم شركة اودى الالمانية 25 سنة ... تصميم سيارة اودى TT ...مصمم شركة فولكس فاجن ... تصميم سيارة فولكس فاجن الاختبارية R... مصمم كيا ) وهنا مربط الفرس كما يقول العرب فليس من المعقول ان مصمم بهذا التاريخ يقع فى اخطاء خاصة ان معظم خبراته فى شركة اودى التى تنافس المرسيدس وبى ام دبليو ... وقد استعنت ببعض التقارير التى وردت بالمواقع الاوربية او منتدانا المحترم وخاصة التقرير الذى اعده المهندس احمد ونادر واكرر شكرى لهما على المجهود ... والى اللقاء فى سيراتاوى 2

ردك ده كفايه في حد ذاته و السيرة الذاتيه للناس المصصمه للسيارة شرف لوجده و ضمان كامل
والله يكرمكم كفايه كلام في الموضوع ده لان اصحاب السيراتو مقتنعين بيها و كل يوم بنجرب و نطمن علي كفائتها
انا واجد من الناس بسوق حوالي 150 كلم يوميا في اخطر طرق مصر واكترها قلق و ربنا يكرم السيراتو كل يوم بتحسسني بالامان و الروعه
كفايه بجد كده
الي عايز يشتري السيراتو الله يوفقه و يباركله فيها و الي مش عاجباه ربنا يقدرله الخير ويباركله

صلي استخاره ....واستفتي قلبك جيدا ...واللي تستريحلها هاتها وسيبك من الكلام اللي بيتقال نصه لا يخضع لاي كلام منطقي او عن تجربه
ومع كل هذا اذا كنت من النوع اللي بيقلق جامد والكلام ممكن ياثر علي نفسيتك يبقي بلاش السيراتو ....لانه لو العجله نامت معاك حتترعب...وتقول حصل ايه وجري ايه وحيفضل جواك احساس بعدم الامان معاها حتي لو معملتش حاجه
اما لو مش فارق حقولك حاجه بسيطه عد كام عربيه سيراتو حتقابلك في الشارع وانت مروح وكام واحده عامله حادثه وشوف دي نسبه طبيعيه للانتشار الرهيب وكام واحد اشتكي منها( احد عيوبها في نظري انتشارها الرهيب)
وفيه كمان حاجه نص الناس اللي قالت ان عربيتي بتحدف شمال لا ضبط زوايا ولا راح التوكيل واصر علي معرفه ايه المشكله
كل واحد فيهم مستني حد يقوله اعمل ايه
والي بيقولك شفت حادثه وصورت حادثه .........للاسف برضه ما فدش الناس باي حاجه غير البلبله ووجع الدماغ والجدل العقيم
اللي في نهايته لا تصل لشيء حقيقي يخص العربيه
لانه بكل بساطه ما قلش الحدثه حصلت ازاي او انه يعرف صاحبها وحكاله عملها ازاي .........يبقي تحكم علي العربيه منين او انها كانت مشكله العربيه او اللي سايق او ظروف الحادث نفسه........
المهم في النهايه جيب العربيه اللي حتخليك وانت سايقها مبسوط ومش مدايق ........وربنا يوفقك

بس سؤالي هو (ما هي علاقة بيتر شيرر (المصمم العالمي) بالمقص و العفشه بشكل عام؟؟؟)

اعتقد من وجهه نظري ومعرفش ده قصده ولا لا
ان مصمم عالمي زي ده مش حيحط اسمه علي تصميم لعربيه ممكن تكون فيها مشكله رئيسيه او عربيه هو مش بيراهن بسمعته عليها
اما بخصوص طبيعه العفشه احنا بس اللي في مصر اللي علقنا عليها وده لان شوارعنا مينفعش تمشي فيها علي رجلك فما بالك بعربيه ..............
يعني الراجل مش حيقرن اسمه بعربيه مقصاتها بتتكسر من اي خبطه او بتتقلب علي 60
وبرضه بوجهه نداء للاخ اللي بيقول انه اختبرها ياريت تنزل التقارير دي
والي كل واحد عايز يقول كلمتين علي العربيه من هنا ورايح ...ييكون كلامك عن تجربه حقيقيه .او مدعم بمستندات
سواء بالسلب او الايجاب............انما شغل دي عربيه خرافه وبتطير مش عاوزينه
او دي عربيه تعبانه دا انه سمعت واحد بيقولي كان سايقها وبعدين عطس جامد راح المقص اتكسر
يا تفيد الناس بجد .....ياحرام عليك وتذكر دائما انه(ما يلفظ من قول الا لديه رقيب عتيد )
وياريت كل واحد عايز يفيد الناس بجد يبقي كلامه جد .............
وشكرا

متقلقش يا معلم المقصات فى سيراتو زى مشوفنا فى التقرير الى عملوه الاعضاء الى راحو التوكيل مركب من جزئين ودة موجود فى البي ام وعربيات تانية كتير ودة بيبقى كسروا اصعب من المقص المصبوب حتة واحدة لان التانى بيتشرخ وبعد كدة بيقطم لكن دة عبارة عن علبة صلب ومن جزئين وعلشان اطمنك اكتر العربيات الحديثة كلها بثتثناء العربيات الصينى واللادا موضوع كسر المقص دة بيبقى مستحيل الا طبعا لو العربية اتعجنت وفى حاجة كمان اكتر عربية فى مصر سيراتو هتكون عملت 30 الف يعنى لسة المقص جديد لا صدى ولا مثلا المساعدين لحقت تبوظ ولا كاوتش العفشة مش موجود فالى يقولك كدة يبقى سورى يعنى مش بيفهم ارجو تكون اقتنعت بكلامى وربنا يوفقك ومتقلقش شركة كيا مش هتغامر بسمعتها وبالنسبة للحوادث دة علشان العربية دى اكتر فئة بتركبها شباب وانت عارف بقى السواقة والطرق عاملة ازاى وكل العربيات كرولا لانسر بي ام حتى بتعمل حوادث ومفيش حاجة كاملة

الاخوة المهتمين بالسيراتو
اسمحو لي اقول تعليق بسيظ علي الموضوع
اولا انا لا معايا سيراتو ولا ناو اشتري سيراتو
لاني معايا اوكتافيا ومبسوط منها والحمد للة
بس اللي لاحظتة ان هناك فعلا تركيز غير عادى علي السيراتو وعلي اي عيب يظهر في العربية ومحاولة اظهارة انة عيب عام مش خاص
لاحظو انة لو كان ظهرت اية عيوب بالسيارة كما يقال كانت شركة كيا سحبتها من الاسواق واعلنت ذلك
والامثلة كثيرة علي اللي بقولة يعني كل شوية بنسمع ان مرسيدس او تويتا وغيرها من الشركات عن سحب السيارة لو كانت هناك عيوب ظهرت فيها( لاحظو انة دة عمرة ما بيحصلش في مصر من اي وكيل محلي )
فازاي يبقي احنا في مصر بنقول ان فية عيب في السيراتو وبقية العالم اللي ما بيفوتش حاجة لم يعلن ذلك ؟؟؟؟؟؟؟
الخلاصة انا حاسس انهاحالات فردية تم استغلالها من بعض المنافسين للسيارة للتقليل من شانها خاصة بعد المبيعات والانتشار السريع للسيارة
ربنايبارك لكل من اقتناها وربنا يهدي الجميع