أستاذنا البشمهندس طارق...كل سنه و حضرتك طيب

كل سنه و حضرتك طيب و ربنا يعينكم على زنقة شغل السنه الجديده..........
كان ليه استفسار عند حضرتك:
أنا من كام يوم روحت مركز الرواس اللى فى شارع عبد الخالق ثروت و طلبت تغيير سير الكاتينه و بلية الشداد و سير الباور و سير الدينامو (العربيه عامله 84000كم) و بالفعل تم تغيير سير الكاتينه و بلية الشداد بتاعه قدام عينى حيث ان هذا المركز ليس لديه إستراحه للعملاء و ده بصراحه عز الطلب بالنسبه ليه:M_yes[1]:
المهم انه مغيرش سير الدينامو و سير الباور و الفنى قال لى حالتهم ممتازه و لسه بدرى عليهم و ركبهم تانى (الخلاصه انى غيرت طقم الكاتينه فقط).

أول حاجه هل عدم تغيير سير الدينامو و سير الباور قرار صحيح من الفنى علما بأنهم متغيروش قبل كده؟؟

تانى حاجه أنا لاحظت ان سير الكاتينه اللى جابهولى مختلف فى النوع و الكتابه اللى عليه و كمان مختلف فى رقمه عن اللى كان راكب فيها:

اللى كان راكب فيها أخذت رقمه من على السير نفسه (MD342154)
اللى ركبهولى رقمه (1145A051)

بلية الشداد اللى ركبهالى رقمها (MD356509)

أرجو من حضرتك طمأنتى من حيث ان القطع اللى ركبتها تكون أصليه و سبب إختلاف رقم سير الكاتينه (هل هو أصلى برده؟) و كمان بخصوص عدم تغيير سيور الباور و الدينامو.

معلش انا بتقل على حضرتك و بشكرك جدا على تعبك و إهتمامك بجميع أعضاء المنتدى.

اهلا يا باشمهندس محمد كل سنة وانت طيب

هو تغيير سير الباور وسير الدينامو بيكون مع سير الكاتينة في صيانة التمانين لكن فيه ناس بتغير الاتنين دول بالتحديد بدري كنوع من الاطمئنان وفي الحالة دي الفني بيشوف وقت التغيير هل الشكل العام لهم يتطلب التغيير ولا لأ وبيبلغ العميل لو حس ان حالتهم كويسة ومش محتاجة تغيير

عموما لو كانوا اتغيروا قبل كده مثلا في الأربعين ولا الستين يبقى تمام مش محتاجين تغيير واذا كانوا لم يتغيروا يبقى الافضل تغييرهم عند صيانة الـ 100 ألف باذن الله

بخصوص رقم الصنف لسير الكاتينة والشداد فالرقمين اصليين فعلا ورقم سير الكاتينة الثاني هو الجديد او البديل الجديد للرقم القديم

وللعلم فان الرواس بيرسل لنا طلبيات خاصة لقطع الغيار بنرسلها لميتسوبيشي متكاملة تخص الرواس (بخلاف اي مركز معتمد تاني بيشتري مننا فقط) لأن الرواس عنده 4 مراكز خدمة غير المركز الخامس الجديد اللي في العبور ومحل قطع الغيار فاطمن ان قطع الغيار اللي عنده اصلية